“Te Rau ni Kaitarai Kangaangan te Maiu,” Ibukin Kakorakoraia Te Roronrikirake, Maati 2023.
Te Rau ni Kaitarai Kangaangan te Maiu
Te Uea Iesu Kristo e taetae nakoim inanon am kangaanga ni maium: “Raoi, bwaaka.”
Unimwaane Uchtdorf ma kairake n tain katanoataan te BYU–Pathway N te Aonaaba ni Beberuare 7, 2017.
Imwiin te anga reirei irarikin taari ae bwanin bongina, te Uea Iesu Kristo e tuangiia Ana reirei bwa a na rinuukan Namani Kariraia. Imwiin nakoia, Iesu e reke ana tabo ni motirawa iaon te booti ao e a matu.
N te tai ae waekoa e roo karawa, “e roko te ang ae baibati, ao a baroa te boti nao, ma ngaia are e a kani kebo” (taraa Mareko 4:37).
Tabeman ana reirei Iesu bon taan akawa aika a mwaatai ao a ata aron kaiean te kaibuke. Ma te buaka e reitinako n rang ni korakora, ao a moanna n nako nanoia. Te booti e nang tara n iinako.
Rinanon aikai ni kabane, Iesu e bon matu naba.
Ti aki ataia bwa maanra ana reirei n inimaki inanon te buaka, ma n tokina a bon aki kona n tataninga. A kauta Iesu man tang, “Te tia reirei, ko aki mutiakina matera?” (Mareko 4:38).
Kamatataaki n te Tamnei iroun Adam Howling
Te Kangaanga n te Maiu
Ngaira ni kabane ti na kaitara te kangaanga ae karina inanon maiura. Ko kona n taratarai kangaanga ni katobibia te aonaaba ke are ko mena inanona ao n namakina te rawawata, te bwarannano, ao te maraki n nano. Ko kona n rangi n nanokaawaki ibon iroum ke iroun temanna are ko tangiria. Ko kona n tabeaianga ke ni maaku ao n namakinna bwa ai bon akea am kantaninga ae kona kariaa.
Inanon taai aikai, ko kona n tang n ai aroia ana reirei Iesu, “Te tia reirei, ko aki mutiakinna ae N nang mate?”
Ngke rorou ngkami, teuana kunau ae I tatangiria “Master, the Tempest Is Raging.”(Te Tia Reirei E a Roko te Buaka)1 I kona ni katamneia are I mena n te kaibuke ngke “naon marawa [a] bwaro n rietata!” Mwakoron te kuna ae moan te kakaawaki ae moan te tikiraoi e kangai: “Karen te ang ma te nao a na ongo irou: Raoi, bwaaka.” Imwiina te rongorongo ae moan te kakaawaki: “(Akea te nao ae kona ni kaiinakoa te booti are e wene iai Uean taari ao te aba ma karawa).”
Imwiin tangiia Ana reirei ibukin buokaia, Iesu “e teirake, ao e boaa te ang, ao e taku nakon te nao, Raoi, bwaaka. Ao e bwaka te ang, ao e bati te aariki” (Mareko 4:39).
Ngkana kona butimwaea Iesu Kristo, “Uean te Raoi” (Itaia 9:6), nako aon am booti, ko kona ni karekea te rau ibuakon kangaanga ake a kawawata am iango ao kangaanga ma kakaewenako ake a riki nak oia aomata ake irarikim.
Taeka naba akanne ake e taekini Iesu nakon Tari are i Kariraia n tain te buaka n te tairiki n taai aika a tia n nako, E kangai nakoim inanon te kangaanga inanon maium: “Raoi, bwa aka.”
Katan iaon Mwaakana n Anga te Rau
Ko kona n iangoia bwa a kanga aron aia namakin ana reirei ngke a noora te ang, te karau, ao te nao n ongo n ana taeka te Tia Reirei? Ti te bwai ae a kona n taekinna bon, “Ao antai teuaei ngkai e ongo irouna te ang ma te nama?” (Mareko 4:41).
