Lig-on nga mga Pundasyon

Ang Akong Pakigbisog sa Kabalaka diha sa Simbahan

Paghulagway pinaagi ni Melissa Manwill

Kanunay ko nga adunay kabalaka. Sa dihang 17 pa ko, akong nabantayan nga kadaghanan sa akong mga kalit nga pag-atake sa kabalaka mahitabo diha sa simbahan.

Ako kanunay nga giingnan nga kon ako mobasa sa mga kasulatan, mosulti sa akong mga pag-ampo, ug moadto sa simbahan, magmalipayon ko. Nan, kana dili mao ang kaso nako. Malingaw ko sa unang pipila ka minuto sa simbahan, ug dayon mosugod na ang kalit nga pag-atake sa kahadlok.

Ang akong bishop mitabang nako nga makaamgo nga ang espiritwal nga mga gilaoman nga akong gitakda alang sa akong kaugalingon mahimong maoy hinungdan. Nagtuo ko nga ako kinahanglang adunay sama nga milagrosong espiritwal nga mga kasinatian nga akong nadunggan. Nasabtan nako nga kini nga kabalaka maoy hinungdan sa nagbalik-balik nako nga mga pag-atake.

Usa ka adlaw usa ka tawo nangutana nako, “Nganong mosimba man gihapon ka?” Nakalitan ko. Ngano man nga mosimba gihapon ko? Wala ko pugsa nga moadto. Wala ko makadawat og milagrosong mga panalangin. Apan nakaamgo ko nga nagpadayon ko sa pagsimba tungod kay ang Simbahan tinuod ug nga gusto sa Langitnong Amahan nga naa ko didto. Ang akong gugma Niya milabaw sa akong kagustohan nga makalingkawas gikan sa kabalaka.

Usahay gusto nako og dinalian nga mga panalangin gikan sa Langitnong Amahan. Nagtuo ko nga panalanginan ko Niya og mas menos nga mga atake sa kabalaka tungod lang kay nisimba ko. Apan nakat-onan nako nga dili kana ingon niana nga paagi. Kasagaran kinahanglan ko nga magpadayon bisan pa sa mga pag-atake ug moadto sa simbahan sa dili pa nako makita ang Iyang mga panalangin.

Karon nakaamgo ko nga kinahanglan usab ko nga mangayo og tabang gikan sa akong mga ginikanan ug sa medikal nga mga propesyonal. Aduna gihapon akoy dili maayo nga mga adlaw, apan wala kini magkontrol kanako. Kondili, kini nagtabang nako nga mapamatud-an sa akong Langitnong Amahan nga ako Siya nga gihigugma ug nga akong mabatokan kini nga pagsulay uban sa Iyang tabang.

Sa Tanaman sa Getsemani, si Jesukristo mihangyo kon pwede ba nga kuhaon ang Iyang pagsulay, apan diha sa hingpit nga pagsunod sa atong Langitnong Amahan, Siya mipadayon sa labing lisod nga pagsulay sa tanan. Tungod niini, nakahibalo ko nga Iya kong hatagan sa kalig-on nga makalahutay usab sa akong mga pagsulay.

Heidi L., Hawaii, USA