Lesoni Fakataumuʻaʻo e Efiafi ʻi ʻApí

Fuaʻimoa Ngali Ne ʻOsi Haká

Fai ʻe David Dickson

ʻŪ Makasini ʻa e Siasí

ʻI haʻo fakaʻaongaʻi ha ngaahi foʻi fuaʻimoa, te ke lava ai ʻo akoʻi ho fāmilí mo e ngaahi kaungāmeʻá fekauʻaki mo e moʻoní.

Download PDF

Ko e pongipongi ní, te ke fili, ko ha pongipongi kai ʻomileti (omelet). ʻOkú ke ʻā hake ʻo hifi e vesitapoló. ʻOkú ke fakamafana ʻa e fakapakú. ʻOkú ke fahi e fuaʻimoá … pea ʻoku kata ho kiʻi tuongaʻané.

ʻOkú ke pehē ange, “Naʻá ke toefai pē e meʻa tatau!” ʻIo, naʻá ne haka ha ngaahi fuaʻimoa pea toe faʻo ia ki he fuaʻimoa foʻoú. Ko e meʻa ia ʻokú ne saiʻia taha ke faí. Kapau pē naʻe ʻi ai ha founga ke tala ʻa e faikehekehe ʻi he fuaʻimoa foʻoú mo e ngaahi fuaʻimoa ne ʻosi haká. Ko e hā hono ʻuhingá, ʻe meimei ʻaonga tatau pē ia mo e malava ke ʻiloʻi ʻa e fakamatala “moʻoní“ mo e “loí.“

Taimi ki he lēsoni fakataumuʻá!

Ngaahi naunaú

• Fuaʻimoa foʻou mo teʻeki ai ke haka, ʻoku kei ʻi hono ngeʻesí pē

• Fuaʻimoa ʻe taha pe lahi ange kuo haka, ʻoku kei ʻi hono ngeʻesí pea teʻeki ke fahi.

• Ngaahi Folofolá

Meʻa ke Faí

1. Fokotuʻutuʻu ha ngaahi foʻi fuaʻimoa, ko ha foʻi fuaʻimoa ʻosi haka ʻe taha mo ha foʻi fuaʻimoa mata ʻe taha. Aleaʻi mo ho fāmilí ʻa e palopalema ʻo e ngaahi fakamatala hala kotoa pē ʻi he māmaní ʻi he ʻahó ni, tautautefito ki he ʻinitanetí.

2. Fakamatalaʻi ange ʻoku fakafofongaʻi ʻe he fuaʻimoa ʻoku ʻikai haka ʻi he lēsoni ko ʻení ʻa e moʻoní pea ʻoku fakafofongaʻi ʻe he fuaʻimoa kuo haká ʻa e kākaá. Fehuʻi ange leva pe ʻe lava ʻe ha taha ʻo tala, ʻaki haʻo sio pē, pe ko e fē ʻa e fuaʻimoa kuo ʻosi haká. (Mahalo pē ʻikai.)

Kiʻi Mālōlō pea Talanoa

Lau mo ho fāmilí ʻa e potufolofola mo e kupuʻi lea ko ʻení. Aleaʻi e founga ke fakaʻehiʻehi ai mei hano kākaaʻi koé.

“Pea koeʻuhí ʻoku ʻikai ke maʻu ʻe he kakai kotoa pē ʻa e tuí, mou fekumi faivelenga pea feakoʻiʻaki ʻiate kimoutolu ʻa e ngaahi lea ʻo e potó; ʻio, mou fekumi mei he ngaahi tohi lelei tahá ʻa e ngaahi lea ʻo e potó; mou fekumi ki he ʻiló ʻio ʻi he ako pea ʻi he tui foki” (Tokāteline mo e Ngaahi Fuakava 109:7).

“Kapau ko e lahi taha ʻo e fakamatala ʻokú ke maʻú mei he mītia fakasōsialé pe ha toe mītia kehe, ʻe hōloa hoʻo malava ke ongoʻi e fanafana ʻa e Laumālié. Kapau ʻoku ʻikai ke ke fekumi fakaʻaho ki he ʻEikí ʻi he lotu mo e ako ʻo e ongoongoleleí, ʻokú ke tuʻu ai ʻi ha tuʻunga ʻe uesiangofua ʻe he ngaahi fakakaukau fakapoto ʻo e tangatá, ʻa ia ʻe ngali lelei ka ʻoku ʻikai moʻoní.”

Palesiteni Russell M. Nelson, “Fokotuʻu ha Taimi moʻó e ʻEikí,” konifelenisi lahi ʻo ʻOkatopa 2021 (Liahona, Nōvema 2021, 120).

3. Taimi ke fakahaaʻi ʻa e faikehekehe ʻe lava ke fai ʻe ha kiʻi ʻilo lahi ange. Feinga ke vilohi ʻa e fuaʻimoa takitaha ʻi muʻa ʻiate koe. Vilohi fokotuʻu kinautolu hangē ha meʻavaʻingá. ʻE meimei tuʻu leva ʻa e fuaʻimoa matá ʻi he taimi pē ko iá, ka ʻe kei vilo pē ʻa e fuaʻimoa mohó! Ko hoʻo ʻilo pē ʻa e foʻi moʻoni faingofua ko ʻení, he ʻikai leva ke toe kākaaʻi koe.

4. Fakamatalaʻi ange ʻe lava ke tataki kitautolu ʻe he folofolá, kau palōfitá, mo e Laumālie Māʻoniʻoní ki ha ngaahi moʻoni kehe ʻoku tatau pē hono ʻaongá ʻi hono fakamaʻa ʻo e kākaá ʻi he tapa kotoa pē ʻo ʻetau moʻuí. ʻI hoʻo moʻui ʻaki e ngaahi fekaú mo tokanga ki he Laumālié, te ke lava ʻo ʻilo ʻa e “ngaahi meʻá ʻo hangē ko honau anga moʻoní“ (Sēkope 4:13) pea ʻiloʻi ʻa e moʻoní mei he kākaá. ʻOku fakaʻatā foki heni koe ke ke ako mei he “ngaahi tohi lelei tahá“ (pea ke maʻu foki mo e ngaahi uepisaiti lelei tahá, mo e ngaahi maʻuʻanga ongoongó, mo e alā meʻa peheé) ʻi he kotoa hoʻo moʻuí.