Ang Tema ug Ako

Kabatan-onan nagpaambit kon giunsa nila sa pagsunod ang mga pulong sa mga Tema sa Young Women ug sa Aaronic Priesthood Quorum

Mas Magpaduol Ngadto sa Dios

“Sa tibuok kong kasingkasing, gahom, hunahuna, ug kusog, Ako mohigugma sa Dios, ug motuman sa akong mga pakigsaad.”

Ni Rakshit Lohat

Ang akong igsoong lalaki ang unang sakop sa akong pamilya nga mipasakop sa Simbahan. Siya usa ka talagsaong ehemplo ngari kanako. Pipila ka tuig human siya mabunyagi, ang akong tibuok pamilya misugod sa pagpaminaw sa mga misyonaryo. Mihukom ko sa pagpasakop sa Simbahan tungod sa akong nahibaloan nga si Jesukristo tinuod ug kini mao ang Iyang tinuod nga Simbahan. Human ko mabunyagi, gibati nako nga daw natawo ako pag-usab sa bag-ong kinabuhi. Misaad ako sa Dios nga ako motuman sa Iyang mga sugo. Kon kita gusto nga makabalik ngadto sa Langitnong Amahan, kita kinahanglan nga mosunod sa Iyang mga sugo.

Ang Espiritu Santo motabang kanato sa pagtuman sa mga sugo, sama sa pagtuman sa atong mga ginikanan. Ganahan kong makig-bisikleta uban sa akong mga higala. Ang akong mga ginikanan nagsulti kanako nga dili mopalayo kaayo, apan ang akong mga higala mipadayon sa pag-adto sa layo. Usa ka higayon ang akong mga higala midapit kanako sa pagkuyog moadto sa layo, apan mibati ko nga dili ko angay nga moadto. Ang akong mga higala mibiya ug usa nila naangol. Sa kataposan OK ra siya, apan nalipay ko nga naminaw sa Espiritu ug mituman sa akong mga ginikanan.

Naningkamot ko nga mobati nga duol sa Dios sa matag adlaw. Ang mga kasulatan nagtabang kanako sa pagbuhat unsa ang matarong. Ang akong pamilya naningkamot nga magkadungan sa pag-ampo matag adlaw. Ganahan usab ko nga mopintura ug magdrowing. Ganahan ko nga modrowing sa Manluluwas. Gusto nako Siya nga kanunayng mag-uban kanako.

Nasayod ko nga ang Langitnong Amahan nahigugma kanako, ug ako nahigugma Kaniya. Ang Langitnong Amahan mipanalangin kanako og maayo, gusto ko nga magmisyon. Gusto ko nga magtudlo sa uban mahitungod sa Langitnong Amahan ug kon unsa ang Iyang gihimo alang kanato.

Kita mahimong mobati og kalipay gikan sa ebanghelyo, ug kita usab makapaambit sa uban.

Ang tagsulat nagpuyo sa New Delhi, India.