“Kalinaw sa Pag-atubang sa mga Unos sa Kinabuhi,” Alang sa Kalig-on sa mga Kabatan-onan, Mar. 2023.
Kalinaw sa Pag-atubang sa mga Unos sa Kinabuhi
Ang Ginoong si Jesukristo mosulti nimo atol sa mga unos sa imong kinabuhi nga: “Hunong.”
Si Elder Uchtdorf uban sa mga batan-on atol sa pagpahibalo bahin sa BYU–Pathway Worldwide niadtong Pebrero 7, 2017.
Human sa tibuok adlaw nga pagtudlo daplin sa baybayon, si Ginoong Jesukristo misugyot sa Iyang mga disipulo nga motabok sila ngadto sa pikas habig sa Dagat sa Galilea. Human sa ilang pagbiya, si Jesus nakakaplag og luna nga kapahulayan diha sa sakayan ug nakatulog.
Wala madugay mingitngit ang kalangitan, “mihuros ang usa ka kusog nga unos, ug tungod sa dagkong balod nasudlag tubig ang sakayan ug hapit kini mapuno” (tan-awa sa Marcos 4:37).
Daghan sa mga disipulo ni Jesus sinati na nga mga mananagat ug nasayod kon unsaon paglawig sa sakayan. Apan ang unos mikusog, ug nagsugod sila og kahadlok. Ang sakayan hapit na gayod malunod.
Bisan pa man niana, si Jesus natulog ra gihapon.
Wala kita mahibalo kon unsa kadugay nga ang mga disipulo nakigbisog sa unos, apan kadugayan wala na sila makaagwanta. Gipukaw nila si Jesus ug miingon, “Magtutudlo, wala ka ba mabalaka nga hapit na man kita malunod?” (Marcos 4:38).
Mga paghulagway pinaagi ni Adam Howling
Ang mga Unos sa Kinabuhi
Kitang tanan nag-atubang og kalit nga mga unos sa kinabuhi. Mahimo nimong tan-awon ang mga problema sa tibuok kalibotan o sa imong kaugalingong mga kahimtang ug mobati og kaguol, kawalay kadasig, ug kasagmuyo. Ang imong kasingkasing hilabihan gayod kaguol alang nimo o sa usa ka tawo nga imong gihigugma. Ikaw tingali nabalaka o nahadlok ug mibati nga ang paglaom mibiya nimo sa kahangtoran.
Niining mga higayona, makasulti ka sama sa mga disipulo ni Jesus, “Magtutudlo, wala ka ba mabalaka nga hapit na man ako malunod?”
Niadtong sama ninyo ang akong pangedaron, usa sa akong paboritong himno mao ang “Agalon, ang Unos Kapintas.”1 Mapanan-awan nako ang akong kaugalingon nga nagsakay sa sakayan sa dihang “kadagko sa mga balod!” Ang importante ug matahom nga bahin sa himno nag-ingon: “Hangin ug balod nimo motuman: Kalinaw.” Dayon ania ang importante nga mensahe: “Walay makalunod sa gisakyan sa Agalon sa tanang nilalang.”
Human sa pagpangayo og tabang sa Iyang mga disipulo, si Jesus “mibangon ug iyang gipahunong ang hangin ug ang mga balod iyang giingnan, Hunong. Ug mihunong ang hangin, ug mibanos ang kalinaw” (Marcos 4:39).
Kon dapiton nimo si Jesukristo, “Ang Prinsipe sa Pakigdait” (Isaias 9:6), nganha sa imong sakayan, makakaplag ka og kalinaw taliwala sa nagkaguliyang ug makalilisang nga mga unos nga nagtuyok-tuyok sa imong kahiladman ug sa imong palibot.
Ang sama nga mga pulong nga gisulti ni Jesus didto sa Dagat sa Galilea nianang unoson nga kagabhion dugay nang panahon, mao usab ang Iyang isulti nimo atol sa mga unos sa imong kinabuhi nga: “Hunong.”
Salig sa Iyang Makapakalma nga Gahom
Mahunahuna ba ninyo kon unsa kaha ang gibati sa mga disipulo sa dihang nakita nila ang hangin, ang ulan, ug ang dagat nga mituman sa mando sa ilang Magtutudlo? Ang masulti lamang nila mao, “Kinsa man kining tawhana nga bisan gani ang hangin ug ang mga balod motuman man kaniya?” (Marcos 4:41).
