“The Patriarchs: Who They Were and Why It Matters,” For the Strength of Youth, Feb. 2022.
ຂ່າວສານປະຈໍາເດືອນ For the Strength of Youth, ເດືອນກຸມພາ 2022
ປິຕຸ
ພວກເພິ່ນແມ່ນໃຜ ແລະ ເປັນຫຍັງຈຶ່ງສຳຄັນ
ບາງທີເຈົ້າເຄີຍໄດ້ຍິນມາແລ້ວກ່ຽວກັບອັບຣາຮາມ, ອີຊາກ, ແລະ ຢາໂຄບ. ເຮົາມັກຈະໄດ້ອ່ານກ່ຽວກັບພວກເພິ່ນໃນພຣະຄຳພີມໍມອນ ແລະ ແນ່ນອນວ່າເຈົ້າຈະໄດ້ຍິນກ່ຽວກັບພວກເພິ່ນຫລາຍຂຶ້ນຂະນະທີ່ເຈົ້າສຶກສາພຣະຄຳພີເດີມໃນປີນີ້. ດ້ວຍຄວາມເອົາໃຈໃສ່ຢ່າງຫລວງຫລາຍກັບພວກເພິ່ນ, ພວກເພິ່ນກໍຕ້ອງຂ້ອນຂ້າງສຳຄັນ, ແມ່ນບໍ? ແຕ່ວ່າເຈົ້າອາດຈະຖາມຕົວເອງວ່າ, “ເປັນຫຍັງຊາຍທັງສາມຄົນຜູ້ທີ່ມີຊີວິດຢູ່ເມື່ອຫລາຍພັນປີກ່ອນຈຶ່ງສຳຄັນກັບປະຈຸບັນນີ້?” ແລ້ວ, ຂໍກະແຈສຳລັບຄຳຕອບນັ້ນແມ່ນມີຢູ່ໃນພັນທະສັນຍານິລັນດອນ ແລະ ພອນທີ່ພຣະເຈົ້າໄດ້ປະທານໃຫ້ພວກເພິ່ນ.
ອັບຣາຮາມ
ຮູບພາບປະກອບ ໂດຍ ແຈຣຳ ໂວໂກ
ອັບຣາຮາມເປັນສາດສະດາທີ່ຍິ່ງໃຫຍ່. ເພິ່ນເປັນຄົນຊອບທຳ ແລະ ເຊື່ອຟັງຕໍ່ພຣະບັນຍັດຂອງພຣະເຈົ້າ.
ເພິ່ນໄດ້ຮັບບັບຕິສະມາ, ໄດ້ຮັບຖານະປະໂລຫິດ, ແລະ ໄດ້ຜະນຶກເຂົ້າກັບພັນລະຍາຂອງເພິ່ນນາງຊາຣາຊົ່ວນິລັນດອນ.
ພຣະເຈົ້າໄດ້ເຮັດພັນທະສັນຍາກັບອັບຣາຮາມວ່າ ລູກຫລານຂອງເພິ່ນຈະຍິ່ງໃຫຍ່ ແລະ ຈະໄດ້ຮັບພອນເຊັ່ນດຽວກັນກັບທີ່ເພິ່ນໄດ້ຮັບ.
ເຂົາເຈົ້າຈະນຳເອົາຄວາມສົມບູນແຫ່ງພຣະກິດຕິຄຸນຂອງພຣະເຢຊູຄຣິດໄປໃຫ້ຫລາຍປະຊາຊາດໃນໂລກ.
ອີຊາກ
ອີຊາກເປັນລູກຊາຍຂອງອັບຣາຮາມ ແລະ ນາງຊາຣາ.
