“Tānaki ʻi Heʻene Māmá: Fakaʻehiʻehi mei he Nofo Pōpulá,” Ki Hono Fakamālohia ʻo e Toʻu Tupú, ʻOkatopa 2022.
Tānaki ʻi Heʻene Māmá: Fakaʻehiʻehi mei he Nofo Pōpulá
ʻI hoʻo moʻui angatonú, he ʻikai ngata pē ʻi hoʻo hao mei he pōpula ki he filí, ka te ke hoko foki ko ha sīpinga ʻo e ʻamanaki leleí mo e māmá ki he niʻihi kehé.
Ngaahi tā fakatātā ʻa Maggie Stephenson
Kuo tau ongoʻi tuenoa kotoa ʻi ha taimi ʻe taha pe ko ha taimi kehe. Ko hono moʻoní, mahalo naʻá ke ongoʻi tuenoa kimuí ni mai. Ka ko e meʻa fakaʻofoʻofa fekauʻaki mo e ongoongoleleí, ko e fē pē ha feituʻu ʻokú ke ʻi ai, te ke kei lava pē ʻo ongoʻi ʻokú ke kau ki ai. ʻE lava pē ke moʻoni ʻeni neongo kapau ʻoku tokosiʻi pē ha kāingalotu ʻo e Siasí ʻoku ofi atú.
Naʻe nofo homau fāmilí ʻi ha taʻu ʻe 33 ʻi Seni Felenisisikou, Penisula ʻi he ʻIunaiteti Siteití. ʻOku ʻikai ke u tui au naʻe ʻi ai ha taimi naʻe toe ʻi ai ai ha mēmipa kehe ʻe tokolahi ange ʻi he toko tahá ʻi he ngaahi kalasi ʻa ʻema fānaú ʻi he akoʻanga māʻolungá.
Ka neongo ia, ʻi he ngaahi taʻu ko iá, naʻá ma ʻiloʻi kuo tānaki fakataha kimautolu ʻe he ʻEikí ko ha konga ʻo e fale ʻo ʻIsilelí. Naʻá ma ongoʻi ʻokú ma kau ʻi heʻema moʻui ʻaki e ongoongoleleí. Hangē ko e lea ʻa Palesiteni Lāsolo M. Nalesoní, ko e tānakí “ʻoku ʻikai ko ha feituʻu pē; ka ko ha tukupā fakafoʻituitui. ʻE lava ke ‘ʻomi ʻa [e kakaí] ki he ʻilo ʻo e ʻEikí’ [3 Nīfai 20:13] ʻo ʻikai ke nau mavahe mei honau fonua tupuʻangá.”1
ʻI hoʻo moʻui ʻaki e ongoongoleleí, ʻokú ke tānaki ai koe ki he ʻEikí. ʻI hoʻo fai ho fatongiá ke tānaki mai e niʻihi kehé ki he ongoongoleleí, ʻokú ke ikunaʻi ai e ngāue mahuʻinga ʻo e tokoni ki he ʻEikí ʻi hono tānaki ʻo ʻIsilelí.
Hao mei he Nofo Pōpulá mo e Taʻe-māʻoniʻoní
ʻI heʻetau tānaki kitautolu kia Kalaisi ʻaki ʻetau muimui ki Heʻene ngaahi akonakí, ʻoku tau aʻusia ai ʻa e tauʻatāina mo e fiemālie ko e ongoongoleleí pē ʻoku maʻu aí—ʻoku tau maʻu ʻa e tauʻatāina ke maʻu fakahā fakatāutahá mo e tauʻatāina ke aʻusia ʻa e tuʻunga ʻoku finangalo e Tamai Hēvaní ke tau aʻusiá. ʻE lava ke iku e moʻui taʻe-māʻoniʻoní ki he pōpulá mo e ngaahi fakangatangatá, fakatuʻasino mo fakalaumālie fakatouʻosi.2 ʻI heʻetau tokoni ʻi hono tānaki hotau kaungāmeʻá mo e niʻihi ʻoku tau ʻofa aí ki he ongoongoleleí, kau ai hono tokoniʻi kinautolu ke fakahoko mo tauhi e ngaahi fuakava toputapu mo e ʻOtuá, te tau lava ʻo tokoniʻi kinautolu ke nau tauʻatāina mei ha faʻahinga pōpula lahi.
