“Sīsū Kalaisi: Nonga lotolotonga e Ngaahi Faingataʻá,” Ki Hono Fakamālohia ʻo e Toʻutupú, Māʻasi 2023.
Haʻu, ʻo Muimui ʻIate Au
Sīsū Kalaisi: Nonga lotolotonga e Ngaahi Faingataʻá
ʻI ha ngaahi ʻaho ʻe niʻihi, mahalo te ke ongoʻi ʻoku uesia koe ʻe he ngaahi faingataʻa ʻo e moʻuí. Ka ʻoku maʻu ʻe Sīsū Kalaisi ʻa e mālohi ke ʻomi kiate koe ʻa e nonga he ʻikai te ke toe maʻu ʻi ha feituʻu kehe.
Fiemālie, Peá Ke Tokalelei, tā ʻa Yongsung Kim
ʻI he vaeuaʻanga ʻo hoku taʻu fakaʻosi ʻi he ako māʻolungá, naʻá ku fuʻu ʻohovale lahi. Ne uiuiʻi ʻeku ongomātuʻá ke na tokangaʻi ʻa e Misiona Uruguay Montevideo, ʻa ia naʻe ʻuhinga ia te na hiki ki he ngataʻanga ʻe taha ʻo e māmaní fakataha mo e toko fā iiki hifo ʻiate aú. Naʻá ku ʻosi ongoʻi mafasia ʻi heʻeku teuteu ʻosi mei he ako māʻolungá, ka ko ʻeni te u ako toko taha pē ʻi he ʻunivēsití, kae nofo hoku fāmilí ʻi ha konitinēniti kehe. Ne u manavahē lahi.
Naʻe faingataʻa ʻaupito ʻeku hiki mei he akoʻanga māʻolungá ki he ʻunivēsití. Neongo ne ʻātakaiʻi au ʻe ha ngaahi kaungāloki angaʻofa mo ha fānau ako ʻe lauiafe, ka naʻe teʻeki ai ke u ongoʻi tuenoa ange. Naʻe taulōfuʻu e ngaahi faingataʻa ʻo e akó. Naʻe ʻikai ke u ʻilo pe ko e hā e meʻa ne u fie ako ki aí pea ne u faingataʻaʻia ʻi he ʻū kalasí. Naʻá ku fefaʻuhi foki mo ha vā fetuʻutaki naʻe kākā fakaeloto, ʻa ia naʻe uesia lahi ai ʻeku moʻui lelei fakaeʻatamaí. Naʻe lōmekina au ʻe heʻeku manavasiʻi ki he kahaʻú.
Ne ʻikai fuoloa mei ai kuo hoko ʻa e ongoʻi loto-mafasiá, ilifiá, mo e taʻelatá ko ha meʻa ke faingataʻa ai ʻeku ngāué. Naʻa mo e ngaahi ngāue angamahení ne ongoʻi taʻemalava ia. ʻI ha pongipongi ʻe taha, naʻá ku kole ki he Tamai Hēvaní ke foaki mai ha ivi ke u lavaʻi e ʻaho ko iá. Naʻá ku lotu, “He ʻikai ke u kei lava ʻo fakahoko toko taha ʻeni.” ʻI ha momeniti hāhāmolofia ʻo e mahino fakaʻatamaí mo fakaelotó, ne haʻu ai ki hoku ʻatamaí ʻa e ngaahi lea ko ʻení, “ʻOku ʻikai fiemaʻu ia ke ke pehē.” Ne fonu hoku ʻatamaí ʻi he nongá. Naʻe fakanonga ʻa e ngaahi faingataʻa ne u fakakaukauʻí.
Naʻe ʻikai faingofua ʻa e ngaahi māhina siʻi (mo e ngaahi taʻu) hono hokó. Naʻe ʻikai mole vave atu ʻeku ongoʻi loto-mafasiá mo e taʻelatá. Ka ko e fuofua taimi ia ne mahino ai kiate au ʻi ha tuʻunga fakataautaha ʻa e ʻuhinga ʻo e maʻu ha Fakamoʻuí. Naʻá ku ʻiloʻi naʻe mahino kiate Ia hoku ngaahi faingataʻaʻiá mo hoku mamahí. Naʻá ku ʻiloʻi ko Ia pē ʻa e tokotaha te Ne lava ʻo tokoniʻi aú, pea naʻá Ne fai ia.
