“Na Reki nei Kosei,” Me iSakisaki ni iTabagone, Jiulai 2021, 12–15.
Na Reki nei Kosei
Na cauravou oqo mai Japani e dau taleitaka me wasea na kosipeli.
iYaloyalo mai na Getty Images
E dau taba piano o koya. E dau cici lekaleka o koya. E dau lade balavu sara mada ga o koya! Ia oqori era sega ni veika vakasakiti duadua ga me baleti Kosei H., e dua na cauravou yabaki 17 mai Nagasaki, Japani.
“O koya e dua na daukaulotu vinaka duadua au se qai bau kila vakadua,” e kaya o Sisita Mckenna Frasure, e dua na daukaulotu oti ka se qai veiqaravi ga mai Japani ena vanua e vakaitikotiko kina o Kosei. “O Kosei e sega vakadua ni lako sivita e dua na madigi me tiko vata kei ira na daukaulotu se vakadinadinataki Karisito ena itaviqaravi ni Lotu kei na vakauitukutuku raraba,” e kaya o koya.
O Kosei e dau okati ira na daukaulotu me so vei ira na nona itokani voleka duadua. Ka sega ni veivakurabuitaki na nona dau vakila oya ni o qai mai kila na levu ni nona dau taleitaka na wasei ni kosipeli.
“Na cakacaka ni kaulotu e noqu reki,” e kaya o Kosei. “E vakavulica vei keda o Nifai ni vua ni vunikau ni bula sa ikoya na ‘ka gadrevi vakalevu duadua kina mai vei ira na ka kecega’ (1 Nifai 11:22). Eso na tamata era na rairai cakitaka beka na vuanikau oqo. Ia, me vaka e dua e sa kila na kamica ni vuanikau oya, au vinakata me’u wasea na kosipeli vei ira era tu wavoliti au.”
Na wasei ni veivakalougatataki ni kosipeli e rawa sara mada ga ni taledi levu duadua nei Kosei.
Qaqa ena Vakauitukutuku Raraba
Ni taura oti e dua na kalasi ni vakavakarau ki na kaulotu, a vakila o Kosei na gagadre levu cake me kauta mai na reki ni kosipeli vei ira na nona itokani. A tekivu o koya ena nona lako ena initaneti. E dua vei ira na iyaya ni cakacaka bibi e dau vakayagataka o koya me wasea kina na itukutuku vakosipeli kei na lewena o ya na vakauitukutuku raraba.
E vica vei ira na nona itokani era sa sauma mai na itukutuku raraba eso oqori. E dua vei ira na itokani a lako mai vei Kosei ka kaya, “Au taleitaka na nomuni Lotu.”
Na itokani oqo a dua tu ga na icaba eliu, ia a mai titobu sara vakatotolo na nodrau veitokani. “A tekivu o koya ena nona tarogi au ena kedrau duidui na nona vakabauta kei na noqu,” e vakamacalataka o Kosei. “E dina ni’u a sega ni dau veivosaki kei koya vakawasoma, keirau a mai veitokani vinaka sara ni oti na noqu wasea na kosipeli ena vakauitukutuku raraba.”
Qito, iVakalasa, kei na Veitokani Tawamudu
Na vakauitukutuku raraba e sega ni sala duadua ga e dau wasea kina o Kosei na nona vakabauta. Nanuma tiko, e nona o koya e dua na bula osooso e sinai ena itaviqaravi. E levu na nona madigi me dau sotavi ira na tamata ka vakaveitokanitaki ira. Ka dau vakayagataka na veimadigi oqori me vakateteya kina na reki ni kosipeli.
“Ena dua na gauna au a sureta e dua na itokani ni kalavo ni qito ki na kalasi ni vosa Vakavalagi ka rau a vakavulica tiko na daukaulotu e valenilotu,” e vakamacalataka o Kosei. “A yaco me ratou veitokani vinaka sara o koya kei rau na daukaulotu ena gauna a vulica tiko kina na vosa Vakavalagi.”
Ia, a sega ni yaco ga na veivosaki ena lesoni Vakavalagi.
