« ’Eiaha e tīa’i ! ’A riro mai te mau tīa’i māmoe », Nō te Pūai o te Feiā ’Āpī, Tītema 2022.
Parau poro’i tā’āva’e Nō te Pūai o te Feiā ’Āpī, Tītema 2022
’Eiaha e tīa’i ! ’A riro mai te mau tīa’i māmoe
I te hō’ē pō muhu ’ore, tē ha’apa’o itoito ra te mau tīa’i māmoe i tā rātou mau nana.
E ’ohipa faufa’a roa tā te mau tīa’i māmoe. E hina’aro te mau māmoe i te mā’a, te pape ’e te pārurura’a i te ’ati.
’E inaha, ’ua fā mai ra te hō’ē melahi !
« ’Eiaha e mata’u, inaha ho’i, e parau maita’i tā’u e hōpoi mai ia ’outou nei… Inau’anei ho’i i fānau ai te Ora nō ’outou i te ’oire o Davida, ’oia ho’i te Mesia ra ’o te Fatu. »
’Ua parau te melahi i te mau tīa’i māmoe ē e ’ite rātou i te ’aiū tei vehihia i te mau ’ahu pū’ohu, e tārava ra i roto i te vaira’a mā’a a te pua’a (phātene) i Betelehema.
’Ua ’ī te ra’i i te pupu hīmene a te mau melahi ’e ’ua ’āmui atu i terā melahi nō te ’āruera’a i te Atua.
« ’Ia ha’amaita’ihia te Atua i ni’a i te ra’i teitei, ’ei hau tō teie nei ao, ’e ’ia ’ite-au-hia mai te ta’ata nei. »
« Mai haere tātou i Betelehema e hi’o i taua mea ra tā te Fatu i fa’a’ite mai ia tātou nei. »
’Aita te mau tīa’i māmoe i tīa’i. E faufa’a rahi roa te reira ! « Haere ’oi’oi atu ra rātou » i Betelehema.
’Ua ’ite te mau tīa’i māmoe ia Iesu tei vehihia i te mau ’ahu pū’ohu, ’e tē tārava nei ’oia i roto i te phātene, mai tā te melahi i parau mai ra.
’O teie te Mesia i fafauhia mai ’o tē haere mai ’ia riro ’ei Fa’aora ’e ’ei Tāra’ehara nō te ao tā’āto’a nei ’e nō te ’āfa’i mai i te ’oa’oa mau nō tātou !
’Ua ’oa’oa roa te mau tīa’i māmoe ! ’Ua fa’a’ite mai rātou i te mea tā rātou i fa’aro’o ’e i ’ite.
« ’Ua fānauhia te Fa’aora o te ao nei ! »
« ’Āria ’ua tae mai te Mesia ! »
« Haere ’oi’oi atu ra » te mau tīa’i māmoe ia Iesu ra. E nehenehe ato’a ’outou ’ia nā reira !
E nehenehe ’outou ’ia ha’api’i mai iāna ra.
E nehenehe ’outou e tāvini iāna nā roto i te tāvinira’a ia vetahi ’ē.
E nehenehe ’outou e fa’a’ite pāpū nōna.
© 2022 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly For the Strength of Youth Message, December 2022. Tahitian. 18318 895