“Mishindu 4 Idi Yezu Kilisto Ukukankamika,” Bua Dikankamika dia Bansonga, Ngondo wa Kumpala 2023.

Mukenji wa ku Ngondo Bua Dikankamika dia Bansonga, Ngondo wa Kumpala 2023

Mishindu 4 Idi Yezu Kilisto Ukukankamika

Kudi Malombodi Makulu a Bansonga Baluma ne Bansonga Bakaji

Ndi mua kuenza malu onsu mu Kilisto.
Filipoyi 4:13

Mu buloba bujima, Bena Kilisto badi basanka ne mufundu ewu: “Ndi mua kuenza malu onsu mu Kilisto udi unkankamika” (Filipoi 4:13).

Padi bantu batshiumvua, bamua ba kudibu badi bela menji ne tshidi tshiumvuija, badi mua kupita ditêta dionsu, kukuata dinaya dionsu, ne kupeta mandamuna ku majinga onsu. Kadi etshi ki ntshidi mufundu ewu ulongesha to.

Uvua mufudibua kudi Mupostolo Paulo pavuaye mu nzubu wa lukanu. Bu muena lukanu, kuvua biabungi bivua Paulo kayi mua kuenza to, kadi uvua mumanya ne Yezu Kilisto udi mua kumukankamika bua enza malu adi ne mushinga wabungi.

Bidi momumua kûdi!

1 Kilisto Udi Ukukankamika bua Kumanya

Yezu Kilisto udi mukupesha mishindu yabungi ya mushinga bua wewa kufika ku dimanya tshidi tshilelela. Yeya mmutulongesha bonsu bua tuikala tusambila (tangila 3 Nefi 18:18) ne tulomba bua kumanya tshidi tshilelela (tangila Moloni 10:4–5). Udi peba mua kupeta ne kumanya tshidi tshilelela kupitshila ku dilonga dieba dia mifundu.

Disambila ne kulonga kua mifundu bidi bituala Nyuma mu moyo wetu. Nyuma udi mua kuakula mu “meji eba ne … mu moyo weba” (Dilongesha ne Bipungidi 8:2), “udi mua kuwuja anyima weba ne disanka,” ne “udi mua kukenkesha meji eba” (Dilongesha ne Bipungidi 11:13).

Mu mishindu eyi, udi mua “kumuteleja”—kuteleja mêyi a Mupandishi ne kulonda bivuaye muamba. Mulombodi Mukulu Russell M. Nelson wakalongesha ne etshi tshidi “ngikadilu wa dilubuluka, diakalenga, ne disanka mu moyo ewu.”¹

2 Kilisto Udi Ukukankamika bua Kuenza

Dikankamika didi dilua kûdi pawudi udienzeja bua kulama mikenji ne kuenza masungula mimpa adi alombola ku ditalala ne diakalenga. Yezu Kilisto udi ukukankamika bua kutshienza nansha padi masungula awu mikala makola bua kuenza. Imua misangu udi mua kuenza disungula dibi. Bia kusakidila bu mudi Bupikudi bua Mupandishi bupepeja dikudimuna mutshima. Kupitshila ku Yezu Kilisto, udi mua kulua musukudibua ne kupeta disanka. Udi mua kukukankamika bua “kuenza malu mimpa ne kuikala muntu muimpa”² dituku dionsu.

3 Kilisto Udi Ukukankamika bua Kutamba

Pavua Paulo mu nzubu wa lukanu, wakafunda ne: “Ngakalonga bua kuikala ne mutshima mupola mu malu onsu andi nawu.

“Ndi mumanya mua kupuekeshibua, ne ndi mumanya mua kuikala ne bintu bitamba: mu bualu bonsu ne mu mianda yonsu, ndi mulongeshibua” (Filipoyi 4:11–12).

Mu diumvuija dikuabu, Paulo wakalonga ne, kupitshila ku Kilisto, udi mua kutamba ne kulonga ku ntatu ne makenga bienda. Yezu Kilisto udi mua kukukankamika peba bua wenza momumua.

Mupandishi wakakenga “busami ne makenga ne matêta bia mishindu yonsu.” Wakangata pa mutu wenda mateketa etu onsu bua “amanya … mushindu wa kuambuluisha bantu benda bilondeshila ku mateketa abu” (Alama 7:11–12). Nansha wewa ne bualu, Yezu Kilisto udi mua kukukankamika bua kunanukila ne kukumbaja malu âvua kuyi ukumbana bua kuenza nkayeba.

4 Kilisto Udi Ukukankamika bua Kukudimuka

Yezu Kilisto wakenza dibika dia ku lufu bua bonsu buetu, ne udi mua kupepejela moyo wa tshiendelela bua aba badi bakudimuna mutshima, bapeta milulu ya mushinga, ne benza ne balama bipungidi bidi bilamata kudibi. Koku kakuwi Kilisto, katuena mua kukumbaja tshidi Tatu wa mu Diûlu mutamba kusua—buetu bua tulua bafuanangana nenda ne Muanenda, Yezu Kilisto, ne kusomba nabu bua tshiendelela.

Udi mua kufuanangana ne Yezu Kilisto bikola pawudi ulonga buenda, umuitaba ne umueyemena, ne ulonda tshilejilu tshienda. Etshi netshikulombola bua kuikala ne ditabuija, ditekemena, bunangi, didipuekesha, bukezuka ne ditumikila bia bungi. Bionsu ebi bidi ngikadilu ya Mupandishi.

Pawudi udienzeja bua kulonda Yezu Kilisto, yeya neikala ditekemena dieba ne bukenka bueba buakuludika bua ulua tshionsu tshidiye mumanya ne udi mua kulua. Ne, pamua ne Paulo, neukumbana bua kuamba ne, “Ndi mua kuenza malu onsu mu Kilisto udi unkankamika.”

© 2023 kudi Intellectual Reserve, Inc. All rights reserved. Mupatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Mukenji wa ku ngondo bua dikankamika dia Bansongau, Ngondo wa Kumpala 2023. Language. 18904 760