“Juon Injinea in Lan̄lōn̄,” N̄an Kōkajoorļo̧k Jodikdik ro, Jān. 2022.
Juon Injinea in Lan̄lōn̄
Likao in jān Germany ej lo jeļāļo̧kjeņ, aiboojoj, im lan̄lōn̄ ilo aolep kain jikin ko—im n̄e ej lo er, ej kwaļo̧ki.
Patrick ej jerbale model car injin eo an.
Pija ko jān Julian Klemm
Patrick L., 16, jān Bavaria, Germany, ej ba kein ekkatak ko rem̧m̧an tata ippān ilo jikuuļ rej bōnbōn, physics, im chemistry. Ilo m̧ool, men eo em̧m̧an tata ippān ej science bwe ekar kōņaan kwaļo̧ke ippān ro jet kōn je juon bok kōn physics (kōn thermodynamics im magnetism, bwe ren lukkuun jetjet).
Ekōņaan bwe en erom juon injinea bwe en jerbal eo an, ejake technical equipment ko āinwōt injin wa ko. (Ijo wōt ke, opiij ko reļļap an jikin kōm̧m̧an wa ko BMW im Audi rej juon awa im jimettan ettoļo̧k jān ijo ej jokwe ie.)
Bōtaab science ekar jab jikin eo de eo Patrick ej lo kajoor, im men ko rōkaitoktok limo.
Science im Kōļmenļo̧kjeņ
Aaet, Patrick ekar wōr juon an iakwe em̧wilaļ kōn science, bōtaab itok limo ko reļļapļo̧k jān m̧ool ko me kareel jān armej im lukkuun m̧ool im formula ko.
“Ikar je juon bok in physics, bōtaab kiiō ij kōm̧m̧ane juon bok eļap an em̧m̧an” ej kōmeļeļeik. “Bok eo ij je ej kōn mennin kōm̧anm̧an ko rekabwilōn̄lōn̄ im laļ eo aer. Innām ewōr jejjo jodikdik ro me rej ņa mejļan jorrāān ko.”
Būrojāāk in ekāāl ekar im̧we kōn iakwe eo an Patrick kōn novel ko rem̧m̧an āinwōt Harry Potter im Percy Jackson bok ko. Je bok ko ilo iturejet ej juon men Patrick ekar m̧ōdjake ālkin an eo rokorāān kar jiron̄ e ewi jon̄an an naaj kar kaitoktok limo. “Ekar jipan̄ eō en̄jake lan̄lōn̄ eo,” Patrick ej ba.
Ererakļo̧k in lan̄lōn̄ jab in ekar tōlļo̧k Patrick n̄an bōk ta eo ekar ekkatak kake kōn kakien ko im m̧ool ko an laļ in im je juon bok kake. Ekar barāinwōt kōm̧m̧an bwe en kōņaan ejake juon bwebwenato kabwilōn̄lōn̄. Im ejjeļo̧k ļōmņak ejum̧ae ilo menin. Patrick ekar āinwōt jeļā bwe m̧ool eo im aiboojoj eo im lan̄lōn̄ eo maron̄ loi ilo elōn̄ jikin ko. Im ekōņaan pukōte, ejake, im kwaļo̧k men ko jabdewōt jikin remaron̄ in pād ie.
Laļ In
Patrick ej meļeļe ilo juon jekjek eļap kōn kakien ko kōn laļ in. Bōtaab ej barāinwōt lale eļapļo̧k jān m̧ool ko n̄an lo aiboojoj ijo.
“Ij jokwe epaakeļo̧k juon bukin wōjke,” ej ba. “Ej juon men em̧m̧an kōn jokwe ilo bukōn ko reddik—em̧ōkaj am̧ maron̄ etal n̄an wōjke ko im lo aenōm̧m̧an ijōņ.”
E ej iakwe iaļ ko ilo elōn̄ wōjke ko n̄an etetal aitok ie, eļap tata, baajkōļ. “Em̧m̧an ippa baajkōļ. Ej juon itok limo eo eļap n̄an n̄a,” ej ba. “Eļap aō baajkōļ. Juon iien ikar baajkōļ 1,200 kilometers [745 miles] ilowaan ruo wiik ko.”
Science ej im̧we ļōmņak eo an Patrick, im jar ej im̧we jetōb eo an. “Ewōr juon aō naan in kam̧ool ekajoor kōn jar,” ej ba. “Kwoj maron̄ kōnono n̄an [Jemedwōj Ilan̄] jabdewōt jikin.”
Jet iien ej kōņaan etal in etetal aitok ak baajkōļ ilo wōjke ko ippān aolepān baam̧le eo an (Jinen, Jemān, ļaddik ro ruo jatin, im leddik ro reddik jatin) ak ippān jemān wōt. Emakijkij an etal ippān make. Bōtaab aolep iien ej lo aenōm̧m̧an im aiboojoj ilo men ko rej make waļo̧k.
“Takin aļ eļap tata aer aiboojoj ipeļaakin ijin,” ej ba. “Jet iien kwoj maron̄ lo Alps (toļ) ko jān ijin jekdo̧o̧n n̄e repād jōkoko rettoļo̧k. Im n̄e aļ ej tak, aļ eo ej rabōlļo̧k, im ippān toļ ko, kwoj lo mejatoto in eļap an em̧m̧an ebūrōrō, im elukkuun in aiboojoj.”
