“Tampeļ eo im Iaļ eo Am̧ n̄an Indeeo,” N̄an Kōkajoorļo̧k Jodikdik ro, Juļae 2022.
Tampeļ eo im Iaļ eo Am̧ n̄an Indeeo
Eļap ad jeraam̧m̧an bwe jej bōk tōl ilo m̧weo im̧ōn Irooj.
Pija jān Noel Maglaque
Kwoj pād ilo juon iaļ. Ekar ijjinoe ilo juon iien aetok emootļo̧k ke kwaar mour im jokwe ippān Jemedwōj Ilan̄ āinwōt ļaddik im leddik jetōb ro Nejin. Kiiō kwoj pād ilo laļ in ippān jetōb eo am̧ enuknuk kōn juon ānbwin kanniōk n̄an ekkatak aolep men ko remenin aikuj n̄an bar jepļaak juon iien n̄an ippān Jemedwōj Ilan̄ im mour erreeo kōn aolepān kōjeraam̧m̧an ko ekar kōpooji n̄an ajri ro Nejin. Jet iaan kōjeraam̧m̧an kein reļļap kwonaaj ekkatak ilo iaļ in n̄an indeeo rej pād ilo tampeļ ko an Kabun̄ eo an Jisōs Kraist im Armej ro Rekwojarjar ilo Raan Ko Āliktata.
Tampeļ ko ipeļaakin Laļ in
Ke ikar ļotak ilo 1928, ekar wōr jiljilimjuon tampeļ ko. Kiiō ewōr tampeļ ko raiboojoj rejeplōklōk ipeļaakin laļ in. Im enaaj bar lōn̄ļo̧k! Tampeļ ko rej boktok lan̄lōn̄ im kajoor eo jej aikuji n̄an iaļ eo ad n̄an indeeo.
Ejjeļo̧k bar juon em̧ ioon laļ in—men̄e em̧ ko reļļaptata—ejjeļo̧k ippāer ta eo ewōr ilo tampeļ ko. Rilo̧mo̧o̧r eo ekar ba n̄an Pita bwe enaaj kar leļo̧k kajoor im mālim eo bwe “jabdewōt men eo kwō naaj liāpe ioon laḷ, naaj liāpe i lan̄; im jabdewōt men eo kwō naaj kōtḷọk ioon laḷ, naaj kōtḷọke i lan̄” (Matu 16:19). Men eo ej juon unin kōnono eļap! Tampeļ ko rej aji im kōjenolo̧ki kōn kajoor eo an priesthood eo āinwōt juon jikin n̄an kōm̧m̧ani kain̄i ko rekwojarjar. Kain̄i kein rej jim̧ōr jerbal ilo jim̧ōr rejet ko an rōn̄ōl eo.
Lan̄lōn̄ eo an Baam̧le ko n̄an Indeeo
Kōrā eo pāleeō, Barbara, ekar mej emān iiō ko remootļo̧k. Ak kōnke kōm kar deļo̧n̄e m̧weo im̧ōn Irooj im kar liāp āinwōt ļeo im lieo pālele kōn kajoor eo an priesthood eo, kom̧ro kar liāp ippān doon ippān ajri ro nejūm jiljilimjuon, 43 jibūm̧im, im ilōn̄in 100 jibūn jibūm̧ ajri ro, im n̄an aolep indeeo. Tampeļ eo ej juon men eļap an aiboojoj! Lan̄lōn̄ ej kobrak būruwō kōnke baam̧le eo aō enaaj ippān doon n̄an indeeo. Im barānwōt baam̧le eo am̧.
N̄e kwonaaj tōpar iiō e aō, eban wōr am̧ kōņaan bwe en ļap jāān ippem̧ ak kattōre juon wa kipeel. Men eo aorōktata ilo mour eo am̧ ej baam̧le eo am̧—ejjab wōt baam̧le eo am̧ ijin ak barāinwōt baam̧le eo am̧ ilo mour indeeo.
Kajoor in Mool eo Em̧ōj an Jepļaaktok
Kwojeļā wōn kwe—juon ļaddik ak leddik nejin Anij kōn aorōkin ejjeļo̧k jon̄an. Kwojeļā kwoj itok jān ia, kwojeļā kwoj ta ijin, im kwojeļā ta eo enaaj waļo̧k ilo mour eo tok juon.
Ej ļo̧kjen aō bwe m̧ool kein rekar itok āinwōt juon tōprak eļap kōn juon ļaddik jidikdik eo ekar bukwelōlō im jar ilo bukwin wōjke ko. Jemān im Nejin rekar waļo̧k n̄an Josep Smith im, jidik kōn jidik, kōjeraam̧m̧an ko an gospel in rekar bar jepļaaktok.
Ewōr juon aō en̄jake ekajoor in kam̧oolol n̄an Josep Smith. Meļeļe eo ad em̧ōj ad bar bōke kōn karōk in lo̧mo̧o̧o̧r, ej dilep in Pinmuur eo an JIsōs Kraist, im baam̧le aorōk eo indeeo an baam̧le ko im tampeļ ko rekar aolep ijjino ippān. Jenaaj wōnm̧aanļo̧k wōt im kalōke tampeļ ko im kōjjeļāik ko rekāāl, ilo an ennaan eo ej wōnm̧aanļo̧k wōt an Jepļaaktok eo enaaj kalipopoiki laļ in.
