Pumili

Ginuyugoy ni Josue dagiti taona nga agaramid iti umno a pili—a sumurot iti Apo

pumili

Ti kabaelantayo nga agpili ken agtignay para iti bagbagitayo ket maawagan iti kinawaya nga agpili. Daytoy ti napateg a paset ti plano ti Nailangitan nga Ama. Ti panangipakita a pilitentayo a suroten dagiti bilbilin ti Dios tapno ad-adda a makapagbalintayo a kas Kenkuana ket maysa kadagiti panggep daytoy a biag. Maukomtayto a maibatay kadagiti pilitayo. (Kitaen iti 2 Nephi 2:27; Doktrina ken Katulagan 101:78; Abraham 3:25.)

daytoy nga aldaw

Ginuyugoy ni Josue dagiti taona nga agpili iti “daytoy nga aldaw,” wenno itan. Makaaramidtayo kadagiti napapateg a pili iti maminsan ket kalpasanna ikarigatantayo ti agtalinaed a managkumit kadagitoy. (Kitaen iti Salmo 37:5.)

agserbi

Iti daytoy a bersikulo, ti agserbi kaipapananna ti agdaydayaw, tumulong, agtungpal, ken ipaaymo ti bagim iti maysa a tao. Nasken nga agserbitayo iti Apo (kitaen iti Moises 1:15).

dagiti dios

Nabilin ni Israel nga agserbi laeng iti pudno ken sibibag a Dios, ni Jesucristo (kitaen iti Exodo 20:2–5). Nangted ni Josue kadagiti pagarigan ti dadduma pay a dios a nasken a saan a pagrukbaban dagiti taona. Dagiti dadduma pay a dios iti biagtayo ket mabalin a mangiraman dagiti sanikua, dagiti kapanunotan dagiti dadduma, dadduma pay nga interes—ania man a banag a mangyadayo kadatayo iti Dios.

siak ken ti balayko

Nagsao ni Josue para iti bagina ken iti sangakabbalayanna. Kinunana nga agserbida iti Apo. Tinarigagayanna nga idauluan ti pamiliana a sililinteg ken suruan ida a mangsurot iti Apo (kitaen iti Doktrina ken Katulagan 93:40).

© 2022 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, June 2022. Ilokano. 18315 864