“Kōbpojak n̄an Dubai Tampeļ,” N̄an Kōkajoorļo̧k Jodikdik ro, Juļae 2022.
Kōbpojak n̄an Dubai Tampeļ
Jodikdik ro ilo Dubai im Qatar rej kwaļo̧k aer iakwe n̄an tampeļ eo im aer m̧ōņōņō kōn eo ej ekkal im epake er.
Pija ko in Saajan jān Carla Nacario
Jejjo wōt naan reddik, ak rekar ukōt mour e aō ke rekar diwōj tok jān lon̄iin juon rikanaan an Anij. Ilo iien kweilo̧k eo eļap, membōr ro ilo Kabun̄ in ipeļaakin laļ in rej kijooror in ron̄jake kōjjeļā in tampeļ kāāl ko. Im n̄an Sajaan im Gwen, Būreejtōn Russell M. Nelson ekar ba naan kein, “Dubai, United Arab Emirates,” ilo Eprōl 2020 kweilo̧k eo eļap, jodikdik rein ruo rekar jeļā bwe mour ko aerro renaaj oktak.1
Jeļā kajjeen Saajan jān Dubai
Jon̄oulruo iiō drettan Saan ejjan̄in kar elolo tampeļ kōn mejen.
“Jinō ekar baj wōt wōr an kōttōpar n̄an etal n̄an tampeļ,” Saajan ekar ba. “Iakwe eo an n̄an tampeļ ekar kōpopo. Kiiō kōttōpar eo aō ilo mour in ej n̄an loļo̧k tampeļ eo.“
Saajan ekar ļotak ilo India, ak ro jinen im jemen rekar jepel, ekar em̧m̧akūtļo̧k ippān jinen n̄an United Arab Emirates. “Jinō ekar ļap an kate jerbal. Ej āinwōt juon aō rilo̧mo̧o̧r. Men̄e ilo iien ko reppen, ekar jab ebbweer.”
Jinen Saanjan im jibūn rekar kobatok ilo Kabun̄ in ilo India jejjo iiō m̧okta jān an kar ļotak. Raar riiti Bok in Mormon eo im kar jeļā bwe ekar juon uaakin jar ko aer. Saajan ekar rūttoļok ilo Kabun̄ in ippān jinen, im ej kab m̧ōj an peptaij ālikin an kar kōttar uaak eo jān jemān.
“Kāālet n̄an peptaij ekar juon iaan kāālet ko rem̧m̧antata ikar kōm̧m̧ane,” ekar ba. “Im ke ikar bōke menin letok eo an Jetōb Kwojarjar, ikar en̄jake juon en̄jake okmeenen im lan̄lōn̄ itulowa.”
Kiiō Saajan ej jaketo jaketak kwojkwoj eo n̄an ward eo an im ej kōpopo n̄an dreļo̧n̄e tampeļ eo. Ej kab m̧ōj an bōk pepa in mālim n̄an deļo̧n̄e tampeļ eo an, im elikkuun kijooror n̄an dreļo̧n̄e Dubai United Arab Emriates Tampel n̄e ededeļo̧k.
“Ke ikar ron̄ aer kōjjeļā kōn tampeļ eo, ikar en̄jake ippa make bwe ekar n̄an eō,” Saajan ekar ba. “Ekar juon uaak n̄an jar ko am. Iaar ilbōk kōnke ekar kalōke ilo ijo kōm ej jokwe ie! Inaaj maron̄ iuwe ilo train eo ej kajjuļo̧k n̄an tampeļ eo im emaron̄ emakijkij aō etal jon̄an wōt aō kōņaan. Ij barāinwōt kijōrjōr kōn Bengaluru India Tampeļ bwe jibū im jim̧m̧aō renaaj maron̄ naaj loļo̧k.”
Sajaan elikkuun kijooror bwe jibun im jim̧m̧aan ren ipaake Bengaluru India Tampeļ.
Saajan ekōņaan kōm̧m̧āne jerbal ko ilo tampeļ n̄an ro nukun etto barāinwōt.
“Ij kōpooj eō make bwe in maron̄ erreo n̄an dreļo̧n̄e tampeļ. Ikōņaan kōm̧m̧ane ta eo imaron̄ kōm̧m̧ane n̄an jipan̄ aolep ro nuku etto. Ewōr juon iien eo em̧m̧an im ekalimomo n̄an eō n̄an jerbal n̄an Irooj im kōm̧m̧ane men ko an aelōn̄ in kiin̄ eo an Anij.
Jeļā Kajjeen Gwen jān Qatar
Pija ko pijaan Christina Smith im jouj eo an baam̧le eo an
Ilo iiō ko 18 jinountata in mour eo an, Gwen ekar mour ilo ļalem laļ ko reoktak: Scotland, Angola, England, Kazakhstan, im Qatar. Jerbal eo an jemān ekar bōke ipeļaakin laļ in, ak eo kiiō, n̄an Middle East.
