Ang Tema ug Ako

Kabatan-onan nagpaambit kon giunsa nila sa pagsunod ang mga pulong sa mga Tema sa Young Women ug sa Korum sa Aaronic nga Pagkapari

Gahom sa Pagkapari atol sa Pandemya

“Ako mohigugma sa Dios … ug mogamit sa Iyang pagkapari sa pagserbisyo sa uban, sugod sa akong kaugalingong pamilya.”

Ni Cole Collins

Litrato gikan sa Getty Images

Sa dihang nagsugod kami sa pagsimba diha sa panimalay tungod sa COVID-19 nga pandemya, mitabang ko sa paghatag sa sakramento ngadto sa akong pamilya. Nindot nga makahimo sa pagbuhat niini sa akong kaugalingong pamilya, ug kini nakapaamgo nako kon unsa ko ka mapasalamaton alang sa sakramento. Mapasalamaton ko nga ako nabuhi pa niining panahona nga makasimba diha sa panimalay.

Usa sa among mga silingan nagkinahanglan nga dunay mohatod sa sakramento ngadto kaniya. Walay bisan kinsa sa iyang panimalay ang makaandam o makapanalangin sa sakramento tungod kay ang iyang bana namatay na pipila ka tuig ang milabay. Nagmabinantayon usab siya sa mga bisita tungod sa pandemya. Ang akong papa ug ako mao ang iyang tigpangalagad nga mga igsoong lalaki, mao nga mitanyag mi sa paghatag kaniya sa sakramento samtang magsul-ob og mga mask ug mohimo sa ubang mga pag-amping alang sa iyang kasiguroan.

Mapasalamaton kaayo siya nga kami makaadto. Mibati lang ko og gamay nga kasubo nga siya nagmasulub-on, kay siya ra ang anaa sa iyang panimalay atol sa pandemya. Apan ako mapasalamaton usab nga ako makatanyag kaniya sa butang nga importante kaayo aron makahimo niya nga malipayon. Nindot nga makaserbisyo kaniya. Nakapalipay kini kanako nga ang akong papa ug ako makahimo sa pag-adto ug pagserbisyo sa among silingan.

Mapasalamaton ko nga adunay pagkapari tungod kay kini nakahatag og kaayohan dili lamang kanako apan sa ubang mga tawo usab. Nakatabang kini nako nga mahimong mas maayo nga tawo ug nakatabang nako nga makita unsaon nako sa pagserbisyo sa uban. Ang pagpaambit sa sakramento sa akong panimalay ug ngadto sa akong silingan nakabukas sa akong mga mata. Kinahanglan nakong pahimuslan ang oportunidad sa pagpaambit sa sakramento ug sa pagserbisyo sa mga tawo kinsa dili makahimo niini alang sa ilang kaugalingon. Mapasalamaton ko nga ako makagamit sa pagkapari sa pagpanalangin sa ubang mga tawo ug sa akong pamilya.

Ang tagsulat nagpuyo sa Utah, USA.