“Saan nga Urayen! “Agbalin a Kas Dagiti Agpaspastor,” Para iti Pigsa dagiti Agtutubo, Dis. 2022.
Binulan a Mensahe iti Para iti Pigsa dagiti Agtutubo , Disiembre 2022
Saan nga Urayen! Agbalin a Kas Dagiti Agpaspastor
Iti maysa a naulimek a rabii nabayag a panawen ti naglabas, sipapasnek a binantayan dagiti agpaspastor dagiti arbanda.
Adda napateg a trabaho dagiti agpaspastor. Kasapulan dagiti karnero ti taraon, danum, ken salaknib manipud iti peggad.
Pagammuan, nagparang ti maysa nga anghel!
“Dikay agbuteng, ta adtoy, iyegko kadakayo ti naimbag a damag ti dakkel a rag-o. … Kadakayo maipasngay itoy nga aldaw … ti maysa a Mangisalakan, nga isu ni Cristo nga Apo”
Imbaga ti anghel kadagiti pastor a masarakanda ti maladaga a nabalkot kadagiti kawes a pangbalkot, a nakaidda iti kulluong idiay Betlehem.
Maysa a koro dagiti anghel ti nangpunno iti langit ket nakikadua iti anghel a nangidaydayaw iti Dios.
“Dayag iti Dios iti kangatuan, ken ditoy daga talna, naimbag a pagayatan kadagiti tattao.”
“Mapantayo idiay Betlehem ket kitaentayo no ania ti impakaammo ti Apo kadatayo.”
Saan a naguray dagiti agpaspastor. Napateg met daytoy! “Immayda a sidadarasudos” idiay Betlehem.
Nasarakan dagiti agpaspastor ni Jesus a nabalkot iti kawes a pagbalkot, a nakaidda iti maysa a kulluong, kas met laeng iti kinuna ti anghel.
Daytoy ti naikari a Mesias nga immay nga agbalin a Mangisalakan ken Mannubbot iti lubong ken mangyeg kadatayo iti pudno a rag-o!
Kasta unay ti ragsak dagiti agaspastor! Impadamagda no ania ti nangngegan ken nakitada.
“Nayanaken ti Mangisalakan iti lubong!”
“Dimtengen ti Mesias kamaudiananna!”
“Immayda a sidadarasudos” dagiti agpaspastor ken ni Jesus. Maaramidyo met!
Masursuroyo ti maipapan Kenkuana.
Makapagserbika Kenkuana babaen ti panagserbi kadagiti dadduma.
Maipaneknekyo ti maipapan Kenkuana.
© 2022 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, December 2022. Ilokano. 18318 864