“Soangen Mwohmw 4 [pahieu] duwen Sises Krais Ah kak KakehlakaiIuk,” Ong Kakehlepen Me Pwulopwul Akan. Sen. 2023.
Padahk en Sounpwong kan Ong Kakehlepen me Pwulopwul kanSeniweri 2022
Soangen Mwohmw 4 [pahieu] Sises Krais kak Kakehlaka Iuk
I kakohng mehkoaros pwehki Krais.
Pilipai 4:13
Nan sampah, Souleng kan perenki iren pwuhk sarawi wet: “I kakohng mehkoaros sang ni manamano me Krais ketin ketikihong ie” (Pilipai 4:13).
Ansou aramas kin karonge met, ekei irail kak leme e wehwehki irail kak powehdi kasongosong sohte lipilipil, kana nan mwadong koaros, oh alehdi soahng koaros re mwahuki. Ahpw kaidehn ihme iren pwuhk sarawi wet padahngki.
E ntingdier sang Wahnpoaron Pohl ni ah mihmi nan imweteng. Ni ah mihmi nan imweteng, soahng tohto me Pohl sohte kak wia, ahpw e ese me Sises Krais kak kakehlaka ih en wia soahngkan me keioun kesempwal.
Met mehlel duwehte ong kumwail!
1 Krais kin Kakehlailih Kumwail en Ese
Sises Krais ketkiong kumwail mwohmw kesempwal ekei kumwail en esehla dahme mehlel. E ketin padahkih kitail koaros en poaden kapakap (kilang 3 Nephi 18:18) oh idek dahme mehlel (kilang Moroni 10:4–5). Kumwail pil kak diar oh esehla dahme mehlel sang ni amwail pahn onopki pwuhk sarawihkan.
Kapakap oh onopki pwuhk sarawi kak wahdo Ngehno nan amwail mour. Ngehno kak lokaiahng “amwail lamalam oh … amwail mohngiong” (Doctrine and Covenants 8:2), “audehkihda palingenamwail popohl,” oh “kamarainda amwail lamalam” (Doctrine and Covenants 11:13).
Ni mwohmw pwukat, kumwail kak “rong Ih”—rong Sapwelimen Sounkomouro mahsen kan oh idawehn dahme E ketin mahsanih. Presiden Russell M. Nelson padahngkiher me iet iei “mwohmw en pweida, peren, oh popohl nan mourwet.”1
2 Krais kin Kakehlaka Kumwail en Wia
Kehlail kin kodohng kumwail ni amwail kin nantiheng momourki kosonned akan oh wiahda pilipil mwahu me pahn elehda meleilei oh peren. Sises Krais kin kakehlakai kumwail en wia met mendahte pilipil kan ah apwal. Ekei pak kumwail kak pilada me sapwung. Kalahnganki, Sapwelimen Sounkomouro Tomwo me elehda koluhla ah kak wiawi. Pwehki Sises Krais, ke kak mwakelekella oh diar popohl. E kak ketin kakehlaka kumwail en “wia mwahusang oh enmwahusang”2 nan ehu ehu rahn,
3 Krais kin Kakehlaka Kumwail en Powehdi
Ni ah mihmi nan imweteng, Pohl intingihdi: ”Oh I pil sohte koasoia met pwehki ih pehm me kumwail keseielahr, pwe I ahnlahr oh itarki dahme I kin ahneki.
”I wehwehkiher duwen ei pahn momourki soahng kan me sohte itar, oh pil duwen ei pahn momourki soahng kan me depasang ei anahn akan: I pahn kak nsenamwahu wasa koaros oh ahnsou koaros” Pilipai 4:11-12).
Ni mehlel, Pohl esehla me, sang Krais, e kak powehdi oh ahnkihla marain sang ah kasongosong kan oh kahpwal kan. Sises Krais kak kakehlaka kumwail en wia soahngohte.
Sounkomouro lokolongki ”soangen mwohmwen weirek, medek oh mwohmwen songosong koaros.” E ketin alehda medek koaros pwe ”en mwahngih … mwomwen eh pahn ketin sowese [me wehwehki en sowese] sapwelime aramas akan nin duwen arail luwet akan” (Alma 7:11-12). Sohte lipilipil dahme kumwail sohpai, Sises Krais kak kakehlaki kumwail en nanantihengete oh alehdi soahng kan me kumwail sohte kak pein wiahda.
4Krais kin Kakehlaka Kumwail en Wiahla
Sises Krais ketin wiahda iasadaho en wia mehkot mehlel ong kitail koaros, oh E ketin wiahda mour soutuk en Ma sohte Krais, kitail sohte kak kapwaiada dahme Sahm Nanleng keiou kupwurki–kitail en duwehla Ih oh Sapwelime Pwutak, Sises Krais, oh mihmi Rehra kohkohlahte.
Kumwail kak duwehla Sises Krais ni amwail esehla Ih, koapwoaroapwoarki oh likih Ih, oh idawehn Sapwelime karasaras. Met pahn elehiong kumwail en momourki pwoson laud, koapwoaroapwoar, limpoak mehlel, kanengamah, karakarahk, mwakelekel, oh peik. Mepwukat koaros wia mwohmw en Sounkomouro.
Ni amwail pahn nantiheng idawehn Sises Krais, E pahn ketin wia amwail koapwoaroapwoar oh amwail marain me pahn kaweid kumwail en wiahla dahme E ketin mwahngih kumwail kak wiahla. Oh, iang Pohl, kumwail kak koasoia, ”I kakohng mehkoaros sang ni manamano me Krais kin ketikihong ie.”
© 2023 sang Intellectual Reserve, Inc. Kolokol pwuhng koaros Ntingda nan USA. Kamanaman ong ni lokaiahn Wai: 6/19. Kamanaman ong kawehwe: 6/19. Kawewedahr en Monthly For the Strength of Youth Message, December 2022. Language. 18904 000