“Kinatibuk-ang mga Baroganan, Piho nga mga Pagpili,” Alang sa Kalig-on sa mga Kabatan-onan, Mar. 2023.
Kinatibuk-ang mga Baroganan, Piho nga mga Pagpili
Unsaon ninyo sa paggamit ang kinatibuk-ang mga baroganan atol sa piho nga mga sitwasyon sa inyong kinabuhi?
Paghulagway pinaagi ni Josh Talbot
Aniay tulo ka kinutlo gikan sa tulo ka lain-laing mga propeta. Tan-awa kon mabantayan ba ninyo ang susama nga tema:
“O pagmaalamon; unsa pa ang akong ikadugang og sulti?”
“Ako dili makasulti kaninyo sa tanan nga butang diin kamo mahimo nga makabuhat og sala.”
“Ako mitudlo kanila sa husto nga mga baroganan, ug gidumala nila ang ilang mga kaugalingon.”
Mga Pagtulon-an sa mga Presidente sa Simbahan: Joseph Smith [2007], 343-344.
Maingon og ang mga propeta mihatag kanato og mga baroganan sa ebanghelyo sa Ginoo ug dayon anaa ra kanato ang pagsunod niini. Sila wala maghatag kanato sa matag kataposan nga detalye. Busa, unsaon nato sa pagdawat ang ilang mga pagtulon-an ug sa paggamit niini?
Unsaon Ninyo sa Paggamit ang mga Pagtulon-an sa mga Propeta?
Ang mga propeta mihatag kanato og mga sugo gikan sa Ginoo. Mitudlo usab sila kanato og mga baroganan ug mga sumbanan nga makatabang nato nga makagamit sa mahangtorong mga kamatuoran ug mga sugo—sama pananglit, diha sa Alang sa Kalig-on sa mga Kabatan-onan nga giya.
Apan ang mga miyembro sa Ang Simbahan ni Jesukristo sa mga Santos sa Ulahing mga Adlaw usahay maghunahuna mahitungod sa mga detalye—sa pihong mga butang nga angay natong buhaton aron mas makasunod sa mga baroganan sa ebanghelyo ug mga sugo. Sama pananglit, ang mga tawo maghunahuna sa tukma gayod kon unsa nga matang sa sapot ang nagpakita og tukma nga pagtahod sa ilang mga lawas. O maghunahuna sila unsa gayod ang ilang buhaton atol sa Igpapahulay aron sa pagbalaan niini.
Ang kinatibuk-ang mga baroganan mahimong gamiton sa managlahi nga pihong mga paagi sa managlahing katawhan, apan kita makapangita sa direksiyon sa Ginoo samtang kita mohimo sa atong tinagsa-tagsang mga pagpili aron kita mas mahiduol sa Dios.
Usa ka Makatabang nga Sundanan
Si Presidente Russell M. Nelson kausa mipasabot kon giunsa niya sa pag-atubang ang mga pagpili mahitungod sa pagbalaan sa adlaw nga Igpapahulay:
“Akong nasayran gikan sa mga kasulatan nga ang akong binuhatan ug kinaiya panahon sa Igpapahulay maoy usa ka timailhan tali kanako ug sa akong Langitnong Amahan. Ubos nianang pagsabot, wala na ko magkinahanglan og listahan sa angay buhaton ug dili buhaton. Kon kinahanglan nakong modesisyon nga ang usa ka kalihokan angay ba o dili angay alang sa Igpapahulay, mangutana lang ko sa akong kaugalingon, ‘Unsa man nga timailhan ang gusto nakong ihatag ngadto sa Dios?’ Kana nga pangutana nakapaklaro kaayo sa akong mga pagpili sa adlaw nga Igpapahulay” (Abr. 2015 nga kinatibuk-ang komperensiya, [Liahona, Mayo 2015, 130]).
Ang paagi ni Presidente Nelson sa pagtubag niining piho nga pangutana makahatag kanato og kinatibuk-ang sundanan alang sa paghimo og mga pagpili mahitungod sa mga sugo ug mga sumbanan. Aniay usa ka paagi sa inyong pagsulti niini:
Mahimo ninyong sundon kini nga sundanan gamit ang bisan unsang sugo o sumbanan—ang Pulong sa Kaalam, media ug kalingawan, musika, sekswal nga kaputli, ug gani ikapulo. Magkinahanglan kini og pipila ka buhat, apan igo ang sakripisyo sa pagbuhat niini.
Samtang imong tun-an kini nga mga butang, mahimo nimong basahon kon unsa ang gisulti sa mga kasulatan ug sa modernong mga propeta mahitungod niini, mamalandong, ug mag-ampo sa Langitnong Amahan. Ang Espiritu Santo makatabang nimo ug makadasig nimo sa paghimo og maayong mga pagpili.
Unsaon na man lang ang Pagpili sa Uban?
Timan-i nga si Presidente Nelson wala magsulti kanato kon unsang piho nga mga pagpili ang iyang gihimo mahitungod sa adlaw nga Igpapahulay. Iyang gipakita kanato kon sa unsang paagi kita makahimo og atong kaugalingon nga mga pagpili. Tingali kamo makahimo og daghan nga susamang mga pagpili nga iyang gihimo. Apan ang pinakapunto mao ang pagpaningkamot nga mahiduol sa Langitnong Amahan ug ni Jesukristo pinaagi sa atong mga pagpili.
Kon nakabantay kamo og usa ka tawo diha sa Simbahan nga wala mohimo og susama gayod sa imong gihimo, ayaw kabalaka bahin sa pagkorihir kanila. Sama sa giingon ni Reyna I. Aburto, kanhi Ikaduhang Magtatambag sa Kinatibuk-ang Kapangulohan sa Relief Society, “Sundon nato ang dalan sa Manluluwas ug palamboon ang atong kalooy, minosan ang atong kalagmitan nga mohukom, ug hunongon ang pagkahimong mga tigsusi sa espiritwalidad sa uban.” (Okt. 2019 nga kinatibuk-ang komperensiya [Liahona, Nob. 2019, 58]).
Mahimo ninyong hangopon ang eksakto nga mga baroganan nga gitudlo sa mga propeta. Mahimo ninyong ipunting ang uban ngadto sa Manluluwas, sa Iyang gugma, sa Iyang kalooy, ug sa Iyang mga sugo. Mahimo ninyong basahon ang Alang sa Kalig-on sa mga Kabatan-onan nga giya. Mahimo ninyong paningkamotan nga magpuyo og usa ka matinud-anon nga kinabuhi isip disipulo ni Jesukristo, magmahimong maayo nga ehemplo, ug mopaambit sa inyong espirituhanong mga kasinatian.
Kon kamo magpokus sa paghigugma sa Dios ug paghigugma sa uban, magiyahan kamo sa paghimo og mga pagpili nga makatabang ninyo ug sa uban nga magmalipayon.