Unin Tōl eo im N̄a

Jodikdik ro rej kwaļo̧k ekōjkan aer mour kōn naan ko an Unin Tōl ko an Doulul eo an Jiron̄ ro im Doulul eo an Priesthood eo an Aron

Ijeļā Inaaj Bar Loe E

“Inaaj ekkar n̄an bōk kōjeram̧m̧an ko an tampeļ im lan̄lōn̄ eo ejjeļo̧k jem̧ļo̧kin an gospel in.”

Jān Joshua Llamas

Ij tōmak Irooj ekar letok n̄an kōj baam̧le bwe jen maron̄ jipan̄ kōkajoor im rie doon. Irooj ekar barāinwōt letok ad baam̧le bwe jen jab make iaad. Bōtaab ke jema ekar mej, ikar en̄jaake aō ajimakeke. Kom̧ro jema elikkuun epaake doon, im ekar jako jān ippa waanjon̄o̧k eo an ejjab oktak. Ikar en̄jake bwe men eo wōt imaron̄ kōm̧man ej jan̄.

Bōtaab juon bon̄, ikar kāālet n̄an jar. Ilo būruo ikar en̄jake an Jetōb jiron̄ eō bwe ikar jab make iaō. Ijeļā karōk in lo̧mo̧o̧r eo. Kōn Pinmuur eo an Jisōs Kraist, inaaj bar loe. Jeļāļo̧kijeņ eo bwe baam̧le ko remaron̄ bar ippān doon n̄an indeeo ej juon men eļap an aorōk ippa. Im ijeļā bwe jemaron̄ erom̧ juon baam̧le indeeo kōnke ro jinō im jema rekar liāp ilo tampeļ.

Ke ekar 12 aō iiō, ikar kōm̧m̧an aō karōk n̄an etal n̄an tampeļ eo n̄an kōm̧m̧ani peptaij ko n̄an ro remej ij kab nej tōn kōm̧m̧ane. Bōtaab tampeļ ko rekar kilōk kōn ajeeded in nan̄imej eo. N̄aij erreim̧aanļo̧k wōt n̄an aō nej kab tōn deļo̧n̄e tampeļ eo im en̄jake lan̄lōn̄ eo ie.

Ke ļaddik eo jeiū ekar liāp ippān kōrā eo pāleen, ikar pād nam̧ōjen tampeļ eo. Ak men̄e ekar jān nam̧ōjen, ikar en̄jake juon en̄jake aiboojoj ilo būruwō. Ikar pijaik ilo kōļmenļokijeņ kōn en̄jake eo ilowaan. Baam̧le eo aō rekar ba n̄an eō bwe tampeļ eo ej juon jikin eo jemaron̄ m̧ōņōņō kōn karōk eo ewāppen Anij ekar kōpooj n̄an kōj.

Ikar bar ekkatak jān katak ko an rikanaan ro bwe imaron̄ kōm̧m̧ani bujen ko rekwojarjar ilo tampeļ. Aolep bujen ko jej kōm̧m̧ani ilo tampeļ remenin aikuj im aorōk. Em̧ōj aō bōk pepa in mālim n̄an deļo̧n̄e tampeļ, im ilukkuun kijooror in kōjerbale. Im ijeļā bwe juon raan inaaj liāp ippān kōrā eo pāleeō ilju im jakļaj, enaaj wōr aō baam̧le n̄an indeeo.

Rijeje eo ej jokwe ilo Culiacan, Mexico.