“Kajoor eo Ekabwilōn̄lōn̄ kōn Kam̧m̧oolol,” N̄an Kōkajoorļo̧k Jodikdik ro, Juļae 2022.
Kajoor eo Ekabwilōn̄lōn̄ kōn Kam̧m̧oolol
Ejjab em̧m̧an wōt bwe kwon kam̧oolol—emaron̄ ukōt mour eo am̧.
Būreejtōn Russell M. Nelson eaar ba: “bwini kōjeram̧m̧an ko em̧m̧anļo̧k jān bwini būraabļōm̧ ko ad. … [Kam̧m̧oolol] ej letok n̄an kōj juon laleļo̧k eo em̧m̧anļo̧k kōn lukkuun unin im lan̄lōn̄ in mour in.”1
Ej m̧ool! Kam̧m̧oolol ej boktok elōn̄ kōjeraam̧m̧an ko. Kam̧m̧oolol emaron̄ jipan̄ eok m̧ōņōņōļo̧k im ājmourļo̧k, kōkm̧anm̧anļo̧k am̧ kiki, kōkajoorļo̧k kōļmenļo̧kijeņ eo am̧, im ājmour ilo ānbwin, im jipan̄ eok kajoor ilo ļōmņak im ļap meanwōd n̄an ro jet. N̄e eļapļo̧k am̧ kam̧m̧oolol, enaaj em̧m̧anļo̧k am̧ kōjebwebweik idajon̄jon̄ ko an mour in. Likkuun m̧ool, kam̧oolol emaron̄ keipaakļo̧k eok n̄an Anij, eo ej un jen men otemjej (lale Jemes 1:17).
N̄an Ester Carneiro Ponciano jān Brazil, jeiki juon laajrak in ta eo ej kam̧m̧oolol kake ej kam̧ōņōņōiki im jipan̄ e bōk kajoor im peran ilo iien ko reppen.
Laajrak in Kam̧m̧oolol eo an Ester
1 Gospel eo
Kōmeļeļe ko jān Emily Davis
Ilo ao ekkatak jeje ko rekwojarjar, jar aolep raan, etal n̄an jeminere, im etal n̄an jar, ij bōk im̧we n̄an kajjeon̄ n̄an em̧m̧anļo̧k. Gospel in ej boktok kōjatdikdik bwe raan ko rem̧m̧anļo̧k rej itok wōt. Em̧ool ej letok m̧ōņōņō indeeo.
2 Baam̧le eo Aō
Ewōr jiljino armej ilo baam̧le eo aō, im m̧we im̧ōm obrak. Kōmij joļo̧k iien ippān doon ikkure kōn borrd game ko, etetal inam̧ōj, kōmat, im ekkatak, Itok, Ļoor Eō. Baam̧le eo aō ej aō jikin kone. Ijjab āliklik n̄e ij pād ippāer. Kōmij jab wāppen, ak kōm m̧ōņōņō. Ij kam̧m̧oolol kōn armej ro imaron̄ lōke er iien otemjej.
3 Ro Jerad
Jekdoon juon nan̄inmej ajedeed ekar jab maron̄ rubwe jemjera ko aō rem̧ool. N̄e kōmijjab maron̄ ippān doon ilo armej, kōmij elolo wōt wāween ko n̄an ippān doon. Em̧m̧an ippemim ettōn̄ im al ippān doon. Ij iakwe iien kōm̧m̧ao ippān ro jerad. Ij kam̧m̧oolol kōn kajjojo iaer.
4 Kāājemourur
Jidik iien emootļo̧k, kājemourur eban kar pād ilo laajrak in kam̧oolol eo aō. Ikar jab itok limoiū ilo kājemourur. Akō ikar kajjeon̄ baajkōļ im kar jeļā bwe ekar em̧m̧an ippa. N̄e ij baajkōl, ij m̧ōņōņō. Ij en̄jake bwe laļ eo ipeļaakū ej juon jikin em̧m̧an. Ej kōm̧m̧an menin aō ļōmņak, kalimjōk menin kōm̧anm̧an ko, im en̄jake iakwe eo an Jemedwōj Ilan̄. N̄e ij inepata ak būrom̧ōj, ejipan̄ kainōm̧m̧an eō. N̄e ij baajkōļ, imaron̄ loe taujin un ko n̄an m̧ōņōņō im kam̧m̧oolol.
5 Al ko
Al ej boktok n̄an eō m̧ōņōņō eo eļap. Mour e aō eban kar āinwōt in n̄e enkar ejjeļo̧k al. Em̧m̧an ippa al im ron̄jak jān ke ikar dik. Ewōr kajoor in al n̄an ļōn̄aj kōj, im emaron̄ barāinwōt kainōm̧m̧an kōj. Em̧m̧an ippa ron̄jake al ko an Jodikdik ilo Kabun̄ in.
Kam̧m̧oolol ej Boktok Eļap Lan̄lōn̄
Ilo aō kalimjōkļo̧k mour e aō kōn mejen kam̧m̧oolol, ij loe wāween an Irooj pād aolep iien ilo mour e aō, men̄e ekar waļo̧k men ko reppen. Em̧ōj aō kiiō kile bwe men ko reļam waantata remaron̄ boktok n̄an kōj m̧ōņōņō eo eļaptata. N̄e kwoj kalimjōk ipeļaakūm̧ im loe ta eo elikkuun aurōktata, komaron̄ bar āinwōt loe lan̄lōn̄ em̧ool.
Ta eo Kwoj Kam̧m̧oolol Kake?
Men eo ekōjak in kōn kōm̧m̧ane juon laajrak in kam̧m̧ool ej bwe n̄e em̧ōj am jinoe, epen n̄an bōjrak. Kajjeon̄ e! Bōk jidik iien n̄an je laajrak in kam̧oolol eo am̧ make. Ļōmņak kōn wāween am̧ maron̄ kwaļo̧k am̧ kam̧m̧oolol n̄an Jemedwōj Ilan̄ im ro jet kōn menin letok kein. Komaron̄ lo bwe jon̄an lōn̄ļo̧k men ko kwoj jeiki, enaaj ļapļo̧k men ko kwoj ļōmņak n̄an kam̧m̧ooolol kaki.