Ko e Kaveingá mo Au

Ko e vahevahe ʻe he toʻu tupú ʻa e founga ʻoku nau moʻui ʻaki ai e ngaahi lea ʻo e Ongo Kaveinga ʻa e Kau Finemuí mo e Kōlomu ʻo e Lakanga Taulaʻeiki Faka-ʻĒloné

Ko Hono Fokotuʻu ʻo ha ʻApi FakalangiAngé

Fai ʻe Marcello Pires

“Te u teuteu ke hoko ko ha … husepāniti mateaki, mo ha tamai angaʻofa ʻaki ʻeku hoko ko ha ākonga moʻoni ʻa Kalaisí.”

ʻI heʻeku moʻui ʻaki e ongoongoleleí, ʻoku ou ako ai ke tokoni ki he niʻihi kehé—tautautefito ʻi ʻapi. Ko e taimi ʻoku ou tokoni ai ki heʻeku faʻeé, ʻokú ne ongoʻi fiemālie ange, pea ʻoku maʻamaʻa ange ʻa e ngāue fakaʻapí kiate ia.

ʻOku talamai maʻu pē ʻe heʻeku faʻeé ke mau tauhi ke maau e falé. ʻE lava pē ke faingataʻa ʻeni ʻi ha ʻapi ko e toko fitu ʻoku ʻi aí, ka ʻi he taimi ʻoku nofo ai ʻi ha fale ʻoku maau mo maʻá, ʻoku mau lava ʻo ongoʻi ofi ange ai ki he ʻOtuá.

ʻOku akoʻi ʻe he kau palōfitá ko hotau ʻapí ʻa e feituʻu lelei taha ke tau ako ai fekauʻaki mo e ongoongoleleí. ʻOku mau faʻa ako fakafāmili maʻu pē ʻa e folofolá. ʻOku faingataʻa he taimi ʻe niʻihi, ka ʻoku mau lava pē ʻo ako. ʻOku tokoni ʻeni ke ʻi homau ʻapí ʻa e Laumālié pea ʻe lava ke tokoni ia ke mau matuʻuaki e ngaahi ʻohofi ʻoku fai ʻe he māmaní ʻi he ngaahi fāmilí.

Ko e meʻa ʻe taha ʻokú ne fakamālohia moʻoni homau fāmilí ko hono fakahoko fakataha e ngaahi ʻekitivitií. ʻE lava pē ko ha fanga kiʻi meʻa faingofua hangē ko e tangutu ʻi tuʻa ʻi homau ʻapí ke talanoa pe ʻalu ke maʻu ha meʻatokoni maʻamaʻa. ʻI he taimi ʻoku mau fai ai ʻení, ʻoku ongoʻi fiefia ʻa e tokotaha kotoa pē, pea toe mālohi ange homau ngaahi vā fetuʻutakí.

Kuó u ako ko ha fatongia maʻongoʻonga ia ke te hoko ko ha tokotaha maʻu lakanga fakataulaʻeiki. ʻOku lahi ha ngaahi meʻa te u lava ʻo fai ke tokoni mo faitāpuekina ai hoku kaungāʻapí pea tautautefito ke tokoniʻi hoku fāmilí ʻo fakafou ʻi he lakanga fakataulaʻeikí. ʻOku mahuʻinga foki ke u fatongia ʻaki hoku uiuiʻí. ʻI he taimi pē ʻoku ui ai au ke u ngāué, ʻoku ou feinga ke līʻoa ki ai ʻaki hoku lelei tahá. ʻOku ou ʻiloʻi ʻe moʻoni tatau pē ʻi he taimi ʻoku ou maʻu ai ʻa e fatongia maʻongoʻonga ʻo e hoko ko ha tamaí.

ʻI heʻeku fakaʻaongaʻi e ngaahi meʻá ni mo muimui he sīpinga ʻa hotau Fakamoʻui ko Sīsū Kalaisí, ʻoku ou teuteuʻi ai au ke u hoko ko ha husepāniti mo ha tamai lelei ʻi he kahaʻú. Kuo akoʻi au ʻi heʻeku tokoni ki heʻeku faʻeé mo feinga ke moʻui ʻaki e ongoongoleleí. ʻOku ou ʻiloʻi ʻa e ʻofa ʻa e ʻOtuá kiate aú pea mo ʻEne fakaʻamu ke u lava ʻo taki hoku fāmilí ʻi ha ʻaho ʻi he lāngilangi.

ʻOku nofo e tokotaha naʻá ne fai e talanoá ʻi Lio Kalanite to Sulu, Palāsila.