Iesu Kristo bon akea aekakina irouia aomata are e a tia n nakonako iaon te aonaaba aei. E roko bwa e na kamaiuira. N te Onaroka are i Ketetemane, E kabooi ara bure ni kabane. E teimatoa naba inanon marakira ni kabane ao rawawatara. Te korakai ae akea tokina aei ao te rawawata e katinakoa te rara man bwangabwangan kunna (taraa Ruka 22:44; Reirei ao Berita aika Tabu 19:18).
Te bwai are e karaoia te Uea man ana tangira ae kororaoi e riaon ara kona ni matata iai. Ma I ataia bwa E karaoia ibukiu, ibukim, ao ibukiia aomata ni kabane ake a maiu ke ake a tia ni maiu. E anga ni kabane bwa ti aonga ni karekei kakabwaia ni kabane.
Akea ae e na kona ni manga rinanon te korakai are e rinanona Iesu, ma ngkoe ao ngai tina kaitarai kangaanga ao karawawata. Ngkana ko onimakina te Uea, E na karekea te rau inanon am kangaanga, bwa E a tia n rinanona ni kabane. E korakai n anga ngaia ibukim ao iai mwaakana ni kakorakorako, ni kaungako, ao ni kakabwaiako.
E berita, “I katuka te rau i roumi, I anganingkami au rau: I aki anganingkami n ai aron te aba, ngkana e anga. “A na tai rawawata nanomi, ao a na tai maku” (Ioane 14:27).
Kawai nakon te Rau
Te Uea Iesu Kristo e a tia n angani ngkami kawai ake kona namakina iai Ana rau. E katanoata, “Reiakina taekau, ao ongo n au taeka; nakonako ma te nimamannei n Tamneiu, ao ko na karekea te rau mai irou” (Reirei ao Berita aika Tabu 19:23).
Reirei mai Irouna ni kamatebwaia Maiuna ao Ana reirei ni koroboki aika a tabu. Tabekarake nanom inanon te tataro. “Tei … n tabo aika a tabu,” n ikotaki ma te tembora (Reirei ao Berita aika Tabu 87:8; taraa naba 45:32).
Ongo n Ana taeka mairouia burabeti aika a maiu. Ira ana kairiri te Tamnei ae Raoiroi. Kabongana te bwaintangira mai karawa n te rairannano. Nakon Ana Ekaretia bwa kona raoraonaki, reireinaki, ao ni kamwarakeaki n taeka aika a raraoi aika ana taeka te Atua.
Nakonako ma te nimamannei n Tamneiu ao karika mweengam bwa te tabo are kona n namakina iai Tamneina. Buokiia aomata ao beku Ibukina ma te kimwareirei. Uringnga, “Iai te rau ni karaoan ae raoiroi.”2 Kataia n teimatoa ni kakaonimaki ao riki bwa te “tia [iriira] Kristo inanon te rau” (Moronaai 7:3).
Ngkana ko reirei, kakauongo, ao ko nakonako ma te Uea, ngkanne e na roko Ana berita ae korakora: Ko na karekea Ana rau.
Onimaki n Aki Kamwa ingaki
N raonaki ma onimakinan te Uea Iesu Kristo, ko kona n “aki kamwaingaki” ngkana e roko iaom kangaanga n te maiu. Te rau e kona n aki waekoa n roko n aron are e riki nakoia ana reirei i namani Kariraia, ma te Uea e na kakorakorako bwa ko na kona n rinanon kangaanga ake ko kaitarai.
Raou aika kam tangiraki, I kakoaua bwa Iesu Kristo e maiu.
E Tangiriko.
E kinako.
E ota n te bwai ae ko rinanona.
E na bon aki kiitaniko inanon n am tai ni kainnano.
Te rau ni koaua e roko ti mai Irouna. Ana rau e tauraoi ibukiia ni kabane ake a rairaki nakoIna.