“Giunsa sa Manluluwas Pagtratar ang mga Babaye,” Alang sa Kalig-on sa mga Kabatan-onan, Mar. 2023.
Giunsa sa Manuluwas Pagtratar ang mga Babaye
Kita mahimong mosunod sa ehemplo ni Jesukristo bahin sa pagpakita og pagkamabination ug pagtahod ngadto sa mga babaye sa atong kinabuhi.
Mga paghulagway pinaagi ni Rose Datoc Dall
Sa Bag-ong Tugon, si Jesukristo kanunayng nagtudlo og wala damha nga mga butang. (Sama sa: kita kinahanglang mohigugma sa atong mga kaaway ug iampo kadtong naglutos kanato?1)
Pipila niini nga mga pagtulon-an nahisupak sa kultura nianang panahona. Apan ang Manluluwas wala mouyon-uyon niini. Siya naningkamot sa pagtudlo sa mas taas nga balaod ug sa pagpakita kanato kon unsaon pagtratar sa usag usa. Siya nagpakita og ehemplo sa paghigugma nga dili limitado sa piho nga edad, gender, o nasyonalidad.
Sa panahon ni Jesus, ang mga babaye kasagaran gipakaubos. Ug sa pipila ka kultura karon, ang mga babaye kasagaran wala gitratar nga may pagtahod. Tingali nagpuyo ka og usa ka lugar nga sama niana. Kon mao, makapakita ka og sama kang Kristo nga ehemplo alang sa imong komunidad pinaagi sa pagkamabination ug pagkamatinahoron sa tanan—lakip na sa mga batang babaye ug mga babaye sa imong kinabuhi.
Si Jesus Nagpangga sa Iyang Inahan
Ang unang milagro ni Jesukristo sa publiko mao kadtong usa nga nakatabang sa Iyang inahan. Ang Iyang inahan ang responsable sa pagtabang sa pagpakaon sa mga tawo atol sa kasal. Sa dihang nahutdan na sila og mainom, gihimo ni Jesus og bino ang tubig aron mapaigo sa mga bisita.
Ang mga pulong sa tubag ni Jesus ngadto sa Iyang inahan niana nga pakigsultihanay morag walay pagtahod kon paminawon sa atong panahon karon: “Babaye, unsa may labot nato niana?” (Juan 2:4). Apan giklaro ni Joseph Smith nga si Jesus nangutana sa iyang inahan kon unsa ang iyang gikinahanglan: “Babaye, unsa man ang imong gustong ipabuhat nako alang nimo?”2. Ug ang pagtawag sa usa ka tawo og “babaye” kaniadto usa ka pagtahod. Siya sama ra nga nag-ingon og, “Babaye, bisan unsay imong pangayoon uban sa hugot nga pagtuo, ako kining ihatag kanimo.”3
Mga tulo ka tuig ang milabay human niana. Sa wala pa gayod Siya mamatay diha sa krus, usa sa kataposang mga butang nga gihimo ni Jesus mao ang pagsiguro nga ang Iyang inahan maatiman.
“Miingon siya sa iyang inahan, Babaye, siya ang imong anak! Unya miingon siya sa tinun-an, Siya ang imong inahan! Sukad niadto gidala sa tinun-an si Maria aron didto na mopuyo sa iyang balay” (Juan 19:26–27).
Si Jesus Mitratar nga may Pagtahod sa Sinalikway nga mga Babaye
Kita adunay labing minos duha ka ehemplo sa Manluluwas nga nagtratar nga may pagtahod sa mga babaye nga gisalikway sa katilingban.
Sa panahon sa Manluluwas, kadaghanan sa mga Judeo ubos og pagtan-aw sa mga tawo nga Samarianhon. Apan sa dihang si Jesukristo nakahimamat og usa ka babaye nga Samarianhon didto sa atabay, Siya mitratar niya nga may kalooy ug pagtahod. Labaw pa niana, mao kadtong higayona sa pagpakig-istorya niya nga Siya unang mipadayag sa Iyang kaugalingon nga mao ang gisaad nga Manluluwas!4 (Tan-awa sa Juan 4.)
Sa laing sitwasyon, usa ka babaye ang nasakpan nga nakahimo og dakong sala. Sumala sa balaod sa mga Judeo, kinahanglan siya nga labayon og bato hangtod mamatay. Sa dihang ang mga lider midala niini nga babaye ngadto sa Manluluwas, Siya nangutana nila og usa ka pangutana nga maoy hinungdan nga sila mihunong ug naghunahuna. Sila wala molabay niya og bato. Dayon ang Manluluwas midapit niya sa paghinulsol, nag-ingon, “Lakaw ug ayaw na pagpakasala” (Juan 8:11).
Si Jesus Mipakita ngadto sa mga Babaye human sa Iyang Pagkabanhaw
Human sa pagkabanhaw ni Jesus, Siya unang mibisita ni Maria Magdalena, kinsa nagbangotan didto sa Iyang lubnganan (tan-awa sa Juan 20:11–18). Ubang mga babaye—si Juana, ingon man usab si Maria nga inahan ni Santiago—mao ang kauban sa unang nakahibalo sa nabanhaw nga Ginoo. Ang mga anghel midapit nila sa pagpaambit sa ilang mga pagpamatuod sa unsay ilang nakita. (Tan-awa sa Lucas 24:1–10.)
Kita Makasunod sa Iyang Ehemplo
Unsa ang atong mahimo aron makasunod sa ehemplo sa Manluluwas bahin sa pagtahod sa mga babaye?
Ang atong propeta, si Presidente Russell M. Nelson, adunay daghang nahimo niining dapita. Nagpadako siya og siyam ka anak nga mga babaye ug usa ka lalaki uban sa iyang asawa nga si Dantzel. Human sa pagkamatay sa iyang asawa, naminyo siya ni Wendy Nelson.
“Motahod kita sa mga sister—dili lang sa atong kaugalingong mga pamilya apan sa tanang talagsaon nga mga sister sa atong kinabuhi,” siya mitudlo.5
Himoon nato kining bulana nga puno sa pagkamadasigon, Kristohanong gugma ug pagkamabination ngadto sa mga babaye sa atong kinabuhi. Kamo adunay igong gahom sa pag-usab sa kalibotan, usa ka relasyon sa usa ka higayon!