“4 a Wagas a Papigsaennakayoni Jesucristo,” Para iti Pigsa dagiti Agtutubo, Ene. 2023.
Binulan a Mensahe iti Para iti Pigsa dagiti Agtutubo , Enero 2023
4 a Wagas a Papigsaennakayoni Jesucristo
“Maaramidko ti amin a banag babaen ken ni Cristo.
Taga Filipos 4:13
Iti intero a lubong, agrag-o dagiti Kristiano iti daytoy a nasantuan a kasuratan: “Maaramidko ti amin a banag babaen ken Cristo a mangpapigsa kaniak” (Taga Filipos 4:13).
No mangngeg daytoy dagiti tao, mabalin a panunoten ti dadduma kadakuada a kaipapananna a mabalinda a malasat iti ania man a pannubok, mangabak iti ania man nga ay-ayam, ken matungpal ti tunggal tarigagay. Ngem saan a dayta ti isursuro daytoy a nasantuan a kasuratan.
Insurat ni Apostol Pablo daytoy bayat ti kaaddana iti pagbaludan. Kas maysa a balud, adu ti saan a maaramid ni Pablo, ngem ammona a papigsaen isuna ni Jesucristo a mangaramid iti banag a kapatgan.
Pudno met dayta kadatayo!
1 papigsaennakayo ni Jesucristo a Mangammo
Inikkannakayo ni Jesucristo iti sumagmamano a napateg a wagas a mabalinmo a maammuam no ania ti pudno. Insuronatayo amin nga agkararag a kanayon (kitaen iti 3 Nephi 18:18) ken agkiddaw a mangammo no ania ti pudno (kitaen iti Moroni 10:4–5). Mabalinmo pay a sapulen ken ammuen no ania ti pudno babaen ti panagadalmo kadagiti nasantuan a kasuratan.
Ti kararag ken panagadal iti nasantuan a kasuratan ti mangyeg iti Espiritu iti biagmo. Mabalin nga agsao ti Espiritu iti “panunotmo ken … pusom” (Doktrina ken Katulagan 8:2), “mangpunno iti kararuam iti rag-o,” ken “mangpalawag iti panunotmo” (Doktrina ken Katulagan 11:13).
Kadagitoy a wagas, mabalinmo ti “dumngeg Kenkuana”—dumngeg kadagiti balikas ti Mangisalakan ken mangsurot iti no ania ti kinunana. Insuro ni Presidente Russell M. Nelson a daytoy “ti pagrukodan para iti balligi, ragsak, ken rag-o iti daytoy a biag.”1
2 Papigsaennakayo ni Jesucristo a Mangaramid
Umay kadakayo ti pigsa bayat ti panangikagumaanmo a mangtungpal kadagiti bilin ken mangaramid kadagiti nasayaat a panagpili a mangiturong iti talna ken ragsak. Papigsaennakayo ni Jesucristo a mangaramid iti daytoy uray no narigat nga aramiden dagita a pili. No dadduma, mabalin a dakes ti piliem. Pagyamanan nga inaramid ti Pannubbot ti Mangisalakan a posible ti panagbabawi. Gapu ken ni Jesucristo, makapagbalinkayo a nadalus ken makasarak iti rag-o. Mapapigsanakayo nga “agaramid iti nasaysayaat ken agbalin a nasaysayaat”2 iti inaldaw.
3 Papigsaennakayo ni Jesucristo a Mangparmek
Bayat ti kaaddana iti pagbaludan, insurat ni Pablo: “Nasursurok, iti ania man a kasasaadko, a mapnek iti dayta.
“Ammok no kasano ti agpababa, ken ammok no kasano ti aglaplapusanan: iti sadino man ken iti amin a banag masursuruanak” (Taga Filipos 4:11–12).
Iti sabali a pannao, nasursuro ni Pablo a, babaen ken ni Cristo, mabalinna a parmeken ken makasursuro manipud kadagiti pannubok ken karitna. Mapapigsanakayo ni Jesucristo nga aramiden met ti kasta.
Nagitured ti Mangisalakan iti “saem ken rigat ken amin a kita ti sulisog.” Inawatna iti Bagina dagiti saksakitentayo tapno “maammuanna … no kasano nga alawenna [a kayatna a sawen tulongan] dagiti taona a maibatay kadagiti pagkuranganda” (Alma 7:11–12). Aniaman ti pakaipasanguam, mapapigsanaka ni Jesucristo nga agibtur ken mangipatungpal kadagiti banag a dimo kabaelan a maaramid a bukbukodmo.
4 Papigsaennakayo ni Jesucristo nga Agbalin
Pinagbalin ni Jesucristo a pumudno ti panagungar para kadatayo amin, ket pagbalinenna a posible ti agnanayon a biag para kadagidiay agbabawi, umawat kadagiti nasken nga ordinansa, ken mangaramid ken mangsalimetmet kadagiti katulagan a mainaig kadagitoy. No awan ni Cristo, saantayo a maipatungpal no ania ti tartarigagayan unay ti Nailangitan nga Ama—tapno agbalintayo nga ad-adda a kas Kenkuana ken ti Anakna, ni Jesucristo, ken makipagnaed Kadakuada iti agnanayon.
Makapagbalinkayo nga ad-adda a kas ken ni Jesucristo bayat ti panangadalyo Kenkuana, agpannuray ken agtalek Kenkuana, ken sumurot iti pagwadanna. Daytoyto ti mangiturong kadakayo nga agbiag nga addaan iti ad-adu a pammati, namnama, kinamanangngaasi, kinaanus, kinapakumbaba, kinadalus, ken panagtulnog. Dagitoy amin ti kababalin ti Mangisalakan.
Bayat ti panangikagumaanyo a sumurot ken ni Jesucristo, Isunto ti namnamam ken ti silawmo a mangiwanwan kadakayo nga agbalin amin nga ammona a pakapagbalinanyo. Ket, kaduayo ni Pablo, kabaelanyonto nga isao, “Maaramidko ti amin a banag babaen ken Cristo a mangpapigsa kaniak.”
© 2023 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, Jamuary 2023. Language. 18904 864