Bar juon Kain Jeļāļo̧kjeņ
Ilo kakobaba n̄an m̧ool ko kōn natural science im aiboojoj ko an laļ in, Patrick ej barāinwōt kaorōk m̧ool eo—kain m̧ool eo me maron̄ loe wōt kōn jar.
“Ewōr juon aō naan in kam̧ool kōn jar,” Patrick ej ba. “Bukwelōlō, bok pā, wōr aenōm̧m̧an im lur, innām jar. En̄in ej ta eo eļap tata ippa kōn naan in kam̧ool.”
Ej kōmeļeļeik bwe naan in kam̧ool eo an ej itok jidik jān juon men ekar jiron̄ eō kake ilo kōjeraam̧m̧an in petriak eo an. “Ej ba bwe ij aikuj aolep iien keememej bwe Jemedwōj Ilan̄ aolep iien ej epaak im pojak in ron̄jake jar ko aō,” ej ba. “Kwoj maron̄ kōnono n̄an E aolep jikin. E ej pād n̄an kwe aolep jikin, im kwoj maron̄ bōk uwaak ko aolep jikin.”
En̄jake eo an kōn bōk uwaak ko n̄an jar eo ej em̧m̧anļo̧k, ej ba, n̄e ej bōk jet bun̄tōn ne ko. “Ij en̄jake Jetōb Kwojarjar eo an lukkuun in kajoor kōn jar ko. N̄e ij lukkuun kōm̧m̧an mennin kōttōbar ko, lukkuun wōt kajjitōk ko, lukkuun jijet im kōm̧m̧ane āinwōt an ba ilo jeje ko rekwojarjar, im kōttar im leļo̧k iien—n̄e ij kajjieon̄ n̄an kōm̧m̧ane, aolep iien ej wōr ippa juon naan in kam̧ool ekajoor im en̄jake Jetōb Kwojarjar eo.
Patrick ej keememej juon iien ekar kōm̧m̧ane juon kain jar eo ejenolo̧k. “Eļap am ekōnono kōn Josep Smith im ekōjkan an kar ilo 14 iiō dettan kar jar im bōk juon uwaak,” ej ba. “Im kōn menin ikar jijet—em̧ool ikar etal n̄an wōjke ko—im kar jar. Im ikar bōk juon uwaak. Innām ikar m̧ōņōņō. Im bwe ekar kōkajoorļo̧k naan in kam̧ool eo aō.”
Kwaļo̧k Ta Eo Kwoj Jeļā
Ejja āinwōt an kar pukōte n̄an kwaļo̧k jeļāļo̧kjeņ eo an ilo science im kōļmenļo̧kjeņ eo an elo̧le, Patrick ej barāinwōt kappukōt n̄an kwaļo̧k jeļāļo̧kjeņ eo an ilo jetōb.
Jino ilo 12 iiō dettan, ekar joļo̧k iien jipan̄ mijenede ro rej jerbal aolep raan. Ekar barāinwōt juon iien karuwaineneik juon m̧ōtta n̄an m̧weo im̧ōn n̄an bōk katak ko an mijenede ro. “Kōm kar kōnono kōn Jepļaaktok eo. E ekar kaitoktoklimo. Ekanooj em̧m̧an an kar ron̄jake im kar bōk koņaan im riiti jeje ko rekwojarjar. Kōm kar riiti Jemes 1:5, eo Josep Smith ekar barāinwōt riiti. Im ikar kōm̧m̧an bwe en riit jān Josep Smith—Bwebwenato. E ekar lukkuun wujlepļo̧k an.”
Rijikuuļ ro m̧ōttan ilo jikuuļ rej kautiej tōmak eo an. “Ijello̧kin kakkure Kabun̄ in, raar rejtake,” ej ba. Jekdo̧o̧ņ rūkaki eo an ilo jikuuļ in kabun̄ eo an ekar rejtake e. “Ej ļōmņak ej em̧m̧an bwe ewōr aō tōmak ilo Anij im em̧ool ejipan̄ eō kōtōprak mennin kōttōpar ko aō.”
Ālkin an kam̧ōj jikuuļ im tōprak n̄an ekkatak ilo university, Patrick ej barāinwōt ļōmņak in jerbale juon mijen edipio. “Inaaj bōlen kōppopo kōn riiti Preach My Gospel,” ej ba. “Ij kōņaan wōt ekkatak im riit, kōm̧m̧ani katak ko, im barāinwōt joļo̧k eļap iien ippān mijenede ro.”
Patrick ej iakwe kanneļo̧k wōt kōļmenļo̧kjeņ eo an. Jon̄an e ej je juon bok ettōņak.
Kōn Men ko Rem̧m̧an
Patrick ekar ekkatak bwe elōn̄ men ko jabdewōt jikin me rej “wānōk, karbōb, ak em̧m̧an ekkōnono kake ak nebare,” im kōn menin ej kappukōt men kein (Laajrak in Tōmak ko 1:13). Im n̄e ej lo er, ej kwaļo̧k er.
Men̄e ilo science, kōļmenļo̧kjeņ, ak peļaak (nature), ej lo jeļāļo̧kjeņ eo ekaitoktok limo im lukkuun aiboojoj jabdewōt jikin ej oktakļo̧k n̄an e. Im ej lo jeļāļo̧kjeņ eo eutiej tata, aiboojoj, im m̧ool jān jemjerā eo an ippān Jemedwōj Ilan̄ im Jisōs Kraist.