« លោកអយ្យកោ ៖ តើពួកលោកជានរណា និងហេតុអ្វីវាសំខាន់ » ដើម្បីកម្លាំងនៃយុវជន ខែ កុម្ភៈ ឆ្នាំ ២០២២ ។
សារលិខិត ដើម្បីកម្លាំងនៃយុវវ័យប្រចាំខែ កុម្ភៈ ឆ្នាំ ២០២២
លោកអយ្យកោ
តើពួកលោកជានរណា និងហេតុអ្វីវាសំខាន់
ប្រហែលជាអ្នកធ្លាប់ឮពីឈ្មោះ អ័ប្រាហាំ, អ៊ីសាក និង យ៉ាកុប ជារឿយៗ យើងអានអំពីពួកលោកនៅក្នុងព្រះគម្ពីរមរមន ហើយនឹងស្ដាប់ឮកាន់តែច្បាស់អំពីពួកលោក ពេលអ្នកសិក្សាព្រះគម្ពីរសញ្ញាចាស់នៅឆ្នាំនេះ ។ ដោយមានការផ្ដោតយកចិត្តទុកដាក់យ៉ាងខ្លាំងទៅលើពួកលោក នោះពួកលោកប្រាកដជាមនុស្សសំខាន់ហើយមែនទេ ? ប៉ុន្តែអ្នកប្រហែលជាសួរខ្លួនឯងថា « ហេតុអ្វីបុរសទាំងបីរូបនេះដែលបានរស់នៅកាលពីរាប់ពាន់ឆ្នាំមុនសំខាន់នៅសព្វថ្ងៃនេះ ? មែនហើយ គន្លឹះដើម្បីឆ្លើយសំណួរនោះពឹងផ្អែកលើសេចក្ដីសញ្ញាដ៏អស់កល្បជានិច្ច និងពរជ័យដែលបានសន្យាដែលព្រះបានប្រទានដល់ពួកលោក ។
អ័ប្រាហាំ
រចនារូបភាពដោយ ចារុម វ៉ូហ្គេល
អ័ប្រាហាំ គឺជាព្យាការីដ៏អស្ចារ្យ ។ លោកគឺជាមនុស្សសុចរិត ហើយគោរពតាមបទបញ្ញត្តិទាំងឡាយរបស់ព្រះ ។
លោកបានជ្រមុជទឹក ទទួលបព្វជិតភាព និងត្រូវបានផ្សារភ្ជាប់នឹងភរិយារបស់លោក សារ៉ាយសម្រាប់ភាពអស់កល្បជានិច្ច ។
ព្រះបានធ្វើសេចក្ដីសញ្ញាជាមួយនឹងអ័ប្រាហាំថា ពូជពង្សរបស់លោកនឹងមានច្រើន ហើយនឹងមានពរជ័យដូចគ្នាដែលលោកបានទទួល ។
ពួកគេនឹងនាំយកភាព ពេញលេញនៃដំណឹងល្អរបស់ព្រះយេស៊ូវគ្រីស្ទទៅកាន់ប្រជាជាតិនានានៅលើផែនដី ។
អ៊ីសាក
អ៊ីសាកគឺជា កូនប្រុសរបស់ អ័ប្រាហាំ និងសារ៉ាយ ។
ព្រះបានមានបន្ទូលប្រាប់ឲ្យអ័ប្រាហាំបូជាអ៊ីសាក ។ អ័ប្រាហាំស្រឡាញ់អ៊ីសាក ប៉ុន្តែបានជ្រើសរើសគោរពតាមព្រះ ។ ពេលអ័ប្រាហាំហៀបនឹងធ្វើយញ្ញបូជាដល់អ៊ីសាក នោះទេវតាមួយអង្គបានមានបន្ទូលឲ្យអ័ប្រាហាំឈប់ ។ ឆន្ទះរបស់អ័ប្រាហាំ និងអ៊ីសាកដើម្បីគោរពតាមព្រះគឺជានិមិត្តរូបនៃដង្វាយធួននៃព្រះរាជបុត្រាបង្កើតតែមួយរបស់ព្រះ ។