ʻOku fakatātaaʻi ʻe ha hiva ʻoku ou manako ai ʻa e tefitoʻi moʻoni ʻo e pōpula fakalaumālie mo fakatuʻasinó. Naʻe mālieʻia ʻa Kīsepi Veti heʻene kei talavoú ʻi he palōfita ko Selemaia ʻo e Fuakava Motuʻá. ʻI he taʻu 1842, ʻi hono taʻu 28, naʻá ne faʻu ai ʻa e foʻi hiva ko e Nabucco, ko ha fakamatala kia Nepukanesa, ko e tuʻi ʻo Papiloné, ʻa ia naʻe moʻui lolotonga e kuonga ʻo Selemaiá.
ʻOku fakamatala ʻa e hiva ko ʻení ki hono ikunaʻi ʻo Selusalemá pea mo e pōpula mo e nofo pōpula ʻa e kau Siú, ʻa ia naʻe maʻu mei he moʻui taʻe-māʻoniʻoní (vakai, Selemaia 13:9–19). Ko eSaame 137 naʻá ne kamataʻi e fakakaukau ki he talanoa ongo mo fakalaumālie ʻa Veti ko e “Chorus of the Hebrew Slaves [Hiva ʻa e Kau Pōpula Hepeluú].” ʻOku ongo mālohi e ʻuluʻi fakamatala ʻo e sāmé ni ʻi heʻetau folofolá: “[Lolotonga e nofo pōpula ʻa e kau Siú ne nau tangi ʻi he veʻe vaitafe ʻo Papiloné—Koeʻuhí ko ʻenau mamahí, ne ʻikai ke nau toe fie hivaʻi e ngaahi hiva ʻo Saioné].”
Ne fakataumuʻa ʻa e ʻOtuá ke tauʻatāina ʻa e tangatá mo e fefiné ke fili ʻi he leleí pe koví. ʻI he hoko ʻa e ngaahi fili koví ko ha ʻulungaanga pau ʻo ha anga fakafonua pe puleʻangá, ʻoku ʻi ai ha ngaahi nunuʻa mamafa ʻi he moʻuí ni mo e moʻui kahaʻú fakatouʻosi. He ʻikai ngata ʻi he malava ke pōpula pe haʻisia e kakaí ki ha ngaahi meʻa fakatuʻutāmaki mo maʻunimaá ka ki ha ngaahi fakakaukau ʻoku fakatuʻutāmaki mo maʻunimā ʻoku nau tohoakiʻi atu mei he moʻui angatonú. ʻOku tau lava ʻo sio ki he meʻa ko iá ʻoku hoko ʻi hotau kuongá.
ʻOku totonu ke tau fai e meʻa kotoa te tau ala lavá ke fakaʻehiʻehi mei he angahala mo e angatuʻu ʻoku iku ki he pōpulá.3 ʻI heʻetau fai iá, ʻoku tau fakafeʻungaʻi ai kitautolu ki ha ueʻi fakalaumālie ʻi heʻetau tokoni ki he ʻEikí ʻi hono tānaki ʻEne kakai filí pea ʻi hono tānaki fakataha moʻoni ʻo ʻIsilelí.
ʻI hoʻo moʻui angatonú, he ʻikai ngata pē ʻi hoʻo hao mei he pōpula ki he filí, ka te ke hoko foki ko ha sīpinga ʻo e ʻamanaki leleí mo e māmá ki he niʻihi kehé.
Tuku Ke Ulo Hoʻo Māmá
ʻOku ʻi ai nai ha kaungāmeʻa pe ngaahi ʻofaʻanga ʻi hoʻo moʻuí ʻoku fonu ʻi he mamahí ʻo ʻikai ai ke nau lava ʻo hivaʻi e ngaahi hiva ʻo Saioné, pe ongoʻi ʻa e fiefia ʻo e ongoongoleleí?
Tatau ai pē pe ʻi homou ʻapí pe mo ha kau sola, ʻi he taimi ke vahevahe ai e ongoongoleleí, te ke lava ʻo hoko ko ha maama ngingila ʻi hoʻo tali mo moʻui ʻaki e maama ʻo e ongoongoleleí.4 Ka, kapau ʻoku ʻikai ʻiloʻi ʻe he kakaí ʻokú ke ʻofa ʻiate kinautolu, he ʻikai ke ke maʻu ʻa e ola tatau. Ko ia ai kuo pau ke tau feinga ke fakafonu maʻu pē kitautolu ʻaki ha ʻofa ki he niʻihi kehé. ʻI he taimi ʻokú ke fonu ai ʻi he ʻofa ki he fānau kotoa ʻa e Tamai Hēvaní, ʻe mamata ʻa e taha kotoa ki hoʻo māmá. ʻE lava ke lahi fau e ngaahi ola ʻe maʻu ʻe he maama ko ʻení ʻi he meʻa te ke fakatokangaʻí.
