“Ang Dios Makatabang Nato sa Malisod nga mga Panahon,” Alang sa Kalig-on sa mga Kabatan-onan, Mar. 2022.
Ang Dios Makatabang Nato sa Malisod nga mga Panahon
Si Jesukristo nasayod unsaon sa pagtabang ang matag usa kanato, bisan unsa pa ang atong mga pagsulay.
The Savior Walked on Water [Ang Manluluwas Naglakaw sa Tubig], ni Walter Rane
Nahinumdom ko sa akong gibati sa dihang tin-edyer pa ko, nagpuyo sa unsay ingon og malisod nga mga panahon. Dihay gubat sa kalibotan nga mapintas. Ang mga batan-ong lalaki nga mas magulang nakog gamay nangamatay sa pakig-away. Dihay mga panag-away sa gang sa kasilinganan. Ang tibuok kalibotan nga ekonomikanhong depresyon wala pa mahuman, ug daghang tawo mga pobre. Ang akong pamilya ug ako mao lamang ang mga Santos sa Ulahing mga Adlaw sa lungsod nga among gipuy-an.
Apan, ako malipayon ug malaumon. Ako gitudloan, sama kaninyo, nga ang atong mga pagsulay mga potensyal nga panalangin kon kini makapahimo kanato nga moduol ngadto sa Langitnong Amahan ug sa Manluluwas alang sa panabang.
Ngano nga Adunay mga Pagsulay?
Ang mga pagsulay mohatag kanato og bililhong oportunidad sa pagpili sa paggamit sa hugot nga pagtuo. Makapangayo kita pinaagi sa pag-ampo alang sa panabang gikan ni Jesukristo, kinsa nakahibalo unsaon sa pagtabang kanato. Siya nakasinati sa tanang pagsulay nga atong atubangon. Siya nasayod gayod sa hingpit unsaon sa pagtabang sa matag usa kanato. Ug Siya nahigugma kanato.
Ang katuyoan sa mga hagit sa kinabuhi mao nga aron makita unsay atong pilion nga buhaton. Mogamit ba kita sa hugot nga pagtuo sa pagtuman sa mga sugo nga Iyang gihatag kanato sa bisan unsa nga mga pagsulay nga atong atubangon? Ang usa ka mahigugmaong Dios mobuhat kanunay unsay labing maayo alang kanato. Siya mokuha og mopaminos sa atong pagsulay kon kana makapalig-on sa atong hugot nga pagtuo. Sa ubang mga higayon, Siya dili.
Sa inyong natun-an sa sayong bahin sa mga kinabuhi sa mga propeta sa Daang Tugon nakita ninyo ang paagi sa Ginoo nga motabang kanato sa hinay-hinay aron mabuntog ang malisod nga mga pagsulay. Pananglitan, ang paagi sa Ginoo sa pagtabang ni Jose ug ni Moises nakatudlo kanako unsaon sa pagpangayo ug pagdawat sa tabang sa malisod nga mga panahon.
Mga Pagsulay ni Jose
Si Jose, ang pinalanggang anak ni Jacob, gihagbong sa iyang mga igsoong lalaki sa lungag ug dayon gibaligya ngadto sa pagkaulipon didto sa Ehipto. Ang iyang amahan gisultihan sa iyang mga igsoong lalaki nga siya gipatay. Samtang si Jose usa ka ulipon nga sulugoon, ang Ginoo mihatag kaniya og gahom sa paghubad sa mga damgo ni Paraon. Gipakita niya kang Jose unsaon sa Ehipto pagsulbad ang umaabot nga kagutom. Siya mihatag ni Jose og moral nga kalig-on sa pagpakigbatok sa tintasyon, pagabuhian gikan sa bilanggoan, ug sa edad nga 32 gibutang ngadto sa taas nga katungdanan ni Paraon. Si Paraon miingon ni Jose, “Asa man kita makakitag laing tawo nga sama kang Jose nga nagbaton sa espiritu sa Dios?”1
Usa ka leksiyon alang nako gikan sa paagi sa pagtabang sa Ginoo ni Jose mao ang paagi nga Siya makatabang nato sa malisod nga mga panahon. Samtang si Jose nagpadayon sa paghimo og husto nga mga pagpili, ang Ginoo milig-on ni Jose, mihatag kaniya og espirituhanong gahom, ug mipahumok sa mga kasingkasing sa mga tawo palibot kaniya.