“Sa tekivu me vakasamataka na noqu itokani na vuna erau cakacaka tiko kina na daukaulotu oqo, ka rau via yabaki vata ga kei koya, ka veiqaravi tiko ni volodia vaka daukaulotu e Japani. Na nona taro e tarava a taroga se cava e dau muatakii ira na daukaulotu mera veiqaravi kina. Sa qai rogoca o koya na lesoni ni kaulotu ka se tiko eso na veitaratara kei ira na daukaulotu ena veivosaki ena vidio.”
Ena veigauna e dau kauta cake mai kina na kosipeli vei ira na nona itokani, e dau saga o Kosei me vakasotara vata na veika e wasea kei na ivakatagedegede ni nodra vinakata. “Kena ivakaraitaki, au dau tukuna taumada me baleta na ka ena yaco ni oti na mate, na cava na inaki ni bula, se e bula tiko beka na Kalou,” e kaya o koya. “Au sa qai rawa ni veisautaka, ka yavutaki ena nodra taleitaka.”
E dina sara, e kila o koya ni ra na sega ni taleitaka na tamata kece sara. A sa sotava o koya na dredre, me vaka ga e dua tale beka. Ena dua na siga, ni oti na nodra tarogi koya e vica na nona itokani me baleta na Lotu, a saga o Kosei me wasea e dua na tikidua veisoliyaki ni Lotu vata kei na dua vei ira. “Ia, na itokani oya a cici yani ki na tautuba ni rumunivuli ka dredrevaki au tu mai vakadomoilevu mai na olo.
“O ya a vakavuna vei au na rarawa titobu,” e kaya o Kosei.
Ia o koya e sega ni laiva na veivakayalolailaitaki me tarovi koya. E kila o koya ni veika e wasea tiko ena vakalougatataka na nodra bula me tawamudu kevaka era vakarorogo.
Na Reki Ka Muataki Koya
“Au vakila na reki ena ivakavuvuli i Karisito,” e kaya o Kosei. “Kevaka au a sega ni kila na ivakavuvuli oqori, na noqu bula ena sega kina na reki dina.”
Ena nona veibiuyaka na nona itaviqaravi kei na veika e dau taleitaka, e kila o Kosei na ivakarau me dau tuva matau kina. “Na kosipeli i Jisu Karisito e kauta mai na inuinui ki na noda bula ka vakatakila na veika kece e dodonu meda cakava,” e kaya o koya. “Ena gauna mada ga eda lomaleqa kina se da sotava e dua na gauna dredre, na masu yalodina ena kauta mai na vakacegu ka vukei keda me tudei na noda vakasama.”
Oqori na vuna e dau guta sara kina o koya me wasea na kosipeli ena veigauna kece sara e kunea kina. E gadreva o koya me ra vakila na tani na veika e dau taleitaka tu ena veisiga! “Au nuitaka mai na boto ni yaloqu ni vuqa na tamata era na rawata na madigi mera sotava na reki dina oqo,” e kaya o koya.
Na Cava e Bibi Duadua
Me vaka na kena ivakarau ga, na wasei ni kosipeli e sega ni dau taura kece na nona gauna. E dau cakacaka vakaukauwa sara o Kosei ena nona inaki tale eso ni bula. Ena veisiga e dau tereni vakaukauwa ena cici kei na vakaukauwa yago. Ni gadreva me cegu vakalailai, e dau taba piano o koya. E taleitaka talega me dau sikova na veika bula ka vakayagataka na gauna vata kei na nona matavuvale. “Ena bula e tautuba kei iratou na taciqu—au na sega ni guilecava na siga keitou a siwa ika kina ka kani ira!” e kaya o koya.
Ia, ena veigauna kece, e tomana tikoga o Kosei me cakava na veika e bibi cake duadua.
Ka sa tiko e dua na nona ivakasala lailai me baleta e dua tale e via cakava vakakina: “Eda na dusimaki ena gauna eda maroroya kina na ivunau. Ni da vakayacora vakakina, eda na rawa ni vaqaqacotaki mai vua na Turaga. Na rere kei na nuiqawaqawa ena vakaisosomitaki ena inuinui kei na yalodei. Kevaka eda dolava na gusuda ka sega ni maduataka na kosipeli, era na yaco na tamata mera kila na loloma Vakarisito ka vakasinaiti ena reki.”