Te ke lava ʻo tohoakiʻi mai e niʻihi kehe te nau fakatokangaʻi koé mo hoʻo tōʻonga moʻuí, ʻi hoʻo moʻui tauʻatāiná pea ʻi hoʻo moʻui angatonú. ʻE tō heni ha ngaahi tenga taʻe-faʻa-laua ʻe ala maʻu ai ha fua lahi ʻi ha taimi.5 Kimuʻa ʻi hoʻo taʻu motuʻa feʻunga ke ngāue fakafaifekaú, te ke lava ʻo tokoni ʻi hono tō ʻo e ngaahi tengaʻi ʻakaú, fekumi ki he kakai filí, mo tānaki kinautolu kia Kalaisi.
Te ke lava ʻo kamata ʻaki hono fakatupulaki e ʻofa mo e maama ko ʻení ʻi ho ʻapí. ʻE lava ke hoko ʻeni ko ha ngāue taimi lōloa, ko ia kātaki ʻo ʻoua naʻá ke ongoʻi loto-foʻi ʻi he ngaahi fakakikihi fakafoʻituituí pe ngaahi fakakikihi ʻi ho fāmilí. ʻOku fie maʻu ʻa e ngāue taimi lōloá ke maʻu e fakaʻapaʻapa ʻi he taimi lōloá. Tuku ha taimi ke ngāue ai ki he ngaahi vā fetuʻutaki fakafāmilí. Te ke lava ʻo kamata ʻaki haʻo fakaʻapaʻapaʻi mo ako ke fakaʻehiʻehi mei he fakaangá.
ʻOku hoko ʻa e fakaangá ʻi he ʻapí ko ha meʻa kona te ne lava ʻo fakaʻauha ʻa e uouangatahá. Kapau ʻoku fai ʻe ha taha ha fehalaaki, hangē ko hono fakatooki ha meʻa-ngaohi-kai mei he tēpilé, ʻoku ʻikai fie maʻu ki ai ha fakatomala pe fakaanga. Ka, ko e meʻa pē ʻoku fie maʻú ko hono akoʻi fakalelei. Kuo pau ke tau ako ke fekātakiʻaki, ʻo tautautefito ʻi hotau ngaahi fāmilí. ʻOku ou tui kapau ʻe lava ke hoko ʻa e ʻapí ko e faʻahinga feituʻu ʻoku ʻikai ke ʻi ai e fakaangá, ʻe tupulaki leva ʻa e ʻofá.
Tānaki ʻi ha Founga Malu
Ko ia ai, ʻi he taimi ʻoku tau nofo pōpula aí, ʻoku fakangatangata leva ʻetau ngaahi tōʻongá. Ko e founga ke maʻu ai ʻa e tauʻatāiná mo e māmá mo e ʻofá, ko e malu ʻo e ongoongoleleí. ʻE lava ke tataki koe ʻe he nofo pōpula ʻi he angahalá ke ke ongoʻi ʻo hangē ʻoku ʻikai ke ke lava ʻo hivaʻi e ngaahi hiva ʻo Saioné. Ka ʻoku ʻatā maʻu pēʻa e fakatomalá. ʻE lava ke tānaki kitautolu ki he fale ʻo ʻIsilelí mo tokoniʻi e niʻihi kehé ke nau hao fakataha mo kitautolu.
ʻI he tukutaha hoʻo tokangá ki he ongoongoleleí, Fakamoʻuí, pea mo e temipalé, ʻokú ke fai ai pē ʻa e meʻa ʻoku fie maʻu ke ke faí. Te ke lava ʻo moʻui ʻi ha feituʻu pē he māmaní, naʻa mo ha kāingalotu tokosiʻi ʻo e Siasí, mo ke kei hoko pē ko ha konga ʻo e Siasí mo e puleʻangá pea mo e tānakí. ʻOku ʻikai te ke teitei tuēnoa ʻi he taimi ʻokú ke ʻi he fale ai ʻo ʻIsilelí.