“Vakarautaka na Gauna vua na Turaga,” Me iSakisaki ni iTabagone, Nove. 2022.
Soqoni ena Yakavi ni Sigatabu
Vakarautaka na Gauna vua na Turaga
Veitikina lavetaki
Na domo kei na idre ni vuravura e veirawai ka vuqa sara. Ia sa rui levu na domo era veicoriti, veicavilaki, ka rawa ni dreti keda tani mai na salatu ni veiyalayalati Me da levea na mosiniyalo ena yaco mai, au vakatakekere vei kemuni nikua mo ni vorata na baca ni vuravura ena nomuni vakarautaka na gauna ni Turaga ena nomuni bula—e veisiga yadua kecega.
Kevaka e lako mai na tabana ni itukutuku raraba se so tale na tabana na itukutuku o ciqoma, sa na malumu sara na nomu rawa ni rogoca na vosamalua ni Yalo. Kevaka talega o sega ni vakasaqara tiko na Turaga ena masumasu kei na vuli kosipeli e veisiga, o sa laivi iko tiko me vakamalumalumutaki iko na ivakavuvuli vakatamata e rairai rogorogo vinaka beka ia e sega ni dina. O ira sara mada ga na Yalododonu era yalodina tiko e rawa ni vagolei tani mai na rorogo tudei ni mataivakatagi ni Papiloni.
Kemuni na taciqu kei na ganequ, au vakamasuti kemuni mo ni vakarautaka na gauna ni Turaga! Vakadeitaka na nomu yavu vakayalo me rawa ni vorata na veivakatovolei ni gauna ena nomu cakava na veika ena rawa kina ni tiko vata kei iko na Yalo Tabu e veigauna. …
E sega ni dua na ka e sureta vakalevu cake na Yalo mai na nomu vakadeitaka na nomu rai vei Jisu Karisito. Tukuni Karisito, rekitaki Karisito, tugana ki lomamu na vosa i Karisito, ka toso ki liu ena tudei vei Karisito. Me ka marautaki na nomu Siga ni Vakacecegu ena nomu sokalou Vua, vakaivotavota ena sakaramede, ka vakatabuya na Nona siga.
Me vaka au cavuta tiko vakabibi ena mataka nikua, yalovinaka vakarautaka na gauna vua na Turaga ena Nona vale tabu.
… Ena liutaki iko ka tuberi iko ena nomu bula kevaka ko na vakarautaka na gauna Vua ena nomu bula—e veisiga yadua kecega.