Moses Seeing Jehovah [Moises Nakakita ni Jehova], ni Joseph Brickey
Ang mga Pagsulay ni Moises
Sa samang paagi, ang tabang sa Ginoo ngadto ni Moises sa iyang mga pagsulay susama sa Iyang tabang ngadto ni Jose. Ang mga pagsulay ni Moises nagsugod usab sa iyang kabatan-on. Si Moises nahilayo gikan sa iyang mga ginikanan. Ang iyang unang pagsulay mao nga gipadako sa anak nga babaye ni Paraon. Sa pagpanalipod sa usa ka Israelita, napatay niya ang usa ka Ehiptohanon ug kinahanglang molayas ngadto sa desiyerto.
Ang Ginoo mipakita ngadto ni Moises ug misugo kaniya sa pagluwas sa mga anak ni Israel gikan sa pagkaulipon didto sa Ehipto. Kanang ingon og imposible nga buluhaton usa ka pagsulay nga gibati ni Moises nga lisod kaayo kay sa mahimo sa iyang abilidad. Ang labing lisod nga mga pagsulay sa inyong kinabuhi mahimong moabot kon kamo hatagan og buluhaton sa Ginoo nga ingon og lisod kaayo ug inyong gibati nga kamo nagkinahanglan og tabang sa Dios.
Ang Ginoo nagsugod pinaagi sa paghatag ni Moises sa tabang nga inyong gikinahanglan. Siya misulti ni Moises nga Siya mao ang mopalig-on kaniya sa mga pagsulay sa umaabot.
“Ako mao Ako: ug … Ingna ang mga Israelita, Ako Mao maoy nagpadala kanako nganhi kaninyo.”2 Uban niana nga kasiguroan, si Moises nakaangkon og hugot nga pagtuo ug kalig-on alang sa sunod-sunod nga mga pagsulay nga miabot kaniya diha sa gisangon kaniya nga buluhaton. Wala lamang ang Ginoo mitawag kaniya apan ang Ginoo nag-uban kaniya sa ingon og milagroso nga mga paagi.
Light of the World [Kahayag sa Kalibotan], ni Walter Rane
Ang Inyong mga Pagsulay
Ang malisod nga mga panahon nga atubangon ninyo ug nako managlahi. Walay duha ka kinabuhi nga eksakto nga pareha. Ang mga pagsulay gipahaom sa matag usa nato pinaagi sa usa ka mahigugmaong Langitnong Amahan ug sa Iyang Pinalangga nga Anak, nga si Jesukristo. Ang paagi diin Sila motubag sa atong mga pag-ampo alang sa panabang mao ang bisan unsa nga labing maayo alang kanato. Sa uban tingali aron sa paglig-on kanato, ug sa uban tingali aron sa paghatag kanato og hingpit nga kalipay samtang kita nakigbisog pinaagi sa hugot nga pagtuo.
Alang kanatong tanan, ang panabang nga labing gikinahanglan nato samtang kita gisulayan, sa bisan unsa nga mga paagi ug bisan unsa ka taas, mao ang madasigong hugot nga pagtuo kang Jesukristo. Kadtong hugot nga pagtuo ang nakapahimo ni Jose sa paghubad sa mga damgo didto sa Ehipto. Usa ka tinuod nga hugot nga pagtuo kang Jesukristo ang nakapadasig ug nakapalig-on ni Moises sa iyang malisod nga buluhaton sa pagtabang sa Ginoo sa pagpalingkawas sa Iyang katawhan.
Sa inyong kabatan-on, kamo nasulayan na sa malisod nga mga panahon, sama nako. Apan sama nako, kamo natudloan sa pagsalig ni Jesukristo. Nakaamgo ko karon ngano nga ako mibati sa pagkamalaumon ug gani hingpit nga kalipay sa dihang batan-on pa ko. Dili sa ingon nga ako nagpaabot nga ang mga panahon mahimong mas maayo o mas sayon. Mibati lamang ako og pagsalig nga kon ako mosalig ug moserbisyo Kaniya, ang tanan sa bisan unsang paagi mamaayo ra.
Ang akong lola mihangyo sa akong amahan nga mokanta uban kaniya padulong sa pagpauli sa balay gikan gisultihan nga siya mamatay na sa dili madugayt tungod sa kanser: “Kon mamatay tas atong pagpanaw, … Maayo rang tanan! Maayo rang tanan!”3 Ako mohatag sa akong pagsaksi nga ang nabanhaw nga si Jesukristo nasayod unsaon pagtabang ang matag usa kanato, bisan unsa pa ang atong mga pagsulay. Kinahanglan lamang kita nga mangayo uban ang hugot nga pagtuo diha Kaniya.
Si Jesukristo nahigugma kaninyo ug motabang kaninyo, sa tanang panahon, ug sumala sa unsay labing maayo alang kaninyo. Ako mopamatuod, uban sa gugma alang kaninyo, ug alang Kaniya, sa ngalan ni Jesukristo, amen.