Itok, Ļoor Eō

Jabōn Kōnnaan Ko; Ekklisisatis; Aiseia

Jisōs Kraist Emaron̄ …

Jān David A. Edwards

Māākjiin ko an Kabun̄ in

Mool ko rekar jeje taujin iiō emootļo̧k ej katakin kwe ta eo Irooj emaron̄ kōm̧m̧ane n̄an kwe rainin.

Eo ej Unjen Tōmak, jān J. Alan Barrett

Ejjeļo̧k jemļo̧kin m̧ool eo jān Anij. Menin ej kōn jeļāļo̧kjeņ eo “kōn men ko āinwōt aer lukkuun waļo̧k, im kōn men ko āinwōt aer naaj waļo̧k” (Jekab 4:13).

Mool ko jeje taujin iiō ko remootļo̧k ilo Kallim̧ur Mokta rej m̧ool wōt rainin. Im jet iaer rejjipan̄ eok n̄an lo ta eo Irooj emaron̄ kōm̧m̧ane n̄an kwe rainin. Erkein jet m̧ool ko jān bok in Jabōn Kōnnaan Ko, Ekklisiastis, im Aiseia (ko konaaj katak kaki ilo allōn̄ in). Rej kwaļo̧k n̄an eok bwe Jisōs Kraist emaron̄ …

Tōl Iaļ ko Am

Ilo iien ko, jej en̄jake ad pok, jabwābwe, ak aikuj eo tōl. N̄e kwoj leļo̧k n̄an Irooj aolepen am lōke, ettā, im kam̧m̧oolol, “enaaj ba kajjien iaḷ ko aṃ” (lale Jabōn Kōnnaan Ko 3:5–6).

N̄e kwoj kōjparok kien ko An, E “ej tōl eok ilo iaḷ eo eṃṃan kwōn etal ie” im kōm̧m̧an “aenōṃṃan … enaaj kar āinwōt juon river” (Aiseia 48:17–18).

Ioone Rilo̧mo̧o̧r eo, jān Jen Tolman

Lewaj Am̧ Elmakot

M̧wil im wāween mour ko ilo laļin remaron̄ kipeel im kalimomo. Ak katak ko an Jisōs Kraist remaron̄ jipan̄ eok lo ewi wāween an ejjeļo̧k kobban im an laļin jidik wōt iien.

Aolep men “eṃōj kōṃṃani iuṃwin aḷ … rej men pata, āinwōt kañ kōto” (Ekklisiastis 1:14). Ilo bar jet naan, wāween eo an laļin ej boktok illu. Ej āinwōt n̄e jej kipele kōto im kajjieon̄ n̄an dāpiji. Mōņōņō ej itok n̄e jej leļo̧k ad nōbar im kauteij n̄an Anij im kōjparok kien ko An (lale Ekklisiastis 12:13).

Elōn̄ armej ilo laļin “rej ṇa etan nana eṃṃan, im eṃṃan ñan nana; … im likūt marok āinwōt meram, im meram āinwōt marok; … likūt meọ āinwōt tōñal, im tōñal āinwōt meọ” (Aiseia 5:20). Ak Irooj ej kwaļo̧k n̄an kōj m̧ool eo. N̄an loore ial eo An im naan eo An, jemaron̄ “diwōjḷọk kōn ṃōṇōṇō, im naaj āñinḷọk koṃ kōn aenōṃṃan” (lale Aiseia 55:8–12).

(Lale barāinwōt Aiseia 40:6–8; 51:7–8.)

Jeo̧rļo̧k Jerawiwi ko Am

Aoleped jej kōm̧m̧an bwōd. Aoleped emōj ad jerawiwi. Ak n̄e jej ukweļo̧k im niknik n̄an kōjparok kien ko an Anij, Jisōs Kraist emaron̄ kōm̧m̧an bwe jān erreeo im bar erreeo “Enaaj tūriaṃo kake [kōj]; … bwe enaaj kanooj wūjlep in joḷọk bōd” (Aiseia 55:7). Ekar ba:

“Meñe bōd ko ami rej āinwōt būrōrō, renaaj mouj āinwōt sno; meñe re būrōrō in wōt juon būrōrō eḷap an eddo, renaaj āinwōt kooḷan sip” (Aiseia 1:18).

“Ña, im Ña wōt, Eo ej jeor bōd ko aṃ kōn Ña make … im I jāmin keememej jerọwiwi ko aṃ” (Aiseia 43:25).

Pija jān Mark Mabry

Kōkajoorļo̧k Kwe

Jej aolep en̄jake m̧ojņo̧ ak eddodo jet iien. Jisōs Kraist emaron̄ lewaj n̄an kwe kajoor. “Jeova ñan indeeo juon dekā ñan indeeo.” (Aiseia 26:4). N̄e kwoj ettā im lōke E, E emaron̄ jipan̄ kwe eļļā ioon kapo, kōm̧m̧ane kālet ko repen, ak etal wōt jekdoon men ko repen. Ekar ba:

“Kwon jab mijak; bwe N̄a ippam̧: kwōn jab lōļn̄o̧n̄; bwe N̄a am̧ Anij: Inaaj kōkajoor eok; aaet, Inaaj jipan̄ eok” (Aiseia 41:10).

Jamin Meļo̧kļo̧k Eok

Rilo̧mo̧o̧r Jisōs Kraist ekar kaarmejette e make ñan kwe kōnke E ej iakwe Jemedwōj Ilan̄—im kōnke E ej iakwe kwe. En̄taan eo An ekar kōm̧m̧an bwe en maron̄ bwe kwōn jerkakpeje im wōr am iien n̄an erom̧ Jemedwōj Ilan̄. E lukkuun ban etal jān kwe im meļo̧kļo̧k kwe. Ekar ba:

“Juon kōrā e maroñ ke meḷọkḷọk niñniñ eo nejin … ? Aet rein re maroñ in meḷọkḷọk, a I jāmin meḷọkḷọk eok.

“Lo, eṃōj Aō je etaṃ ilo lọpiden Peiū” (Aiseia 49:15–16).

Kōnke E kar kōm̧m̧an eļap n̄an kōj im eban meļo̧kļo̧k kōj, kōj, barāinwōt, aikuj niknik n̄an “keememej E iien otemjej” (Katak im Bujen Ko 20:77, 79).