Au a Bula Kilikili Beka?

Tarovi na vakaraitaki ni yaca

Au a vakaleqai ena veivakalolomataki ena kena balavu ga au nanuma rawa. E a veisautaka beka na sala a raici au kina na Turaga?

rairai yalolailai na goneyalewa

Droini mai vei Trent Gudmundsen

E delana, na noqu gauna ni gone a vinaka sara tu.

Keitou dau lako ki Lotu ka dau tiko ena veisoqoni kece ni Lotu kei na itaviqaravi. Au a laki vuli ka dau qito kei ira na noqu itokani. Vaka goneyalewa, au cakava na veika kece era dau cakava na itabagone. Au a dau gade kei ira na noqu itokani ka lewena tu na matasere kei na kalavo ni drama. Au a lako ki na danisi vakayabaki ni vuli. Ia a tiko e dua na ka vuni butobuto sara ena ruku ni marau, irairai matau e tautuba oya.

Mai na gauna au se qai yabaki rua kina, au a sotava voli na veivakacacani ni veiyacovi mai vei rau na ganequ qase cake. Erau a vakacacani iratou talega na taciqu. Keitou a se rui gone me keitou kila na cava e yaco tiko, ia ni’u sa qase cake mai, au sa tekivu kila mai vakalailai. Au vakila ni’u butobuto ka duka e veigauna au tiko kina e matadrau na ganequ.

A Tubu na Noqu Veilecayaki

Ni oti noqu tiko ena dua na kalasi ni Goneyalewa ka a vakavulici kina me baleta na bula savasava, au sa qai kila na ibalebale ni ivalavala dodonu kei na tiko savasava. Au vakarorogo vei ira na noqu iliuliu ni ra vakamasuti au kei ira na vo ni kalasi me keimami dau bula savasava tikoga.

Au a vakataroga, “E rawa vakacava me’u bula savasava?” Mai na noqu vakanananu balavu duadua au yacova rawa, au a sotava tu mai na veivakacacani ni veiyacovi. Au a sega ni kinoca rawa na veika e nanuma na Turaga me baleti au. Au a dua beka na goneyalewa savasava? Au a bula kilikili beka me’u veigadivi kei ira na cauravou buladodonu ena noqu tabanalevu kei na koronivuli? Ena vakavuna beka me’u tawakilikili kaya na vakamau ena valetabu na veivakacacani au a sotava?

Au a vakasamataka sara vakalevu. A sega ni vakaibalebale vei au ke’u sa na okati me’u tawasavasava ni veika a yaco vei au a sega ni noqu digidigi. Na cava e sega kina ni rawa me’u vakila na yalo savasava? Au sa tawakilikili beka ki na loloma ni Turaga? Au na gadreva beka na veivutuni?

Au a Tovolea Ga me’u Guilecava

Au a sega dina sara ni kila. Au a vakila ni’u sega ni cala, ia ena gauna vata oqori, au a vakila ni’u duka ka vakalolovirataki ka vakalialiai sara. Au a sega ni rawa ni doudou me’u tukuna vei rau na noqu itubutubu se dua tale. Au a tovolea vakavica, ia au vakila ni’u rui madua ka sega ni kila me’u tukuna vakacava. Au tovolea ga me’u guilecava ni sa yaco tiko.

Ni’u sa yabaki 15, erau a kunea na taciqu lalai na yaloqaqa ka sega tu vei au. Erau a tukuna vua e dua na daunivakasala e koronivuli. Ni oti ga e dua na gauna lekaleka, a vesu ka totogitaki e dua vei rau na ganequ me yabaki tolu ena valeniveivesu. Ia, ena veiyabaki e muri, au a sotava na rere vata ga ni’u sega ni bulasavasava se kilikili kina.

Au a Kunea na Yaloqaqa me’u Vukei

Qai yaco emuri, e dua na siga au a yaloqaqa me’u lako ka raici noqu bisopi. A vakamacalataka o koya ni na sega ni tarogi au na Turaga me baleta na cakacaka ni veiyacovi a vakasaurarataki vei au ni’u se gone ka goneyalewa kina. E vakadeitaka vei au o koya ni a sega dina ni noqu cala. Au a tu tawacala ena mata ni Turaga. Au se ivalavala dodonu tikoga!

Ena so na ivakasala mai vei ira na kenadau kei na veivuke mai vei noqu bisopi, au sa biuta rawa tani kina na veivakacacani—kei na mosi kei na rarawa a vakavuna—e dakuqu. Oqo au sa rawata dina e dua na bula marau ka vaka ivakarau. Au a vakamau ena valetabu vua e dua na tagane yalododonu, ka keirau sa susuga cake tiko na neirau matavuvale ena marau.

Ena so na gauna ena curu vakailoa ki na noqu vakasama na veigauna sa oti, ka’u rawa ni nanuma na yaluma au vakila ni’u vakasamataka na noqu bula kilikili.

Au vakataroga se vica tale beka na itabagone era tu ena dua na ituvaki ka’u a tu kina, ka vakila na madua kei na vakalialiai, ka ra vakasamataka tu na nodra ivalavala dodonu kei na vanua era tu kina ena ituvatuva ni Kalou.

Kivei ira na itabagone oqo au via kaya, e lomani kemuni na Turaga.

E mositi kemuni na Yalona.

E kila o Koya ni sega ni nomuni cala.

E kila o Koya ni o ni sa ivalavala dodonu vakaidina.

Ena vukei kemuni o Koya moni kunea na yaloqaqa kei na kaukauwa moni bulataka na nomuni bula ena marau.

Na iVurevure ni Kunei ni Veivuke kei na iNuinui

Kevaka o a vakaleqai ena veivakacacani, vakaraica na veivuke kei na vakanuinui ena nomu:

• Lako ki na ivurevure ni Lotu ena initaneti ena ChurchofJesusChrist.org/Get-Help/Abuse kei na “Abuse” ena topics.ChurchofJesusChrist.org.

• Veivosaki kei nomu bisopi se iliuliu o nuitaka.

• Vosa vua e dua ena vukei iko. Era dau veivakarerei na dauveivakalolomataki vei ira era dau vakacacana mera kua ni tukuna vua e dua tale me baleta na veivakacacani. Kakua ni vakarorogo ki na nodra lasu.

• Ni o kila tiko ni sega ni nomu cala o ya ka sa lomani iko na Turaga.

E Sega ni Baleti Iko na Nodra Cakacaka

“Au sa vakadinadinataka vakalou ni gauna e vakararawataki iko kina vakaca e dua tale, ena vakasaurara, ena ivalavala kaukauwa, veivakacalai, se veiyacovi vakaveiwekani, e sa sega ni baleti iko ka mo kakua ni vakila ni o sa cala.”

Elder Richard G. Scott (1928–2015) ena Kuoramu ni iApositolo Le Tinikarua, Koniferedi raraba Epe. 1992 (Ensign, Me 1992, 32).