“Usa ka Magbalantay,” Alang sa Kalig-on sa mga Kabatan-onan, Okt. 2022.
Pagtulun-an human sa usa ka Pagtulun-an
Usa ka Magbalantay
Ang propeta nga si Ezequiel nakakat-on bahin sa usa ka tahas sa usa ka propeta.
Paghulagway pinaagi ni Alyssa Tallent
pulong sa Ginoo
Ang pulong sa Ginoo moabot sa mga propeta sa lain-laing mga paagi. Usahay ang Ginoo direktang nakigsulti kanila. Usahay magpadala Siya og mga anghel aron ipahayag ang Iyang pulong. Kasagaran Siya mamulong kanila pinaagi sa hinay, hinagawhaw nga tingog sa Balaang Espiritu.
magbalantay
Sa karaang kapanahonan, ang usa ka magbalantay nagbarog sa usa ka paril o diha sa usa ka tore ug nagtan-aw sa mga kapeligrohan nga gikan sa halayo, sama sa mga kaaway sa ilang pagpaingon sa pag-atake sa usa ka siyudad. Ang magbalantay mahimong mopasidaan dayon sa mga tawo aron sila makapangandam.
Ang Ginoo misulti kang Ezequiel nga ang usa ka propeta sama sa usa ka magbalantay nga nagtindog sa usa ka tore. Tungod kay ang mga propeta adunay balaan nga tawag, sila nahimulag gikan sa kalibotan ug makakita sa mga butang gikan sa mas taas, o mas langitnon, nga panglantaw. Sila mopasidaan sa mga tawo sa espirituwal nga mga kapeligrohan.
balay sa Israel
Kon ang mga propeta karon maghisgot mahitungod sa balay ni Israel, sila nagpasabot sa katawhan sa Ginoo, kinsa mihimo og mga pakigsaad uban Kaniya.
pasidaan
Ang mga propeta nagpasidaan kanato sa espirituhanong mga kapeligrohan aron kita makaandam alang niini ug makapalig-on sa atong mga kaugalingon batok niini. Ang mga propeta naghangyo kanato nga dili magpakasala ug mopasidaan kanato kon unsay mahitabo kon kita makasala. Sila nagtudlo kanato sa mga kamatuoran sa Dios ug sa Iyang mga sugo. Usahay sila mosulti pa gani kanato unsa ang mahitabo diha sa umaabot aron kita makahibalo sa moabot ug makapangandam alang niini. (Tan-awa sa Giya ngadto sa mga Kasulatan, “Propeta,” ChurchofJesusChrist.org/scriptures/gs.)