Ngaahi MakatuʻungaMālohí

Ko ʻEku Fefaʻuhi mo e Loto-Hohaʻá ʻi he Lotú

Tā fakatātā ʻa Melissa Manwill

Kuó u loto-hohaʻa maʻu pē. ʻI hoku taʻu 17, naʻá ku fakatokangaʻi ko e konga lahi ʻo ʻeku ngaahi puke ʻi he loto-hohaʻá naʻe hoko ia ʻi he lotú.

Naʻe talamai maʻu pē kiate au kapau te u lau e folofolá, fai ʻeku lotú, mo ʻalu ki he lotú, te u fiefia. Naʻe ʻikai hoko ia kiate au. Naʻá ku fiefia ʻi he ngaahi fuofua miniti ʻo e lotú, pea ʻe kamata leva haʻaku puke ʻi he loto-hohaʻá.

Naʻe tokoniʻi au ʻe heʻeku pīsopé ke u fakatokangaʻi mahalo ko e ngaahi fiemaʻu fakalaumālie naʻá ku fokotuʻu maʻakú ʻa e tupuʻangá. Ne u pehē kuo pau ke u maʻu e ngaahi aʻusia fakalaumālie fakaofo tatau mo ia ne u fanongo ki aí. Naʻe mahino kiate au ʻe lava ʻe he teke mālohi ko ʻení ʻo fakatupu ʻeku toutou puké.

Naʻe fehuʻi mai ʻe ha tokotaha ʻi ha ʻaho ʻe taha, “Ko e hā ʻokú ke kei ʻalu ai ki he lotú?” Naʻá ku fuʻu ʻohovale. Ko e ha ne u kei ʻalu ai ki he lotú? Naʻe ʻikai fakamālohiʻi au ke u ʻalu. Naʻe ʻikai ke u maʻu ha ngaahi tāpuaki fakaofo. Ka naʻá ku fakatokangaʻi naʻá ku kei ʻalú he naʻá ku ʻiloʻi naʻe moʻoni ʻa e Siasí pea naʻe finangalo ʻa e Tamai Hēvaní ke u ʻi ai. Naʻe hanga ʻe heʻeku ʻofa kiate Iá ʻo ikunaʻi ʻeku holi ke u tauʻatāina mei he loto-hohaʻá.

Taimi ʻe niʻihi naʻá ku fie maʻu ha ngaahi tāpuaki vave mei he Tamai Hēvaní. Naʻá ku fakakaukau te Ne tāpuakiʻi au ʻaki ha ngaahi puke siʻisiʻi ange koeʻuhí pē ko ʻeku ʻalu ki he lotú. Ka kuó u ako ʻoku ʻikai ke pehē ia. Kuo pau ke u faʻa kātakiʻi e ngaahi puké mo ʻalu ki he lotú kimuʻa peá u lava ʻo mamata ki Heʻene ngaahi tāpuakí.

Kuó u fakatokangaʻi ʻeni te u lava foki ʻo kole tokoni mei heʻeku ongomātuʻá mo e kau mataotao fakafaitoʻó. ʻOku kei ʻi ai pē hoku ngaahi ʻaho ʻoku ʻikai lelei, ka ʻoku ʻikai ke nau puleʻi au. ʻOku nau tokoniʻi au ke u fakamoʻoniʻi ki heʻeku Tamai Hēvaní ʻoku ou ʻofa ʻiate Ia pea te u ikunaʻi ʻa e faingataʻá ni ʻaki ʻEne tokoní.

Naʻe kole ʻe Sīsū Kalaisi ʻi he Ngoue ko Ketisemaní pe ʻe lava ke toʻo atu Hono faingataʻaʻiá, ka ʻi heʻene talangofua kakato ki heʻetau Tamai Hēvaní, naʻá Ne ikunaʻi ʻa e faingataʻa lahi tahá. Koeʻuhí ko e meʻá ni, ʻoku ou ʻilo te Ne foaki mai kiate au ʻa e mālohi ke kātakiʻi ʻaki foki hoku ngaahi ʻahiʻahí.

Heidi L., Hawaii, USA