Salig sa Dios

(Mga Panultihon 3:5–6)

Pinaagi sa Kinatibuk-ang mga Kapangulohan sa Young Women ug sa Young Men

Ang Dios nagdapit kaninyo sa pagsalig Kaniya sa tanan nga mga butang.

Usahay kon mahitabo ang lisod nga mga butang, maghunahuna kita kon mosalig ba kita ni bisan kinsa, lakip sa Dios. Nahadlok kita nga Siya makapasagmuyo usab kanato. Ang maayong balita mao nga ang Dios hingpit nga nahigugma kanato. Siya mabination ug manggihatagon ug matinuoron. Siya dili mausab ug kasaligan.

Ug tungod niana, kita makasalig Kaniya bisan unsa pay mahitabo. Ang tema sa kabatan-onan karong tuiga mao ang “Salig sa Dios” (Mga Panultihon 3:5–6).

Ania ang pipila ka ehemplo kon sa unsang paagi ang matag usa kanamo sa Kinatibuk-ang mga Kapangulohan sa Young Women ug sa Young Men misalig sa Dios.

Michelle D. Craig

Bonnie H. Cordon

Rebecca Craven

Salig sa mga Motibo sa Dios

Pipila lamang ka adlaw sa wala pa ko mag-edad og 16, ang akong pamilya mibalhin tabok sa nasod. Nagtuo ako nga ngil-ad kaayo ang tayming niini! Sa paghandom, klaro nakong nakita nga pipila sa dakong mga panalangin alang sa among pamilya ug alang kanako sa personal nga paagi miabot tungod niana nga pagbalhin sa dihang tin-edyer pa ako. Mahimong dili kita makasabot sa tayming sa Ginoo niana nga higayon, apan kita makasalig Kaniya tungod kay kita makasalig sa Iyang kasingkasing ug mga motibo.

Michelle D. Craig

Salig sa Tayming sa Ginoo

Tungod sa tawag sa akong amahan isip presidente sa misyon, nakadawat ako sa akong kaugalingong tawag nga moserbisyo og misyon nga mas sayo kay sa sumbanan nga edad sa sister nga mga misyonaryo. Kana nagpasabot nga ako mosulod sa missionary training center sa wala pa ang gradwasyon sa hayskol. Alang nako, ang tayming dili masabtan, apan nakadawat ako og lig-on nga espirituhanong kumpirmasyon nga mosalig sa Dios. Misalig ako, ug ang mga butang nagmalamposon ra sa maanindot nga paagi.

Ang pagsalig sa Ginoo nagpasabot sa pagpadayon bisan kon ang dalan dili hingpit nga klaro.

Bonnie H. Cordon

Salig sa Dios atol sa Malisod nga mga Panahon

Sa akong pagdako, ang akong amahan usa ka permanenteng opisyal sa Kasundalohan. Ang disbentaha lamang sa iyang trabaho mao nga siya kinahanglan nga moadto sa gubat. Ako 13 anyos sa dihang mibiya ang akong papa paingon sa Vietnam alang sa ikaduhang higayon. Ang kahadlok nga siya dili na mobalik anaa kanunay sa akong hunahuna, apan mao usab ang akong pagsalig sa Dios. Sa wala pa mobiya, ang akong papa mihatag kanako og panalangin sa amahan nga nagseguro kanako nga ang Ginoo magauban kanako ug motabang samtang wala ang akong papa. Mibati ako og kalinaw. Bisan tuod og wala gayod ako masayod nga ang akong papa makapauli nga luwas, misalig ako nga ang tanan mahimong OK ra, bisan unsa pa ang mahitabo.

Rebecca Craven

Ahmad S. Corbitt

Steven J. Lund

Bradley R. Wilcox

Isalig ang Inyong Kaugalingon ngadto sa Dios

Sa dihang mipasakop ako sa Simbahan isip usa ka tin-edyer, mihukom ako nga ihatag ang akong kinabuhi, panahon, ug kasingkasing ngadto sa Ginoo. Bisan og kana nga matang sa permanente nga pasalig ingon og makahadlok og gamay, nasayod ako nga kadto husto. Mibati ako nga ang akong Langitnong Amahan gusto niini gikan kanako, ug ako adunay kalinaw sa pagbuhat niini. Malipayon kaayo ako nga mipili ako sa pagsalig sa Dios ug mitugot nga ipatigbabaw Siya sa akong kinabuhi. Nakaseguro ako nga kon misalig ako sa akong kaugalingon nga pagsabot, ang akong kinabuhi dili unta mahimong ingon ka puno sa hingpit nga kalipay, ug kalinaw.

Ahmad S. Corbitt

Salig sa Inspirasyon sa Dios

Human ko miserbisyo sa akong misyon, nadasig ako sa pag-apil sa militar kay sa mobalik sa kolehiyo. Kini mao ang labing kataposan nga butang nga gusto unta nakong buhaton! Gibati gayod nako nga naglibog, apan akong nakat-onan nga mosalig sa Dios, ug nakakaplag lang gayod ko og igo-igo lang nga pagtuo aron maminaw Kaniya ug motuman. Nahimo akong usa ka sundalo sa tulo ka tuig.

Daghan kaayong maayo nga mga butang sa akong kinabuhi ang miresulta gikan niana nga desisyon, lakip na ang paghimamat sa akong umaabot nga asawa.

Steven J. Lund

Salig sa mga Pag-aghat sa Dios nga Molihok Karon

Human nga nagtudlo ako sa ikaunom nga ang-ang [grade six] sulod sa tulo ka tuig, akong nakat-onan nga kon magtudlo ako og dugang nga upat ka tuig, ang school district mobayad og bahin sa akong tuition aron makadawat sa akong master’s degree. Kini ingon og maayo nga plano—hangtod nga ang Espiritu miaghat kanako nga moundang sa akong trabaho ug mobalik ug mokuha sa akong degree dihadiha dayon. Ang akong asawa adunay susama nga pag-aghat, mao nga nagpadayon kami. Kini nagpasabot nga kami kinahanglang mobayad sa eskwelahan sa among kaugalingon. Apan tungod kay gibuhat namo, nakatrabaho ko isip magtutudlo sa BYU—Provo. Kana nga kahigayonan wala gyod unta mahitabo kon naghulat kami og dugang nga upat ka tuig. Wala kami masayod kon sa unsang paagi nga ang mga butang molampos, apan ang Ginoo migiya sa among mga dalan sama sa Iyang gisaad.

Bradley R. Wilcox