Hili ha ngaahi taʻu lahi mei ai, kuó u ʻosi ngāue fakafaifekau, ʻosi mei he ʻunivēsití, peá u mali fiefia. Pea ʻoku ou ʻilo naʻe ʻikai ke u mei lavaʻi ha taha ʻo e ngaahi taumuʻa ko iá kapau naʻe ʻikai ke u falala ki he ʻEikí.
Laʻitā mei he Getty Images
Fiemālie, Pea ke Tokalelei
Naʻe tōfā ʻa Sīsū ʻi he vaka ne ʻi ai mo ʻEne kau ʻAposetoló ʻi he tō mai ha fuʻu afā lahí. Naʻe fafangu ʻe he kau ʻAposetoló ʻa Sīsū mo pehē, “ʻEiki, ʻoku ʻikai te ke [tokanga] te tau mate?” (Maʻake 4:38). ʻI he taimi pē naʻa nau fakakaukau ai te nau mate ʻi he matangi mālohí, naʻe tuʻu hake ʻa e ʻEikí ʻo “lolomi ʻa e matangí, mo ne pehē ki he tahí, Fiemālie, peá ke tokalelei. Pea naʻe malū ʻa e matangí, ʻo matuʻaki tofukī” (Maʻake 4:39).
Kuo tuʻo fiha nai hoʻo fifili ʻi hoʻo moʻuí, “ʻOku ʻikai te ke tokanga te u mate?” ʻI he taimi ʻe niʻihi, ʻi hoʻo aʻusia ha ngaahi ʻahiʻahi faingataʻá, ʻe faingofua pē ke ke ongoʻi tuenoa mo liʻekina. Mahalo te ke fifili pe ko e hā ʻoku ʻikai fakaleleiʻi ai ʻe he ʻEikí ho ngaahi faingataʻaʻiá. Mahalo ʻe hangē he ʻikai teitei aʻusia ʻe hoʻo moʻuí ʻa e “matuʻaki tofukī” ʻoku talanoa ki ai ʻa e veesi 39.
Ka neongo ia, ko ha konga mahuʻinga ʻo e talanoá ni ko e tefitoʻi moʻoni naʻe hoko atu ki ai e akoʻi ʻa e Fakamoʻuí. Naʻá ne folofola ʻo pehē: “Ko e hā ʻoku mou manavasiʻi pehē aí? Ko e hā ʻoku ʻikai ai haʻamou tuí?” (Maʻake 4:40). ʻI he momeniti ʻo e manavahē mo e loto-foʻi ʻa e kau ʻAposetoló, naʻe ngalo ʻiate kinautolu ʻa e tokotaha naʻe ʻiate kinautolú. Naʻe tōfā ʻa e ʻAlo ʻo e ʻOtuá, ʻa ia naʻá Ne fakatupu ʻa e māmaní, ʻi honau vaká. Ko e hā ka nau ka manavahē ai?
ʻI he ʻuhinga tatau pē, ʻoku maʻu ʻe he Fakamoʻuí ʻa e mālohi ke fakanonga ha faʻahinga faingataʻa pē ʻi hoʻo moʻuí. Te Ne lava ʻo fakamoʻui ho mamahí, fakamaʻamaʻa ho ngaahi kavengá, mo ʻomi ha maama ʻi he taimi ʻokú ke ʻi he fakapoʻulí aí. Ko hoʻo konga ʻi he founga ko ʻení ke fakatupulaki ha tui ʻoku lahi angé kia Sīsū Kalaisi.
