Maroroi ni Noda Yalayala

Mai vei Elder Ronald A. Rasband

Ena Kuoramu ni iApositolo Le Tinikarua

iVakatakilakila

Ronald A. Rasband

Mai na dua na vosa ena koniferedi raraba ni Okotova 2019.

iVakatakilakila

gonetagane e solia lesu na bausi, goneyalewa kei na sitivikiti, kei na gonetagane e kaba ulunivanua tiko

Droini mai vei Emily Davis

Dua na yakavi ni’u se cauravou, a dabe tikivi au o tinaqu ena nona yasani loga ka vosa vakamalua baleta na bibi ni bulataki ni Vosa ni Vuku. A raica vakadodonu na yaloka ni mataqu ka’u vakila ni nona vosa e basikata na utoqu: “Yalataka vei au, Ronnie, nikua, ni ko na dau bulataka na Vosa ni Vuku.” Au a yalataka vakaidina o ya vua, ka’u se taura tikoga mai na veiyabaki kece oqo.

Au a cakava e dua na vakatulewa bibi taumada me’u muria na lawa ni Kalou, ka sega ni gadrevi kina me’u lesuva. A kaya na Turaga, “Koi au, na Turaga, au sa vauci ni dou muria na noqu vosa; ia ni dou sega ni muria na noqu vosa, sa sega na ka e yalataki vei kemudou” (Vunau kei na Veiyalayalati 82:10).

Me vaka e dua na iApositolo ni Turaga o Jisu Karisito, au sa sureti kemuni mo raica na yalayala kei na veiyalayalati o ni cakava vua na Turaga, kei ira na tamata, me sa dodonu, ka cecere, ka kila tiko ni vauci kemuni na nomuni vosa. Au yalataka vei kemuni, ni ko cakava oqo, na Turaga ena vakadeitaka nomu vosa ka vakadonuya nomu cakacaka ni ko saga ka gumatua tikoga mo tara cake nomu bula, nomu vuvale, kei na Lotu i Jisu Karisito ni Yalododonu Edaidai. Ena tiko vata kei iko o Koya, ka ko na rawata, ena yalodei, mo nanamaki mo “curu ki lomalagi, [mo] tiko marau kina vata kei na Kalou me tawamudu” (Mosaia 2:41).