ʻI Kalaiakani, Mekisikou

Mālō e Lelei, ko Teseleti au! Ko hoku taʻu 17 ʻeni, pea ʻoku toko fitu hoku fāmilí.

Lolotonga e mahaki fakaʻauha COVID-19, naʻe pau ke u kumi ha ngaahi meʻa foʻou ke fai. ʻOku ou vali, monomono mo tuitui ha vala, vali ngeʻesinima, fanongo mūsika, sio faiva, mo feohi mo hoku fāmilí. ʻOku ou ngaohi foki mo hoku fāmilí ha faʻahinga kehekehe ʻo e kahoá.

Ko ʻeku fineʻeikí ko ha faiako makehe. ʻI he lolotonga ʻo e taimi mālōlō he faʻahitaʻu māfaná, ʻoku ou tokoni kiate ia ʻi he fānau ʻokú ne akoʻí. ʻOku toe haʻaku taʻu ʻe taha ʻi he ako māʻolungá. Hili iá, ʻoku ou fie hoko ko ha setuata ʻi he puna fakavahaʻapuleʻangá pe hoko ko ha faiako makehe, ʻo hangē pē ko ʻeku faʻeé. ʻOku ou fie folau foki mo au.

Hoko ko ha Mēmipa ʻi Mekisikou

Naʻe faʻa feinga hoku ngaahi kaungāmeʻa ʻi he akó ke u fai pe lea ʻaki ha ngaahi meʻa ʻoku fepaki mo ʻeku ngaahi tuʻunga moʻuí, ka kuo nau ʻiloʻi ʻeni ko ha mēmipa au ʻo e Siasí pea mo e meʻa ʻoku ou taukaveʻí, ʻoku nau fakaʻapaʻapaʻi hoku ngaahi fakangatangatá.

ʻOku ou ʻiloʻi ʻi heʻeku feinga ke tauhi e ngaahi fekaú, ʻe fakahaohaoaʻi au ʻo fakafou ʻia Sīsū Kalaisi. ʻOku ʻomi ʻe heʻeku fakamoʻoní ha mālohi ke u kei hoko atu. ʻOku ou ʻilo ko ha ʻofefine au ʻo e ʻOtuá. Te u lava ʻo hoko ko ha faʻifaʻitakiʻanga pea tuʻu maʻu ʻi he meʻa ʻoku ou ʻiloʻi ʻoku moʻoní. ʻOku ou fiefia ke ʻilo te u lava ʻo tokoniʻi e niʻihi kehé ke nau ofi ange kia Kalaisi.

Ko e Temipale Hermosillo Mexico ʻa e temipale ofi taha kiate aú. Naʻá ku ongoʻi ha nonga lahi ʻi he fuofua taimi naʻá ku ʻaʻahi ai ki he temipalé mo ʻeku kulupu toʻu tupú. Kuo teʻeki ai ke u ongoʻi pehē kimuʻa.

ʻOku ou teuteu ke fai ha ngaahi fuakava ʻi he temipalé ʻaki ʻeku kau atu ki he ngaahi kalasi teuteu ki he temipalé ʻi ʻapi mo ako e ngaahi lēsoní.

ʻOku ou hoko mo hoku tokouá ko e palesiteni ʻi heʻemau ngaahi kalasi ʻi he Kau Finemuí. ʻI he taimi ʻoku mau fakataha fakahili uike ai ko ha toʻu tupú, ʻoku mau vahevahe e ngaahi meʻa ʻoku mau ako mei he Haʻu, ʻo Muimui ʻIate Aú. ʻOku ou ʻohovale ʻi he lahi ʻeku fiefia ke fanongo ki heʻenau ngaahi fakakaukaú mo vahevahe ʻeku fakakaukaú.

Teuteu Ki ha Ngāue Fakafaifekau

Naʻe fakatou ngāue fakafaifekau ʻeku ongomātuʻá ʻi Mekisikou. Talu ʻeku taʻu 15 mo ʻeku fie ʻalu ʻo ngāue fakafaifekau, ko ia ne u teuteu ai ke ngāue. ʻOku taʻu 18 hoku tehiná ʻi he hoko hoku taʻu 19, ko ia te ma fakahū leva ʻema pepa ngāue fakafaifekaú ʻi he taimi tatau. ʻOku ou fakahū ha paʻanga ki heʻeku ngāue fakafaifekaú ʻaki ʻeku ngāue mo ʻeku faʻeé. ʻOku ʻi ai haʻaku kiʻi hina siʻisiʻi ʻoku ou faʻo ai ʻeku paʻangá, pea ʻoku ou feinga ke fakafonu ia. ʻOku ou fie ʻomi ha kakai tokolahi ange kia Kalaisi mo Hono Siasí ke nau ʻomi ha lelei ki heʻenau moʻuí pea mo haʻakú.

Kuó u tuku atu e folofolá ʻo fakafou ʻi he mītia fakasōsialé. ʻOku ou toʻo e ngaahi lea mo e ngaahi kupuʻi lea mei he uepisaiti ʻa e Siasí ʻo ʻave kinautolu ki hoku ngaahi kaungāmeʻá ʻi he mītia fakasōsialé. ʻOku toe ʻomi foki ʻe he ongo faifekaú ha tatau ʻo e Tohi ʻa Molomoná, pea ʻoku ou saiʻia ke foaki ia ki hoku kaungāmeʻá.