“Motabang ug Mangita sa Maayo,” Alang sa Kalig-on sa Kabatan-onan, Sept. 2022.
Tabang sa Kinabuhi
Motabang ug Mangita sa Maayo
Managlahi kitang tanan, kitang tanan mga anak sa Dios, ug talagsaon kana!
Litrato gikan sa Getty Images
Hunahunaa ang pagpuyo og usa ka kalibotan diin ang tanan nga painting pinintalan lang og blue, tanan nga pagkaon parehas ra og lami, ug ang tanang kanta usa ra ka nota. Wa ko kahibalo ninyo, apan sa akong pagtuo kana labihan ka puol!
Ang panaglahi sa art, sa lami, ug musika maghimo sa kalibotan nga walay kinutobang kaanindot ug katahom. Sa samang paagi, ang katawhan managlahi og mga kaagi, mga gituohan, mga panagway, mga nasyonalidad, kaliwatan, ug mga kasinatian nga maghimo sa kalibotan nga talagsaon.
Gikan sa batan-ong edad, nagpuyo ko sa Arabia, sa dako nga Islamic nga bahin sa kalibotan, sulod sa daghang katuigan. Usa ka bahin niana nga panahon, nag-eskwela ko og boarding school sa England. Niining duha ka kahimtang, sa Arabia ug England, nakasugat ko og daghan nga lain-laing mga tawo. Sa sinugdanan lisod ang makig-uban sa ingon ka nagkadaiyang katawhan nga lahi kaayo sa akong kaugalingon. Apan sa kadugayan, nakakat-on ko pinaagi sa kasinatian nga kadaghanan sa mga panaglahi maayo, gani, talagsaon! Ang akong kinabuhi milambo sa hilabihan pinaagi sa pakig-interaksiyon sa mga tawo nga lainlain og mga kultura ug mga gituohan sa daghang bahin sa kalibotan.
Aniay pipila ka butang nga akong nakat-onan nga makatabang ninyo sa pagtahod ug pagsabot niadtong lahi kay kaninyo.
Mangita sa Maayo
Usahay ang maayo diha sa mga tawo tingali dili dayon mailhan, apan makatingala kon sa unsang paagi atong makita ang maayo kon kita mangita niini uban sa gugma ug kalooy. Kon imong buhaton, maabli ang imong kasingkasing ngadto sa pagkat-on gikan sa uban.
Makatabang ang paghinumdom nga ang mga tawo molihok sa mga paagi nga dili ninyo masabtan tungod kay sila tingali nasakitan. Hapit tanan mibati nga dali rang maapektohan o nanglimbasog sa pipila ka butang. Tingali kamo mibati usab niini. Kon inyo kining masabtan, mas sayon ang pagpangita og maayo diha sa uban tungod kay mas masabtan ninyo nganong ang mga tawo ingon gayod niana. Dayon makapangita kamo og mga paagi sa pagtabang ug pagpanalangin kanila.
Aktibo nga Maminaw
Ang dalan alang sa pagtahod ug pagsabot magsugod kon kita maminaw—maminaw gayod—sa uban. Isip mga miyembro sa Ang Simbahan ni Jesukristo sa mga Santos sa Ulahing mga Adlaw, sa kasagaran dali ra kitang makapaambit sa ebanghelyo, ug maayo kana nga butang! Human sa tanan, ang ebanghelyo ni Jesukristo mao ang pinakamahimayaon ug mahangturon nga gasa nga atong ikapaambit. Apan usahay mopaambit kita sa atong mga gituohan ngadto sa uban nga wala pa nato masabti ang bisan unsa mahitungod kanila. Kinahanglan nga aktibo kitang maminaw sa uban ug magkat-on gikan kanila. Atong mapalapdan ang atong panabot bahin sa—ug pagdayeg alang sa—tanan nga atong mahimamat.
Pangitaa ang Butang nga Magkaparehas Kamo
Atol sa bag-o lang nga pagbisita didto sa Arabian Gulf, nakahimamat ko og daghang tawo kinsa mga lahi kaayo kay kanako. Apan dihang sila akong nailhan, akong nahibaloan nga ang tinubdan sa among mga gituohan dili ingon kadako og kalainan. Nadasig ko sa among mga pagkasusama.
Usa ka butang nga akong nakita nga kami magkasusama mao ang tinguha sa pagtabang sa mga refugee kinsa wala na sa ilang balay ug naangol tungod sa kasungian. Ang pagkakita niana nga pagkaparehas labihan kaanindot. Nagmaya ako bahin niini ug mibati og dako nga gugma alang sa mga tawo nga akong nahimamat.
Dihang nakita na namo ang among pagkapoparehas, naghisgot na kami mahitungod sa mga kalahian, ingon man sa poparehas namo nga mga mithi, inubanan sa tinuoray nga interes sa pagkat-on mahitungod sa usag usa. Kini nga kasinatian nagpahinumdom nako nga ang maayong mga tawo bisan asa nga dapit naningkamot sa paghimo og maayo sumala sa ilang mga gituohan.
Pagmapaniiron
Usa sa labing maayong paagi sa pakig-interaksyon sa uban mao ang pagpaniid ug pagpangita og paagi nga makasugod og usa ka pag-istoryahanay. Sama pananglit, kon nakabantay kamo nga dunay tawo nga nindot kaayo og bisikleta, ingna, “Wow, ganahan ko sa imong bisikleta!” dayon pangutan-a sila mahitungod niini.
Ang usa ka yanong pangutana sama sa “Kumusta ang imong adlaw?” makatabang ninyo sa pagkonektar ngadto sa uban. Tingali dili ka komportable sa sinugdanan. Magkinahanglan kini og praktis, apan makalingaw kon kamo dunay nindot nga mga kasinatian bahin niini.
Tan-awa ug Kopyaha ang Pamaagi sa Uban
Ang Manluluwas nakahimamat og daghang tawo gikan sa ubang kultura. Giadto usab niya ang mga tawo kinsa gilikayan sa uban. Mitipas Siya sa Iyang giagian aron masugat ang masakiton ug ang sinalikway. Nakigsulti Siya kanila, ug Siya miayo kanila.
Kon gamiton nato ang Iyang walay hinakog nga paagi, ang kalibotan mas moanindot nga dapit. Tabangi ang uban sa dinagko o ginagmay nga paagi. Pagpadala og nindot nga text, pagpaambit og makaon, ilakip ang usa ka tawo nga napasagdan sa uban. Ang mabination nga mga buhat sama niini makatabang ninyo nga makakonektar sa inyong palibot. Sa makatingala nga paagi, kini nga mga buhat maghimo kanatong mobati usab og mas maayo.
Ayaw Palabya
Ang ikaduhang dako nga sugo mao ang “higugmaa ang imong silingan” (Mateo 22:39). Hinumdomi nga kitang tanan mga anak sa Dios. Ang akong panan-aw sa kalibotan molapad ug mahimo kong mas maayo kon makahimamat ko sa uban—sa akong mga silingan—kinsa lahi kanako. Ayaw palabya unsay pwede ninyong makat-onan gikan sa uban.
Kon kamo motabang ug magkat-on sa paghigugma ug pagrespeto sa mga panaglahi sa matag usa sa inyong palibot, matingala kamo kon unsa ka sanag ug ka talagsaon ang kalibotan.