Ajri ro jein Gwen em̧ōj aer diwōjļo̧k, kōn menin ej jokwe ilo Qatar ippān jinen im jeman. Juon iaan en̄jake ko rem̧m̧antata ippān ej ke ekar etal ippān jodikdik ro ilo ward eo an n̄an juon tūreep an tampeļ n̄an Kiev Ukraine Tampeļ. Ejjeļo̧k juon tampeļ eipaak, kōn menin Armej ro Rekwojarjar ilo Middle East rej aikuj kelo̧k n̄an loļo̧k tampeļ ko ilo laļ ko jet.
“Ikar kijooror n̄an tūreep eo am, im ikar kōņaan bōk et ko etan baam̧le,” ekar ba. “Aolep raan ij elolo etan baam̧le ilo taļeboon eo aō ilo iaļ eo aō ļak im itok jān jikin jikuuļ. Ikar loe 200 et ko. Ikar pojak n̄an etal!”
Bōtaab ewōr juon būraabļōm̧ eo ekar jab maron̄ kōpopo n̄ane.
Juon ajeded in nan̄inmej peļaakin laļ in
Baļuun eo waan Gwen ekar jok ilo Ukraine ilo Maaj ilo 2020—ke rekar jinoe ļaplo̧k aer ron̄ kōn ajeeded in kūj eo an COVID-19. Kōn jipan̄ jān lan̄, rekar tōprakļok tampeļ eo im kar maron̄ kōm̧m̧ani peptaij ko n̄an et ko etan baam̧le Gwen ekar kōpooji.
“Ekar wōr kabwilōn̄lōn̄ ālikin kabwilōn̄ ālikin kabwilōn̄lōn̄,” ekar ba. “Ilo iaļ eo amim n̄an tampeļ eo, ikar inepata kōn ajeeded in nan̄inmej eo. Bōtaab ilo tampeļ ikar en̄jake eļap ainem̧m̧an im kajoor. Im kōm ekar maron̄ keļo̧k in ro̧o̧l n̄an Qatar m̧okta jān an kar kilōk border ko.”
Bōtaab jinen Qwen eo ekar loļo̧k juon iaan ro jein Qwen ilo Amedka, ekar jab maron̄ ro̧o̧l n̄an Qatar. Gwen im jemān rekar pād wōt lowaan m̧weo im̧weer ke jemān ekar bōk COVID. “Ilo ium̧win jidik iien ke ekar likkuun nan̄inmej im ekar jab maron̄ ļap an em̧akūtkūt,” Gwen ekar ba. “Ikar en̄jake aō ajimakeke. Jinō ekar jako wōt, im ikar jaje kilen kōm̧m̧an m̧ōn̄ā ijjeļo̧kin wōt grilled cheese sandwich.”
Bōtaab Gwen ekar wōr juon an en̄jake aurōk ippān ilo an kōm̧m̧an jar ilo m̧we ippān jemān.
“Kar en̄jake bwe armej ro im jekar bōk et ko etāer n̄an tampeļ rekar pād ippa im jema,” ekar ba. “Ekar jako ad ajimakeke. Ekar juon en̄jake eo em̧m̧an. Loļo̧k tampeļ eo m̧okta jān ajeeded in nan̄inmej eo ekar juon kōjeram̧m̧ān.”
Dubai United Arab Emirats Tampeļ eo kar kōjjeļļā kake juon allōn̄ ālikin tūreep in tampeļ eo an n̄an Ukraine. Gwen ekar lukkuun m̧ōņōņō! Im ejeļā eo jon̄an naaj aurōk in n̄an armej ro ilo eria eo an.
“Ijeļā bwe ewōr armej ilo eria eo aō ro rejjab maron̄e n̄an keļo̧k n̄an juon bar tampeļ ilo Europe. Eto aer kōttar n̄an liap āinwōt baam̧le ko n̄an indeeo. Ej kwaļo̧k n̄an eō bwe aintok eo ej likkuun bōk jikin. Jej kōpooj iaļ eo n̄an an Kraist bar jepļaaktok.”
Kōjeram̧m̧an ko an Tampeļ
Juon men ejjelo̧k oktak kōn Gwen im Saajan ej bwe tampeļ eo em̧ōj an jino kōjeram̧m̧an mour ko aer. Būreejtōn Nelson ekar ba: “Tampeļ ko rej m̧ōttan ko reļļap ilo Jepļaaktok eo an tarlep in gospel eo an Jisōs Kraist. Kōn em̧m̧an im tūriam̧o an Anij, E ej boktok im kepaake tok kōjeraam̧m̧an ko an tampeļ n̄an ajri ro Nejin ijoko jabdewōt.”2