Si Jesukristo dili sama ni bisan kinsa nga nagpuyo dinhi sa yuta. Siya mianhi aron pagluwas nato. Didto sa Tanaman sa Getsemani, Siya mibayad sa bugti sa tanan natong mga sala. Siya miantos usab sa tanan natong kasakit ug kagul-anan. Kining dako ug walay kinutoban nga pag-antos maoy hinungdan sa pag-agas sa Iyang dugo sa matag lungag sa panit (tan-awa sa Lucas 22:44; Doktrina ug mga Pakigsaad 19:18).
Ang gibuhat sa Ginoo tungod sa hingpit nga gugma dili gayod nako masabtan. Apan ako nasayod nga Siya mihimo niini alang nako, alang nimo, ug alang sa matag kalag kinsa nabuhi ug mabuhi pa. Iyang gihatag ang tanan aron makadawat unta kita sa tanan.
Walay usa gayod nga makasinati sa unsay giantos ni Jesus, apan ikaw ug ako adunay atong kaugalingong mangitngit ug mapait nga mga unos nga angayng atubangon. Kon imong ibayaw ang imong kasingkasing ngadto sa Ginoo, Siya makapahunong sa imong mga unos, kay Siya nakasinati niining tanan. Siya nag-antos sa dili hinakog nga paagi alang nako ug alang nimo ug adunay gahom sa paglig-on, pag-awhag, ug pagpanalangin nimo.
Siya nagsaad, “Ang kalinaw ibilin ko kaninyo. Ang akong kalinaw nga dili sama sa ikahatag sa kalibotan ihatag ko kaninyo. Ayaw kamog kabalaka ug ayaw kahadlok” (Juan 14:27).
Mga Paagi sa Kalinaw
Si Ginoong Jesukristo mihatag nimo og mga paagi aron mabati ang Iyang kalinaw. Siya miingon, “Pagkat-on kanako, ug paminaw sa akong mga pulong; lakaw diha sa kaaghop sa akong Espiritu, ug ikaw makabaton og kalinaw ngari kanako” (Doktrina ug mga Pakigsaad 19:23).
Pagkat-on Kaniya pinaagi sa pagtuon sa Iyang kinabuhi ug mga pagtulon-an diha sa mga kasulatan. Ibayaw ang imong kalag diha sa pag-ampo. “Barog … sa balaan nga mga dapit,” lakip na ang templo (Doktrina ug mga Pakigsaad 87:8; tan-awa usab sa 45:32).
Paminaw sa Iyang mga pulong gikan sa buhi nga mga propeta. Mosunod sa giya sa Espiritu Santo. Gamita ang balaanong gasa sa paghinulsol. Moadto sa Iyang Simbahan aron makigdait, matudloan, ug maamumahan sa maayo nga pulong sa Dios.
Maglakaw diha sa kaaghop sa Iyang Espiritu pinaagi sa paghimo sa imong panimalay nga usa ka dapit diin ang Iyang Espiritu mabati. Motabang sa uban ug malipayong moserbisyo Kaniya. Hinumdomi, “Piliang matarong kay may kalinaw.”2 Paningkamot nga magpabiling usa ka “malinawon nga [sumusunod] ni Kristo” (Moroni 7:3).
Kon ikaw magkat-on, maminaw, ug maglakaw uban sa Ginoo, nan moabot ang Iyang dakong saad: Ikaw makabaton sa Iyang kalinaw.
Hugot nga Pagtuo nga Magmalinawon
Uban sa hugot nga pagtuo diha ni Ginoong Jesukristo, ikaw mahimong “magmalinawon” sa higayon nga ang mga unos sa kinabuhi moabot nimo. Ang kalinaw tingali dili ingon kapaspas sama niadtong sa mga disipulo didto sa Dagat sa Galilea, apan ang Ginoo molig-on nimo aron makasugakod sa mga unos nga imong giatubang.
Akong minahal nga higala, ako mopamatuod nga si Jesukristo buhi.
Siya nahigugma kanimo.
Siya nakaila kanimo.
Siya nakasabot kanimo.
Siya dili mobiya nimo nga walay kahupayan panahon sa imong panginahanglan.
Ang tinuod nga kalinaw moabot lamang diha ug pinaagi Kaniya. Ang Iyang kalinaw ihatag sa tanan nga modangop ngadto Kaniya.