Ang Tema ug Ako

Kabatan-onan nagpaambit kon giunsa nila sa pagsunod ang mga pulong sa mga Tema sa Young Women ug sa Korum sa Aaronic nga Pagkapari

Ang Espiritu Makatabang Kanako nga Makahibalo Unsaon sa Pagserbisyo

Ni Alicia Tjahyono

“Isip usa ka disipulo ni Jesukristo, ako maningkamot nga mahimong sama Kaniya. Ako magtinguha ug motuman sa personal nga pagpadayag ug mangalagad sa uban pinaagi sa Iyang balaan nga ngalan.”

Atol sa COVID-19 nga pandemya, daghang mga tawo ang gamay na lang og kinitaan o gani nawad-an sa ilang mga trabaho. Gusto ko nga mopagaan og gamay sa ilang gisagubang. Uban sa suporta sa akong mama ug papa, ug naggamit sa akong personal nga kwarta, nagsugod ko sa paghatag og pagkaon ngadto niadtong nanginahanglan. Sa kasagaran ako mihimo niini pinaagi sa pag-order og pagkaon alang sa uban pinaagi sa bike taxi nga app. Usahay akong ihatod ang pagkaon ngadto sa mga lugar nga gitudlo alang niadtong kinsa nagkalisod.

Sa Indonesia adunay daghang drayber sa motor nga taxi. Mogamit mi og usa ka app sa among mga telepono aron kontratahon ang ilang mga serbisyo. Atol sa pandemya, ang mga drayber nagkalisod sa pagkuha og mga order.

Usa ka adlaw, misunod ko sa usa ka aghat gikan sa Espiritu aron sa pagtabang og sinulagma nga drayber. Nag-order ko og pagkaon gikan sa bike taxi nga app. Apan sa dihang miadto siya sa restawran aron kuhaon ang pagkaon, mipadala ko og chat kaniya, nagsulti kaniya nga ang pagkaon sa tinuod para kaniya. Nasurprisa siya ug wala motuo nga kini alang kaniya. Sa dihang miingon ako nga kana alang kaniya, diha-diha nagpasalamat siya kanako ug nag-ampo alang kanako. Miingon siya nga iyang dad-on ang pagkaon sa ila ug ihatag ngadto sa iyang anak. Malipayon kaayo siya nga paminawon. Kini nakapahimo usab nako nga malipayon kaayo!

Bisan og ang akong pamilya ug ako nag-atubang usab og pipila ka hagit, naminaw ko sa Espiritu ug mipili sa pagserbisyo. Nakasinati kami og hingpit nga kalipay, nga makatabang kanamo nga mabuntog ang among mga hagit.

Mapasalamaton kaayo ko alang sa Espiritu Santo. Kini nga kasinatian nagpahinumdom nako sa usa ka kasulatan gikan sa Bag-ong Tugon, Juan 13:34: “Maghatag ako kaninyog bag-ong sugopaghigugmaay kamo.Ingon nga ako nahigugma kaninyo, paghigugmaay usab kamo.” Nasayod ko nga kon kita mosunod sa Espiritu, makadawat kita og talagsaong mga panalangin gikan sa Langitnong Amahan.

Ang tagsulat nagpuyo West Java, Indonesia.