Ko Hono Maʻu ha Mālohi mei he ʻEikí
ʻE lava ke ʻomi ʻe he moʻui ʻaki ha tui lahi angé ha mālohi lahi ange ʻo Kalaisi ki hoʻo moʻuí. ʻI he taimi naʻe fakaʻosi ai ʻe Lasafimalasa mei Matakasikā ha taʻu faingataʻa ʻo e akó, naʻe mālōlō ʻene mehikitangá. Naʻá ne loto-mamahi ʻaupito. Naʻe meimei taʻemalava ke tukutaha ʻene tokangá ki he akó. Naʻá ne teuteu ke fai e sivi fakaʻosi ʻo e taʻú. Naʻá ne lotu ʻo pehē, “Kātaki ʻo toʻo atu hoku mamahí pea foaki mai ha ivi ke u kau atu ki he siví ʻapongipongi.” Hili ʻene lotú, naʻe ongoʻi ʻe Lasafimalasa naʻe fakamālohia ia. Naʻá ne pehē, “Naʻá ku ongoʻi ʻo hangē kuo ngalo ʻeku loto-mamahí. ʻOku foaki mai ʻe he ʻOtuá kiate au ʻa e mālohi ke fai ha faʻahinga meʻa pē.”
ʻOku mahuʻinga ke manatuʻi ko e taimi ʻe niʻihi ʻoku fakanonga ʻe he ʻEikí ʻa e ngaahi faingataʻa ʻi hoʻo moʻuí, pea taimi ʻe niʻihi ʻokú Ne fakanonga mo fakafiemālieʻi koe lolotonga e hokohoko atu ʻa e faingataʻá. ʻI he taimi ʻokú ke tui ai kiate Iá, ʻokú ke falala foki ai ki Hono finangaló mo ʻEne taimí. ʻOkú ke tui te Ne tokoniʻi koe, ʻo tatau ai pē pe ko e fē taimi ʻe hoko mai ai ʻa e nongá mo e fiemālié kiate koé.
Falala ki Heʻene Taimí
ʻOku maheni ha finemui ko hono hingoá ko Ane mo e ngaahi ongoʻi manavasiʻí. ʻOkú ne pehē, “ʻOku ou fekuki mo e loto-hohaʻa lahi mo e kiʻi ADHD (fetōʻaki e tokangá ʻi he fuʻu longomoʻuí). Ko e taimi ʻe niʻihi, ʻoku ou faʻa ongoʻi ʻoku maʻuhala e niʻihi kehé kiate au, pea ʻoku faingataʻa ke u tauhi ha fakakaukau ʻoku taʻengatá. Naʻá ku lau kimuí ni ʻi he tohi Sēnesí fekauʻaki mo Sēlai, ʻa ia naʻe pau ke tatali ʻi ha ngaahi taʻu lahi kimuʻa peá ne toki fāʻeleʻi ha tama. Naʻá ku ako ai mahalo naʻa fiemaʻu ke u tatali ʻi ha taimi lōloa ke fakamoʻui foki mo au. ʻOku ou ʻilo he ʻikai liʻaki au ʻe Kalaisi ʻi he taimi ʻoku ou aʻusia ai ʻa e loto-hohaʻá. ʻOkú Ne ʻi ai ke tokoniʻi au ke u ikunaʻi ia.”
ʻOku ʻikai ʻuhinga ʻa e fili ke falala ki he ʻEikí ke ke tukunoaʻi ai e ngaahi faingataʻa lahi ʻi hoʻo moʻuí. Ka neongo ia, ʻoku ʻuhinga ia ʻoku totonu ke ke “nofotaha he lelei taʻe fakangatangata, angalelei, mo e mālohi lahi ʻo [hoʻo] ʻOtuá, [ʻo] falala kiate Ia … ʻaki ha loto-fiefia.”1 ʻI he taimi ʻokú ke taʻelata, loto-mamahi, hohaʻa, pe tatali ai ki he ngaahi tāpuaki kuo talaʻofa maí, manatuʻi ʻa e fehuʻi ko ʻení: ʻOkú ke tatali nai ki ha “[fiemālie lahi]” ʻi ha loto-ilifia pe ʻi ha loto-faivelenga?