Mool ko em̧ōj aer jepļaaktok, eļaptata m̧ool ko jej ekkatak kōn kain̄i ko an tampeļ, rej kwaļo̧k jon̄an aorōk in mour in im letok n̄an kōj kajoor n̄an jipan̄ kōj ilo iaļ eo ad n̄an indeeo.
Kōm̧m̧an bwe Tampeļ eo en M̧ōttan Mour eo Am̧
Emaron̄ pen n̄an eok n̄an ļōmņak bwe juon men komaron̄ kōm̧m̧ane rainin enaaj kōm̧m̧an eļap oktak elōn̄ iiō jān kiio ak aaet ālkin mour in. Bōtaab keememej iaļ eo n̄an indeeo kwoj pād ie. Ke kwaar peptaij im kappen, kwoj bōk bun̄tōn ko raorōk ilo iaļ in.
Komaron̄ jipan̄ ro rekar mej wōnm̧aanļo̧k ilo iaļ in jibadōk eo aer ilo am̧ kōm̧m̧āne peptaij ko im kapen ko n̄an er ilo tampeļ. Ikar kōm̧m̧ane menin elōn̄ kōttan ke ikar pād ilo iiō ņe am̧. Ij keememej juon iien ikar peptaij kōn 60 armej ro. Ebwe aō kar ikkijeļo̧k ikōtaan peptaij ko!
N̄e ewōr am̧ iien n̄an etal n̄an tampeļ, kōm̧m̧ane! En emakijkij am̧ etal ekkar n̄an am̧ maron̄. Jouj jab lokjak kōn men ko me remaron̄ ko̧kkure iien ko am̧ im bōk mejam̧ jān ta eo em̧ool im ej n̄an indeeo. M̄en̄e kwoj jokwe ettoļo̧k jān juon tampeļ, mije wōt im kōpooj eok make kiiō n̄an am̧ erreeo n̄an dreļo̧n̄e tampel.
Kōppopo Kiiō n̄an Kōjeraam̧m̧an ko Am̧ ilo Tampeļ
Juon iaan kain̄i ko m̧oktata an tampeļ kwoj bōke n̄an kwe make ej menin letok kwojarjar eo. Menin ej juon menin letok an kajoor eo an priesthood n̄an aolep ajri ro nejin Anij. Jej bōk kajoor in ilo ad bōk kain̄i ko im kōjparok bujen ko jej kōm̧m̧ani ilo Tampeļ eo kajjojo raan in mour ko ad.
Komaron̄ kōbpopo n̄an menin letok kwojarjar eo am̧ im kain̄i ko jet an tampeļ jān am̧ kejōkļo̧kijeņ, im ekkatak kōn tampeļ. Eļan̄n̄e ro jinōm̧ im jem̧ōm̧ ak jibūm̧ im jim̧aam̧ em̧ōj aer pād ilo tampeļ, ekōnono ippāer kōn an juon kōjeraam̧m̧an eļap. Bisop eo am̧ im ritōl ro jet renaaj barāinwōt jipan̄ eok. Ij barāinwōt kōjatdikdik bwe kwonaaj elolo m̧ōttam̧ ro renaaj rie eok. Kwonaaj barāinwōt kam̧m̧oolol n̄e raan eo enaj itok n̄an eok n̄an etal n̄an tampeļ im kwoj pojak n̄an bōk aolep kallim̧ūr ko reļļap im kōjeraam̧m̧an ko Irooj ekōņaan lewaj n̄an eok.
Kraist Ej Katakin Rikaļoor Ro An, jān Justin Kunz
Iaļ in Jibadōk in Ej Wōnm̧aanļo̧k wōt
Unin mour in ej n̄an kōpooj kōj make n̄an eo tok juon. Karōk eo eļap an Jemedwōj Ilan̄ ejjab bōjrak ilo mej, kōn jetōb ko ad rejjāmin mej. Ej etal wōt n̄an laļ eo an jetōb n̄an wōnm̧aanļo̧k wōt n̄an ekkatak, jerbal, im kōttar Jerkakpeje eo. Bwe, jabdewōt bukwe enaaj bukwelōlō n̄an Eō, jabdewōt lo enaaj kwaļo̧k bwe Jisōs ej RiKraist eo (lale Aiseia 45:23). Kōn Pinmuur eo im Jerkakpeje eo, ānbwinid im jetōb ko ad renaaj bar ippān doon im iaļ in jibadōk eo ad enaaj wōnm̧aanļo̧k wōt n̄an mour indeeo. Enaaj juon kōjeraam̧m̧an eļap n̄an kōjwōj aolep!
N̄e men otemjeļo̧k kar dedeļo̧k, aolep men ko an indeeo im aorōkin mijeļo̧k mour eo im mijen eo an Jisōs Kraist. Jeļāļo̧kijeņ eo am̧ im tōmak eo am̧ ilo E enaaj ļapļo̧k ilo am̧ jerbal ilo tampeļ. Kwonaaj en̄jake iakwe eo An indeeo n̄an eok im en̄jake lan̄lōn̄ im kajoor ilo jetōb ilo aolepān mour eo am̧.