អ៊ីសាកត្រូវបានទទួលការសន្យានូវពរជ័យដូចគ្នានឹងអ័ប្រាហាំដែរ ។
យ៉ាកុប
ដូចជាឪពុក និងជីតារបស់លោកដែរ យ៉ាកុបគឺជាមនុស្សស្មោះត្រង់ចំពោះព្រះ ។
ដោយសារតែភាពស្មោះត្រង់របស់លោក ព្រះអម្ចាស់បានប្ដូរឈ្មោះរបស់យ៉ាកុបទៅជាអ៊ីស្រាអែល ដែលមានន័យថា « បុគ្គលដែលឈ្នះជាមួយព្រះ » ឬ« ចូរឲ្យព្រះឈ្នះ »( សូមមើល សេចក្តីណែនាំដល់បទគម្ពីរទាំងឡាយ « អ៊ីស្រាអែល » ) ។
យ៉ាកុបមានកូនប្រុស១២ នាក់ ។ កូនប្រុសទាំងនេះ និងក្រុមគ្រួសាររបស់ពួកគេត្រូវបានគេស្គាល់ថាជា កុលសម្ព័ន្ធ នៃវង្សអ៊ីស្រាអែល ។
សេចក្ដីសញ្ញាដែលព្រះបានចុះជាមួយនឹងអ័ប្រាហាំត្រូវបានធ្វើជាថ្មីជាមួយនឹងយ៉ាកុប និងកូចចៅរបស់លោក ។
លោកអយ្យកោ និងអ្នក
ក្នុងនាមជាសមាជិកសាសនាចក្រ អ្នកគឺជាផ្នែកមួយនៃពូជពង្សរបស់អ័ប្រាហាំ អ៊ីសាក និងយ៉ាកុប ។ សេចក្ដីសញ្ញាដែលពួកលោកបានធ្វើជាមួយនឹងព្រះអនុវត្តចំពោះអ្នកដែរ !
អ្នកមានពរជ័យនោះ និងការទទួលខុសត្រូវដើម្បីថ្លែងទីបន្ទាល់របស់អ្នកអំពីព្រះអង្គសង្គ្រោះ ហើយចែកចាយដំណឹងល្អ ។
អ្នកក៏ត្រូវបានហៅឲ្យអញ្ជើញមនុស្សគ្រប់គ្នាឲ្យចុះ និងរក្សាសេចក្ដីសញ្ញា ព្រមទាំងទទួលពិធីបរិសុទ្ធនៃបព្វជិតភាពផងដែរ ។ ប្រធាន រ័សុល អិម ណិលសុនបានមានប្រសាសន៍ថា នេះគឺជាផ្នែកទាំងអស់នៃការប្រមូលផ្ដុំសាសន៍អ៊ីស្រាអែល ដែលជា « កិច្ចការដ៏សំខាន់បំផុតដែលកើតឡើងនៅលើផែនដីសព្វថ្ងៃនេះ » ( « Hope of Israel » [ ការប្រជុំធម្មនិដ្ឋានទូទាំងពិភពលោក ថ្ងៃទី ៣ ខែ មិថុនា ឆ្នាំ ២០១៨ ] ទំព័រ ៨ នៅលើគេហទំព័រ ChurchofJesusChrist.org ) ។
© 2022 by Intellectual Reserve, Inc. All rights reserved. បោះពុម្ពនៅ ស.រ.អា. ។ ការអនុម័តជាភាសាអង់គ្លេស ៖ ៦/១៩ ។ ការអនុម័តឲ្យបកប្រែ ៖ ៦/១៩ ។ ការបកប្រែនៃ Monthly For the Strength of Youth Message, February 2022 ។ Cambodian ។ 18344 258