“Walay Laing Tawo nga Sama Kanimo,” Alang sa Kalig-on sa mga Kabatan-onan, Hulyo 2022.
Dali, Sunod Kanako
Ester
Walay Laing Tawo nga Sama Kanimo
Ang Ginoo miandam ni Ester alang sa iyang importante nga buluhaton, ug gibuhat usab Niya kini alang kanimo.
Pagbuhat og bisan unsa karon dayon. Bisan unsa gayod! Ikapay-kapay ang imong mga bukton ibabaw sa imong ulo, pagtuyok-tuyok, o isinggit ang pipila ka binuang nga mga pulong sama sa, “Ganahan ko og banana bread!”
Humana? Maayo. Nakahimo ka og usa ka butang nga wala pa gayod mabuhat kaniadto. Ingon nga kini katingad-an kaayo paminawon, bisan unsa ang imong bag-o lang nga gibuhat—bisan kon naghunahuna lang ka og usa ka butang apan wala kini gibuhat—wala pa gayod kini mabuhat nga sama gayod nga paagi sa tibuok kasaysayan. Dili kon hain ka, dili niining tukma nga panahon, ug dili pinaagi kanimo.
Kining gamay nga pasiaw nga kalihokan naghatag og gibug-aton sa usa ka importante nga punto: walay laing tawo nga eksaktong sama kanimo, ni sa imong eksaktong sama nga mga kahimtang. Dili bisan gani ang imong mga igsoon. Sa tibuok kalibotan, walay laing tawo ang aduna sa imong tukma nga kombinasyon sa mga talento, mga abilidad, mga panaghigalaay, pamilya, espirituhanong mga gasa, ug personal nga mga panglantaw.
Sama ni Ester gikan sa Daang Tugon, talagsaon kang kwalipikado atol “sa usa ka panahon nga sama niini” (Ester 4:14) nga makahimo og dako nga epekto alang sa kaayohan diha sa mga kinabuhi sa tanang tawo nga imong nailhan.
Aduna kay importante nga mga butang nga pagabuhaton!
Gikan sa Ilo [Orphan] ngadto sa Pagka Harianon
Samtang imong tun-an ang Daang Tugon niini nga bulan isip kabahin sa Dali, Sunod Kanako, imong makat-onan ang mahitungod sa usa ka talagsaon nga batan-on nga Judio nga babaye nga ginganlan og Ester. Sa usa ka punto sa iyang batan-on nga kinabuhi, nahimong ilo si Ester ug gipadako sa usa ka paryente, si Mardoqueo. Midako siya sa usa ka panahon sa dihang ang mga Judio gibihag sa usa ka langyaw nga nasod.
Isip usa ka nailo nga batang babaye nga nagpuyo sa usa ka langyaw nga yuta, lagmit gayod nga wala siya maghunahuna nga ugma damlag mahimo siyang usa ka rayna. Apan mao gayod kana ang unsay nahitabo (tan-awa sa Ester 2). Napili siya isip pangasaw-onon sa hari, si Ahasuero.
Apan usa ka adlaw nag-atubang siya og makalilisang nga hagit: ang katawhan ni Ester, ang mga Judio, anaa sa kalit nga kakuyaw nga pamatyon. Ang iyang bana, ang hari, human maminaw sa tambag sa iyang mga tigtambag, mipagawas og mando nga patyon ang matag Judio sa siyudad sa usa ka piho nga petsa nga iyang gisulti.
Karon, adunay daghang nagpuyo nga mga tawo diha sa siyudad. Adunay daghang mga Judio nga nagpuyo usab diha sa siyudad. Apan anaay usa lang ka Rayna Ester. Ug siya lamang ang tawo nga makabuhat og bisan unsa sa paghunong niini nga katalagman.
Sama lang ni Rayna Ester, adunay usa lang nga ikaw. Ikaw lamang ang tawo nga makabuhat sa mga butang nga imong mahimo—mga butang nga gikinahanglan sa Ginoo nga imong buhaton. Mga butang nga mosangpot sa kaluwasan sa daghang tawo.
Mga Tubag sa mga Pag-ampo
Maayo gani nga wala kaayoy kalagmitan nga mag-atubang ka og butang nga ingon ka peligro ug makahadlok sa unsay giatubang ni Ester. Apan wala kana magpasabot nga menos ang kaimportante sa imong katuyoan sa kinabuhi.
