“Pagpangita ni Jesukristo sa Daang Tugon,” Alang sa Kalig-on sa mga Kabatan-onan, Ene. 2022.

Dali, Sunod Kanako

Pagpangita ni Jesukristo sa Daang Tugon

Ni Marissa Widdison

Mga Magasin sa Simbahan

Ania ang tulo ka paagi nga kamo makapangita sa Manluluwas samtang magtuon kamo sa Daang Tugon niining tuiga.

Imahe

Jesukristo

Daklit nga eksamin: Hain nga mga basahon sa kasulatan ang mahitungod ni Jesukristo? Hmm. Tan-awon nato:

Ang Basahon ni Mormon mao ang lain nga tugon Kaniya.

Ang Doktrina ug mga Pakigsaad usa ka koleksiyon sa mga mensahe gikan Kaniya ngadto kang Joseph Smith ug sa ubang mga propeta.

Ang Bag-ong Tugon naghulagway sa mga panghitabo sa Iyang kinabuhi.

Apan ang Daang Diay? Nagtudlo ba kini usab kanato mahitungod ni Jesukristo?

Oo! Sa pagkatinuod, ang Manluluwas mihimo og dugang nga paningkamot sa pagtabang sa Iyang mga disipulo nga makasabot sa Iyang tahas diha sa Daang Tugon: “Ug gipasabot ni Jesus kanila ang gisulti mahitungod kaniya sa tibuok Kasulatan, sugod sa mga basahon nga gisulat ni Moises hangtod sa mga sinulat sa tanang propeta” (Lucas 24:27).

Ania ang tulo ka paagi nga kamo makakita ni Jesukristo samtang suhiron ninyo ang Daang Tugon niining tuiga.

1. Mga kasulatan nga naghisgot mahitungod ni Jesukristo gamit ang lahi nga ngalan.

Diha sa Daang Tugon, si Jesus kasagaran nga gitawag og “Ginoo” o “Dios.” Ang mga bersyon sa Biblia nga gimantala sa Simbahan naglakip og mga footnote nga makatabang kaninyo nga makasabot kon ang usa ka bersikulo nagpasabot ni Jesukristo. Sama pananglit, sa dihang si Moises nakigsulti sa Dios diha sa nagdilaab nga sampinit (tan-awa sa Exodo 3:6), ang mga footnote nagpatin-aw nga nakig-istorya siya sa Manluluwas.¹ Si Presidente Russell M. Nelson miawhag kanato sa pagtuon sa lain-laing mga ngalan ug titulo ni Jesukristo nga gigamit sa mga kasulatan.²

2. Mga butang ug mga panghitabo nga magpahinumdom kanato ni Jesukristo.

Daghang mga kasulatan sa Daang Tugon ang naglakip og mga simbolo nga makatudlo kanato mahitungod ni Jesukristo ug magpahinumdom kanato sa tabang nga Iyang gitanyag kanato. Sama pananglit:

Daghang mga kasulatan ang naghulagway og mga panahon diin ang matinud-anong mga tawo gisugo sa pagsakripisyo og mga hayop isip kabahin sa ilang pagsimba. Sama pananglit, kon ang mga anak sa Israel mimarka sa ilang pultahan og dugo sa nating karnero, gipanalipdan sila gikan sa grabe nga kadaot. Kini nga mga sakripisyo nagpahinumdom kanato nga gitugotan ni Jesukristo ang iyang Kaugalingon nga patyon isip kabahin sa Iyang Pag-ula aron sa pagbuntog sa espirituhanon ug pisikal nga kamatayon. (Tan-awa sa Exodo 12:13.)
Kaniadto ang propeta nga ginganlan og Elias kinahanglan nga motago sa desiyerto. Mibati siya og kaguol ug miingon nga siya nangandoy nga siya patay na. Samtang natulog siya, milagrosong mipakita ang pan ug tubig, nga naglig-on kaniya sa pisikal ug emosyonal nga paagi nga igo aron magpadayon nga mabuhi. Kini makapahinumdom kanato nga si Jesukristo mao ang Buhi nga Tubig ug ang Pan sa Kinabuhi, ang kataposang tinubdan sa paglaom ug kinabuhi. (Tan-awa sa 1 Mga Hari 19:1–8.)
“Ang imong pulong maoy suga nga magtultol kanako,” usa ka salmista ang misulat (Salmo 119:105). Ug si Miqueas mipamatuod, “Bisag ania kami sa kangitngit karon, ang Ginoo maghatag kanamog kahayag ”(Miqueas 7:8). Ang ilang mga pulong nagpahinumdom kanato nga si Jesukristo mao ang Kahayag sa Kalibotan, nga naggiya kanato pabalik sa atong langitnong panimalay.

Samtang magbasa kamo, mahimong makadiskobre gani kamo og uban nga mga butang nga magpahinumdom kaninyo ni Jesukristo ug sa Iyang abilidad sa pagluwas kanato. Sama pananglit, sa dihang ang pamilya ni Noe naluwas sa arka gikan sa lunop o sa dihang si Jonas gihatagan og panahon aron maghinulsol samtang anaa sulod sa balyena. Kini nga mga panghitabo mahimong magpahinumdom kanato nga ang Manluluwas makaagak kanato latas sa mga unos sa kinabuhi ug makahatag kanato og mga oportunidad sa pagbalik sa hustong dalan. (Tan-awa sa Genesis 7:1; Jonas 1:17.)

3. Mga bersikulo nga nanagna sa pagkatawo ni Jesukristo.

Karon kita nagpaabot ug nangandam alang sa Ikaduhang Pag-anhi ni Jesukristo. Sa samang paagi, ang mga propeta sa Daang Tugon nagpaabot ug misulat mahitungod sa Iyang unang pag-anhi, sa dihang natawo Siya dinhi sa yuta. Sama pananglit:

Usa ka propeta nga ginganlan og Balaam mihulagway kon sa unsang paagi nga “may mosubang nga Bituon gikan sa Israel” (Numeros 24:17). Kini nagpasabot nga ang Manluluwas matawo diha sa kaliwatan ni Jacob (o Israel).
Usa ka propeta nga ginganlan og Natan misulti ni Haring David nga si Jesukristo mahimong usa ka kaliwat ni David—nga ang iyang kaliwat moestablisar sa “trono sa iyang gingharian hangtod sa kahangtoran” (2 Samuel 7:13).
Ang propeta Isaias misulat sa pipila sa labing inila nga mga paghulagway sa Daang Tugon bahin sa Manluluwas. Pipila sa iyang mga pulong gigamit isip mga pulong sa awit sa Handel’s Messiah, nga kasagarang kantahon panahon sa Pasko. (Tan-awa sa Isaias 7; 9; 40; 53.)

Imahe

batang babaye nga nagbasa sa mga kasulatan gamit ang flashlight

Uban sa gamay nga pagbansay, kamo makakita ni Jesukristo sa tibuok Daang Tugon niining tuiga. Piho siyang nahigugma kaninyo, sama nga Siya nahigugma ni Adan ug Eva, Aaron ug Miriam³—ug sa daghang uban pa nga Siya personal nga nangalagad dinhi niining karaan, makapadasig nga mga istorya. Uban sa hugot nga pagtuo diha ni Jesukristo, ug uban sa tabang sa usag usa, mahimo kining usa ka talagsaon nga tuig sa pagtuon sa kasulatan!