Home Evening nga Leksiyon nga Maggamit og Butang [Object Lesson]

Linung-ag nga Itlog nga Pagpangilad

Ni David Dickson

Mga Magasin sa Simbahan

Gamit ang pipila ka itlog, matudloan nimo ang imong pamilya ug mga higala kabahin sa kamatuoran.

I-download ang PDF

Karong buntaga, nagdesisyon ka, nga usa kini ka buntag para sa omelet. Mibangon ka gikan sa higdaanan ug naghiwa sa mga utanon. Giinit nimo ang kaha. Imong gibuak ang itlog … ug ang imong manghod nga lalaki mibahakhak og katawa.

“Imo na usabkini nga gibuhat!” mireklamo ka. Oo, naglung-ag siya og itlog ug dayon gitipon niya og balik sa wala pa maluto nga mga itlog. Kana ang iyang paborito nga binuang. Kon unta aduna pa lang pamaagi aron makaila sa kalainan tali sa presko nga mga itlog ug linung-ag nga mga itlog. Ngano, kana susama ka mahinungdanon sa pag-ila tali sa “tinuod” ug “dili tinuod” nga impormasyon.

Oras na sa leksiyon nga gamitan og butang!

Mga Suplay

• Presko, wala pa maluto nga mga itlog, nga naa pa sa bayanan

• Usa o sobra pa nga linung-ag nga mga itlog, nga anaa pa sa bayanan ug wala pa mabuak

• Mga Kasulatan

Unsa ang Buhaton

1. Pagbutang og pipila ka itlog, nga adunay bisan usa nga linung-ag ug usa nga wala pa maluto nga itlog. Hisgoti uban sa imong pamilya ang problema sa tanan nga bakak nga impormasyon sa kalibotan karon, labi na sa online.

2. Ipasabot nga niini nga leksiyon, ang wala pa maluto nga mga itlog nagrepresentar sa kamatuoran ug ang linung-ag nga mga itlog nagrepresentar sa pagpangilad. Karon pangutana kon adunay usa nga makasulti, pinaagi sa pagtan-aw, asa nga mga itlog ang naluto na. (Siguro wala.)

Hunong ug Pakigtabi

Basaha ang mosunod nga kasulatan ug kinutlo uban sa imong pamilya. Hisgoti kon unsaon nga malikayan nga mailad.

“Ug sa ingon sa tanan nga walay hugot nga pagtuo, pangitaa ninyo nga makugihon ug magtudlo sa usag usa sa mga pulong sa kaalam; oo, pangitaa ninyo gikan sa labing maayo nga mga basahon ang mga pulong sa kaalam, pangitaa ang pagtulun-an gani pinaagi sa pagtuon ug usab pinaagi sa hugot nga pagtuo” (Doktrina ug mga Pakigsaad 109:7).

“Kon ang kadaghanan sa impormasyon nga inyong madawat gikan sa social o ubang media, ang inyong abilidad sa pagkadungog sa mga paghunghong sa Espiritu mag-anam og kawala. Kon kamo wala magtinguha sa Ginoo pinaagi sa inadlaw-adlaw nga pag-ampo ug pagtuon sa ebanghelyo, inyong gitugotan ang inyong kaugalingon nga madutlan sa mga pilosopiya nga tingali makapadani apan dili tinuod.”

Presidente Russell M. Nelson, “Paggahin og Panahon alang sa Ginoo,” Okt. 2021 nga kinatibuk-ang komperensiya (Liahona, Nob. 2021, 120).

3. Panahon na para ipakita ang kalainan nga mahimo sa dugang nga gamayng kahibalo. Sulayi sa pagtuyok ang matag itlog nga naa sa imong atubangan. Patuyoka sila sa ilang tumoy nga nagbarog, sama sa kasing. Ang presko nga itlog matumba hapit dihadiha dayon, apang ang linung-ag nga itlog magpadayon sa pagtuyok! Sa higayon nga mahibaloan nimo kini nga yanong kamatuoran, dili ka na gayod mailad.

4. Ipasabot nga ang mga kasulatan, ang mga propeta, ug ang Espiritu Santo makagiya kanato ngadto sa uban pa nga mga kamatuoran nga magamit kaayo sa pag-ila sa pagpangilad sa tanang parte sa atong kinabuhi. Samtang imong gituman ang mga sugo ug mohatag og atensiyon sa Espiritu, ikaw makahibalo sa “mga butang ingon nga sila gayod” (Jacob 4:13) ug mailhan ang kamatuoran taliwala sa pagpangilad. Kini usab magtugot nimo sa pagtuon gikan sa “labing maayo nga mga basahon” (ug usab makakaplag sa labing maayo nga mga website, ug bag-o nga mga kapanguhaan, ug daghan pa) sa tibuok nimong kinabuhi.