“Sahm en Mahs kan: Ihs Irail oh Dahme Kahrehda E Kesempwalki,” Ong Kakehlepen me Pwulopwul kan, Pepuweri 2022.
Padahk en Sounpwong kan Ong Kakehlepen me Pwulopwul kan, Padahk, Pepuweri 2022
Irail Sahm en Mahs kan
Ihs Irail oh Dahme Karehda E Kesempwalki
Mwein kumwail rongehr duwen Eipraam, Aisek, oh Seikop. Kitail kin kalapw wadek me pid duwen irail nan Pwuhk en Mormon oh kumwail pahn kin rong duwen irail ni amwail pahn onopki Kadehde Mering nan pahr wet. Pwehki eh pahn kalapw pid duwen irail, irail udahn kesempwal, pwung? Ahpw kumwail pahn mwein pein kalelapak ong kumwail, “Dahme kahrehda ohl silimen me momour pahr kid kei samwalahro kesempwaliki rahnwet?” Poahson en pasapeng en kalelapak wet mihmi nan inou poatoapoat oh inou en kapai kan me Koht ketkihong irail.
Eipraam
Kasansal kan sang Jarom Vogel
Eipraam wia soukohp mwahu men. E wia aramas mehlel men oh kin peikiong sapwellimen Koht kosonned akan.
E ketin pepdaisla, alehdi prihsduhd, oh katengtengieng ah pwoud Sara kokohlahte.
Koht ketin wiahda inou sarawi ehu ong Eipraam me sapwellime keinek pahn kaselel oh pahn ale soangen kapai kan me e alehdier.
Irail pahn alehdi rongamwahu unsek en Sises Krais ong wehi koaros en sampah.
Aisek
Aisek wia neihn Abraham oh Sara pwutak.
Koht ketin mahsaniong Abraham en tohnmeteikihla Aisek. Abraham poakehng Aisek ahpw e pilada en peikiong Koht. Mwohnte Abaraham ah pahn tohnmeteikihla Aisek, tohnleng men ahpw mahsaniong Abraham en uhdi. En Abraham oh Aisek ara inengieng en peikiong Koht iei me wia sain en Tomw en Sapwellimen Koht Ieroso.
Aisek pil ale inou en songen kapaikaute me Abraham ale.
Seikop
Pil duwehte ah pahpa oh ah pahpa kahlap, Seikop pil pwoson oh mehleliong Koht.
Pwehki ah pwoson mehlel, Kauno ketin wekidala eden Seikop ong Israel, me wewehki “emen me kin doadoahkehng Kauno ansou koaros” de “mweidehng Kauno mehkoaros” (kilang nan Bible Dictionary,“Israel”).
Seikop nainiki pwutak 12. Pwutak pwukat oh arail peneinei kan me kin kadeniki keinek en Israel.
Inou sarawi me Koht ketin wiahda ong Abraham ie me pwurehng wiawihda ong Seikop oh sapwellime serih kan.
Peitriahk kan oh Kumwail
Ni amwail wia tohn Mwomwohdiso, kumwail iang wia kisehn keinek en Abraham, Aisek, oh Seikop. Inou kan me irail wiahda ong Koht pil kohieng kumwail.
Kumwail ahniki kapai oh pwukoah en wia amwail kadehde duwen Sounkomouro oh kalohki spawellime rongamwahu.
Kumwail pil ahniki pwukoah en luke koaros en wiahda oh kolokol inou sarawih kan oh alehda tiahk sarawih kan en prihsduhd. Preseden Russel M. Nelson masaniher me mepwukat koaros wia kisehn kapwurupwupenehn Israel, me “wia mehkot keieu kesemwpal me wiewiawi rahnwet pohn sampah” (“Hope of Israel,” [kapokon lap en me pwulopwul kan, Suhn 3, 2018], 8, ChurchofJesusChrist.org).
© 2022 sang Intellectual Reserve, Inc. Kolokol pwuhng koaros. Ntingda nan USA. Kamanaman ong ni lokaiahn Wai: 6/19. Kamanaman ong kawehwe: 6/19. Translation of Monthly For the Strength of Youth Message, February 2022. Pohnpeian 18344 885.