“Bionsu Bidi Bianyi ne Ndi Mubimanya,” Bua Dikankamika dia Bansonga, Ngondo wa Kumpala 2022.
Mukenji wa ku Ngondo Bua Dikankamika dia Bansonga Ngondo wa Kumpala 2022
“Bionsu Bidi Bianyi ne Ndi Mubimanya”
Foto nya kudi Getty Images
Ukatu mudiumvua kuyi ne mushinga anyi? Ukatu mudiumvua nunku pauvua ne meji bua bungi bua bantu badi mu buloba bujima, anyi pauvua mutangila bungi bua mitoto idi mulu. Ukatuku mudikonka bikala Nzambi mukumanya menamena wewa ne mushindu udi moyo weba muikalangana anyi? Bikalabi nunku, Mose udi ne mukenji bueba.
Mu tshimônyi, Nzambi wakaleja Mose kateta konsu ka buloba ne bantu bonsu bavua basombapu. Bivua bikala “bungi kabuyi kubala bu lusenga lua ku kala ka mâyi” (Mose 1:28). Nunku Nzambi wakambila Mose ne uvua muenza “maloba ka’ayi kubala” (Mose 1:33)—bua bifukibua bienda biya kula ntanta kupita buloba ebu.
Mose uvua mushala ne dipampakana pakamonaye bintu bionsu ebi. Pamuapa wakadikonka: Muaba kayi undi nkumbana munkatshi mua bifukibua biabungi? Ne mushindu kayi udi Nzambi mua kutangila bintu biabungi?
Diandamuna dia Nzambi divua dipepela: “Bintu bionsu bidi bibadibua kundi.” Mushindu kayi? “Bionsu Bidi Bianyi ne Ndi Mubimanya” (Mose 1:35). Nzambi uvua mumanya uvua Mose muikala, anu bumudiye mumanya bana benda bonsu, momumua kabidi ne bifukibua bienda bionsu. Bionsu mbienda—mitoto, lusenga, ne nangananga bana benda pa buloba. Bobu ke kipatshila kajima kadiye mufukila buloba. Lupandu luabu lua tshiendelela ludi mudimu wa mushinga mukola kudi Nzambi.
“Bualu monayi, etshi tshidi mudimu wanyi ne butumbi buanyi—bua kutuala dibenga kufua ne moyo wa tshiendelela wa muntu” (Mose 1:39).
Anu bu muvua Mose mulonga muaba udiye ukumbana mu dilongolola dia Nzambi, wewa peba udi mua kuikala ne bujadiki ne Nzambi mmukumanya! Dikuambuluisha bua kualukila kudiye, tshidi mudimu wenda ne butumbi buenda. Bua tshinyi? Bualu udi wenda. Ne kakuenza tshintu tshidi katshiyi ne mushinga pa tshiotshi!
© 2021 kudi Intellectual Reserve, Inc. All rights reserved. Mupatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly For the Strength of Youth Message, December 2021. Tshiluba. 18295 760