ພຣະເຈົ້າໄດ້ບອກໃຫ້ອັບຣາຮາມຖວາຍອີຊາກ. ອັບຣາຮາມຮັກອີຊາກແຕ່ວ່າເລືອກທີ່ຈະເຊື່ອຟັງພຣະເຈົ້າ. ກ່ອນທີ່ອັບຣາຮາມກຳລັງຈະຖວາຍອີຊາກ, ທູດອົງໜຶ່ງໄດ້ບອກໃຫ້ອັບຣາຮາມຢຸດ. ຄວາມເຕັມໃຈຂອງອັບຣາຮາມ ແລະ ອີຊາກທີ່ຈະເຊື່ອຟັງພຣະເຈົ້າ ຄືສັນຍາລັກຂອງການຊົດໃຊ້ຂອງພຣະບຸດອົງດຽວທີ່ຖືກຳເນີດຂອງພຣະເຈົ້າ.
ອີຊາກໄດ້ຮັບຄຳສັນຍາເຊັ່ນດຽວກັນກັບອັບຣາຮາມ.
ຢາໂຄບ
ເຊັ່ນດຽວກັນກັບພໍ່ ແລະ ພໍ່ຕູ້ປູ່ຂອງເພິ່ນ, ຢາໂຄບຊື່ສັດຕໍ່ພຣະເຈົ້າ.
ຍ້ອນຄວາມຊື່ສັດຂອງເພິ່ນ, ພຣະຜູ້ເປັນເຈົ້າຈຶ່ງໄດ້ປ່ຽນຊື່ຂອງຢາໂຄບເປັນອິດສະຣາເອນ, ຊຶ່ງມີຄວາມໝາຍວ່າ “ຜູ້ທີ່ໄຊຊະນະກັບພຣະເຈົ້າ” ຫລື “ຂໍໃຫ້ພຣະເຈົ້າໄຊຊະນະ” (ເບິ່ງ Bible Dictionary, “Israel”).
ຢາໂຄບມີລູກຊາຍ 12 ຄົນ. ລູກຊາຍເຫລົ່ານີ້ ແລະ ຄອບຄົວຂອງເຂົາເຈົ້າກາຍເປັນທີ່ຮູ້ຈັກກັນວ່າ ຊົນເຜົ່າຂອງອິດສະຣາເອນ.
ພັນທະສັນຍາທີ່ພຣະເຈົ້າໄດ້ເຮັດໄວ້ກັບອັບຣາຮາມໄດ້ຖືກຕໍ່ໃຫ້ກັບຢາໂຄບ ແລະ ລູກໆຂອງເພິ່ນ.
ປິຕຸ ແລະ ເຈົ້າ
ໃນຖານະທີ່ເປັນສະມາຊິກຂອງສາດສະໜາຈັກ, ເຈົ້າກໍເປັນພາກສ່ວນໜຶ່ງຂອງລູກຫລານອັບຣາຮາມ, ອີຊາກ, ແລະ ຢາໂຄບ. ພັນທະສັນຍາທີ່ພວກເພິ່ນໄດ້ເຮັດໄວ້ກັບພຣະເຈົ້າກໍກ່ຽວຂ້ອງກັບເຈົ້າຄືກັນ!
ເຈົ້າມີພອນ ແລະ ໜ້າທີ່ຮັບຜິດຊອບໃນການສະແດງປະຈັກພະຍານຂອງເຈົ້າເຖິງພຣະຜູ້ຊ່ວຍໃຫ້ລອດ ແລະ ແບ່ງປັນພຣະກິດຕິຄຸນ.
ເຈົ້າຍັງຖືກເອີ້ນໃຫ້ເຊື້ອເຊີນທຸກຄົນໃຫ້ເຮັດ ແລະ ຮັກສາພັນທະສັນຍາ ແລະ ຮັບເອົາພິທີການຕ່າງໆຂອງຖານະປະໂລຫິດນຳອີກ. ປະທານຣະໂຊ ເອັມ ແນວສັນ ໄດ້ກ່າວວ່າ ນີ້ແມ່ນທຸກສ່ວນຂອງການເຕົ້າໂຮມອິດສະຣາເອນ, ຊຶ່ງ “ເປັນສິ່ງທີ່ສຳຄັນທີ່ສຸດທີ່ເກີດຂຶ້ນຢູ່ໃນໂລກທຸກມື້ນີ້” (“Hope of Israel,” [worldwide youth devotional, June 3, 2018], 8, ChurchofJesusChrist.org).
© 2022 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, February 2022. Laotian. 18313 331