“Sa Cagayan, Pilipnas,” Alang sa Kalig-on sa mga Kabatan-onan, Mar. 2022.
Giunsa Namo sa Pagsimba
Sa Cagayan, Pilipinas
Litrato gikan sa Getty Images
Magandang araw! Kamusta?
(Kana nagpasabot “Maayong adlaw! Kamusta?” sa Tagalog.)
Ang akong ngalan mao si Agravaine L.
Gikan ko sa usa ka gamay nga lungsod sa Cagayan sa Pilipinas. Nagpuyo ko uban sa akong lola sa tuhod ug lolo sa tuhod, sa akong lola, sa akong mama, ug sa akong duha ka mga igsoong babaye. Oo, kami aduna gayuy usa ka dako nga pamilya! Komon ra kaayo kana dinhi sa Pilipinas. Ang mga Pilipino nahibaloan nga adunay lig-on nga relasyon sa pamilya. Kana ang akong paborito nga bahin mahitungod sa pagpakabuhi dinhi. Ang tropiko nga panahon usa lang ka bonus!
Ang akong paborito nga mga kalingawan mao ang pagbasa sa mga magasin ug pagpaminaw sa mga podcast ug makabayaw nga musika. Ganahan usab ko nga magsulat og mga sulat para sa akong kaugalingon, sa akong bana, ug sa akong mga anak sa umaabot!
Pagtuon ug Pagpaambit
Ang akong paborito nga bahin mahitungod sa akong pagkamiyembro sa Ang Simbahan ni Jesukristo sa mga Santos sa Ulahing mga Adlaw mao ang kahibalo nga ako anaa sa tinuod nga Simbahan ni Kristo. Ganahan ko mobisita sa templo, mopaambit sa ebanghelyo, ug moadto sa seminary uban sa akong mga higala. Nakat-on ko og daghan kaayo gikan niining tanan nga mga kasinatian.
Nakigbisog ako usahay sa paglahutay hangtod sa kataposan. Apan akong gipaningkamotan pag-ayo ang pagtuon sa akong mga kasulatan matag gabii. Ang Dali, Sunod Kanako daghan og natabang sa akong personal nga pagtuon! Ganahan usab ako magbasa og mga istorya gikan sa ubang kabatan-onan diha sa mga magasin sa Simbahan. Naggamit ko sa Gospel Library nga app aron ako adunay makabayaw nga mga mensahe sa akong bulsa, bisan asa man ako.
Kadaghanan sa akong mga higala sa eskwelahan mga miyembro sa Simbahan. Naghunahuna ko sa una nga ako walay bisan unsa nga oportunidad sa pagpaambit sa ebanghelyo. Apan akong nakat-onan nga ang pagpaambit sa ebanghelyo dili kinahanglan uban sa mga tawo nga gikan sa laing mga tinuohan. Ganahan ko mopaambit sa akong pagpamatuod uban sa akong suod nga higala sa eskwelahan, ug siya usa usab ka miyembro!
Ang Igpapahulay
Ang among balay layo gikan sa gambalay [building] sa Simbahan, mao nga ang akong igsoong babaye ug ako kinahanglang magplano daan aron makaabot sa among mga miting sa saktong oras (o sayo, hinaot pa)!
Momata mi og alas 4:00 sa buntag ug molakaw padulong sa balay sa akong tiya, nga padulong ngadto sa gambalay [building] sa Simbahan. Mag-ilis mi sa among pang-uran nga mga sinina ngadto sa among mga sinina pangsimba. Dayon molakaw kami pag-usab og laing 30 ka minuto aron makaabot ngadto sa gambalay sa Simbahan (o usahay mga 25 ka minuto kon kami molakaw og paspas gayod). Tungod kay mangandam kami daan alang sa ma-Dominggo, wala pa gayod kami sukad maulahi! Bitaw, hapit wala gayod. Ang dalan lapok kaayo kon mag-ulan. Usa ka higayon nga nag-ulan og kusog nga ako nalubong sa lapok ug dili na makalihok!
Apan maayo ra ang tanan kon moabot na mi sa simbahan. Mobati ko og kalinaw ug hingpit nga kalipay mahitungod sa ebanghelyo ug sa pagsabwag sa malipayong mga balita sa atong Manluluwas. Ganahan ko nga mopaambit sa akong pagpamatuod matag miting alang sa pagpuasa ug pagpamatuod! Ang akong mga klase sa Sunday School nindot usab nga dapit sa pagpaambit sa akong nakat-onan mahitungod sa ebanghelyo ni Jesukristo ug makat-on usab gikansa uban.