“Ang Templo ug ang Inyong Espirituwal nga Pundasyon,” Alang sa Kalig-on sa mga Kabatan-onan, Nob. 2021.
Dominggo sa Buntag nga Sesyon
Ang Templo ug ang Inyong Espirituwal nga Pundasyon
Mga Kinutlo
I Shall Not Want [Walay Makulang Kanako], ni Yongsung Kim
Dapit nga gipatrabaho sa Templo sa Salt Lake
Abi ninyo, nagpahigayon kita og dako nga mga kausaban sa makasaysayanong Templo sa Salt Lake. …
Gibuhat nato ang tanan sa paghatag niining halangdon nga templo, nga nagkahuyang, usa ka pundasyon nga mobatok sa pwersa sa kinaiyahan hangtod sa Milenyo. Sa samang paagi, panahon na karon nga kita moimplementar sa dili ordinaryo nga mga paagi—tingali mga paagi nga wala nato mahimo kaniadto—sa pagpalig-on sa atong personal nga espirituwal nga mga pundasyon. Ang dili ordinaryo nga mga panahon nagkinahanglan og dili ordinaryo nga mga paagi.
Minahal nako nga mga kaigsoonan, kini mao ang ulahing mga adlaw. Aron kamo ug ako makasugakod sa umaabot nga mga katalagman ug mga kalisod, kinahanglan nga kita adunay lig-on nga espirituwal nga pundasyon nga natukod diha sa lig-on nga sukaranan sa atong Manunubos, nga si Jesukristo.
Mao nga ako mangutana sa matag usa kaninyo, unsa kalig-on ang inyong tukuranan? Ug unsa nga mga pagpalig-on sa inyong pagpamatuod ug pagsabot sa ebanghelyo ang gikinahanglan?
Ang templo mao ang labing importante nga bahin sa pagpalig-on sa atong hugot nga pagtuo ug espirituwal nga kalig-on tungod kay ang Manluluwas ug ang Iyang doktrina mao ang sentro nga bahin sa templo. …
Kon kamo dili pa ganahan nga motambong sa templo, adto og kadaghan—dili lang pipila. Tugoti ang Ginoo, pinaagi sa Iyang Espiritu, motudlo ug modasig kaninyo didto. …
Palihog tuohi ko kon ako moingon nga kon ang inyong espirituwal nga pundasyon natukod nga lig-on diha ni Jesukristo kamo dili kinahanglan nga mahadlok. Kon kamo magmatinud-anon sa inyong mga pakigsaad nga gihimo didto sa templo, kamo lig-unon pinaagi sa Iyang gahom. Dayon, kon ang espirituhanon nga mga linog mahitabo, kamo makabarog nga lig-on tungod kay ang inyong espirituwal nga pundasyon lig-on ug dili matarog.