Sama lang ni Ester, gigiyahan ka ug giandam nga mahimong kon si kinsa ka karon. Ug kana nga pagpangandam magpadayon samtang mosunod ka ni Jesukristo. Mahimo kang tubag sa daghang inadlaw nga mga pag-ampo sa mga tawo.
Siyempre, bisan sa imong tanang talento ug mga abilidad, kanunayng labing maayo nga mangayo og espirituhanon nga tabang samtang magpadayon sama sa gibuhat ni Ester.
Hugot nga Pagtuo, Kombiksiyon, ug Ikaw
Nasayod si Ester nga kinahanglan niyang mosulay ug moluwas sa iyang katawhan. Nasayod usab siya nga gikinahanglan niya ang dugang nga hugot nga pagtuo ug suporta sa iyang katawhan samtang nagtinguha siya og tabang gikan sa Dios. “Lakaw ug tigoma ang tanang Judio sa Susa. Pagpuasa ug pag-ampo kamo alang kanako,” miingon si Ester ngadto sa iyang paryente, “Ayaw pagkaon ug pag-inom sa bisan unsa sulod sa tulo ka adlaw ug tulo ka gabii. Mao usab kini ang buhaton ko ug sa akong mga sulugoong babaye. Human niana, moadto ako sa hari bisan kon kini supak sa balaod. Kon mamatay ako tungod sa pagbuhat niini, mamatay ako” (Ester 4:16).
Ester, ni James L. Johnson
Kon mahimong lisod ang kinabuhi, ang matinud-anon mas madasigon pang modangop sa Dios. Gikinahanglan ni Ester ang tanang tabang nga iyang makuha. Dili lang nga nagkinahanglan siya og tabang sa pagkombinser sa iyang bana nga ikanselar ang mando, apan gikinahanglan usab niyang irisgo ang iyang kaugalingon nga kinabuhi pinaagi lang sa pag-adto sa hari nga wala gipatawag og una (nga supak sa balaod, bisan alang sa rayna).
Nakakita ba ka sa iyang kombiksiyon ug hugot nga pagtuo? Angayan kining basahon sa ikaduhang higayon: “Kon mamatay ako tungod sa pagbuhat niini, mamatay ako,” miingon si Ester. Ang maong gamhanan nga mga pulong susamang giingon ni Sadrac, Mesac, ug Abednego ngadto ni Haring Nabucodonosor sa dihang midumili sila sa pagsimba sa bulawang imahe sa hari.
Bisan kon mihulga siya sa pagtambog kanila diha sa hudno tungod sa pagsupak maisogon silang miingon, “Kon kabubut-on sa Dios, luwason kami niya gikan sa nagdilaab nga hudno ug sa imong gahom.
“Apan kon dili iyang kabubut-on, hibaw-i nga dili usab kami moalagad sa imong mga dios o mosimba sa estatuwa nga bulawan nga imong gipabuhat” (Daniel 3:17–18).
“Apan kon dili iyang kabubut-on” ug “Kon mamatay ako tungod sa pagbuhat niini, mamatay ako” mga talagsaon nga mga pamahayag sa hugot nga pagtuo. Kini nga matang sa gamhanan nga hugot nga pagtuo anaa bisan unsa pa ang mga sangpotanan. Ang kaisog ni Ester misangpot sa pagluwas sa iyang katawhan! Bisan pa man, nasayod siya sa sinugdanan, sama nila ni Sadrac, Mesac, ug Abednego, nga samtang ang mga resulta sa pagpili sa hugot nga pagtuo dili kanunayng segurado, ang pagbuhat sa husto nga butang kanunayng mao ang husto nga pagpili.
Lagmit nga magkaanaa ka og mga higayon sa imong kaugalingon nga kinabuhi nga mahimong lisod ang pagpili sa matarong nga agianan. Walay usa kanato ang luwas gikan sa gubot nga mga pagsulay sa mortalidad. Apan dinhi usab mahimo kang mopili nga mahimong sama ni Ester. Pilia ang pagkamatarong; tugoti nga mosunod ang mga sangpotanan.
Sa kataposan, ikaw lamang ang bugtong ikaw nga maanaa gayod—ug ang imong “usa ka panahon” nga himoong mas maayo nga dapit ang kalibotan mao mismo karon.