“ʻOku Fakangata ʻe he Melino ʻa Kalaisí ʻa e Tāufehiʻá,” Ki Hono Fakamālohia ʻo e Toʻu Tupú, Nōvema 2022.
Fakatahaʻanga ʻo e Pongipongi Sāpaté
ʻOku Fakangata ʻe he Melino ʻa Kalaisí ʻa e Tāufehiʻá
Ngaahi Konga Fakamatala
Naʻe fakamatalaʻi ʻe Sīsū ʻoku ʻikai ko ʻEne tokāteliné “ke ueʻi ʻa e loto ʻo e kakaí ke feʻiteʻitani, ʻiate kinautolu; ka [ko ʻEne] tokāteliné ʻeni [ke] fakangata hono fai ʻo e ngaahi meʻa peheé” [3 Nīfai 11:28–30]. …
Hili e ʻaʻahi ʻa e Fakamoʻuí ki he Ongo ʻAmeliká, naʻe uouangataha ʻa e kakaí. … Ko ʻenau ngaahi faikehekehé naʻe hōloa ʻi hono fakafehoanaki ki he ʻofa ne nau maʻu ki he Fakamoʻuí, pea naʻa nau uouangataha ko e “kau ʻea hoko ki he puleʻanga ʻo e ʻOtuá” [4 Nīfai 1:17]. Ko hono olá, “[ne] ʻikai lava ke ʻi ai ha kakai ʻoku lahi hake ʻenau fiefiá … kuo fakatupu ʻe he toʻukupu ʻo e ʻOtuá” [4 Nīfai 1:16].
Ko e uouangatahá ʻoku fie maʻu ai e ngāué. ʻOku tupulaki ʻi he taimi ʻoku tau tanumaki ai e ʻofa ʻa e ʻOtuá ʻi hotau lotó mo tau tokanga taha ki hotau ikuʻanga taʻengatá. ʻOku fakatahaʻi kitautolu ʻe hotau tuʻunga ko e fānau ʻa e ʻOtuá pea mo ʻetau loto ʻaki e ngaahi moʻoni ʻo e ongoongolelei kuo fakafoki maí. ʻOku fakatupu ʻe heʻetau ʻofa ki he ʻOtuá mo hotau tuʻunga fakaākonga ʻia Sīsū Kalaisí ha tokanga moʻoni ki he niʻihi kehé. …
Ko e taimi ʻoku ʻōʻōfaki ai ʻetau moʻuí ʻe he ʻofa ʻa Kalaisí, te tau fakaleleiʻi e taʻefelotoí ʻaki e angamaluú, faʻa kātakí, mo e angaʻofá. ʻE siʻi ange haʻatau hohaʻa ki he meʻa ʻoku pelepelengesi kiate kitautolú kae lahi ange ki hotau kaungāʻapí. ʻOku tau feinga ke fakalelei mo uouangataha. ʻOku ʻikai ke tau kau ʻi ha “ngaahi fakatonutonu taʻepau,” fakamāuʻi ʻa kinautolu ʻoku ʻikai felotoi mo kitautolú, pe feinga ke nau tūkia. Ka, ʻoku tau pehē pē ko kinautolu ʻoku ʻikai felotoi mo kitautolú ʻoku nau fai pē e lelei taha ʻoku nau lavá ʻi he ngaahi aʻusia ʻo e moʻuí ʻoku nau maʻú. …
… Ko ʻeku fakaafé ke tau loto-toʻa muʻa ʻi hono fakamuʻomuʻa ʻetau ʻofa ki he ʻOtuá mo hotau tuʻunga fakaākonga ki he Fakamoʻuí, ʻi ha toe faʻahinga meʻa pē. Tau tauhi muʻa ʻetau fuakava ʻi hotau tuʻunga fakaākongá—ʻa e fuakava ke tau tahá.