“Pagkahimong usa ka Tinuod nga Kampeyon,” Alang sa Kalig-on sa mga Kabatan-onan, Mar. 2023.
Pagkahimong usa ka Tinuod nga Kampeyon
Si Felipe usa sa labing maayo sa kalibotan sa martial arts sama sa karate, judo, ug MMA. Apan ang pagserbisyo og misyon maoy numero uno niyang prayoridad.
Mga litrato pinaagi ni Shirley Brito
Si Felipe F. nga taga-Pará, Brazil, dili inyong kasarangan nga edad nga 18-anyos. Midula siya sa propesyonal nga mga kompetisyon sa mixed martial arts (MMA), judo, ug karate. Ug siya maayo kaayo sa unsay iyang gihimo. Nakadaog siya sa Internasyonal nga Iron Man MMA nga kompetisyon. Siya duha ka higayon nga nahimong Pará state nga kampeyon, usa ka Brazilian vice nga kampeyon, ug internasyonal vice nga kampeyon sa judo. Ug siya 10 ka higayon nga nahimong Pará state nga kampeyon, 10 ka higayon nga Brazilian nga kampeyon, usa ka South American nga kampeyon, usa ka higayon nga Pan-American nga kampeyon, ug 3 ka higayon nga tibuok kalibotan nga kampeyon sa karate. Wow!
Ang mga Hinungdan sa Iyang Kalamposan
Si Felipe nagbansay na sukad siya nag-siyete anyos. Apan mituo siya nga ang labing dako nga hinungdan sa iyang kalamposan mao ang Dios. “Kanunay ko nga mag-ampo alang sa tabang sa Ginoo,” miingon siya.
Atol sa iyang kataposan nga Pan-American karate nga kampeyonato, si Felipe wala kaayo mobati nga masaligon. Apan dayon ang iyang papa mihatag kaniya og panalangin sa pagkapari. “Human niana mas maayo na ang akong hunahuna, ug kadto nakatabang nako nga modaog sa kampeyonato niadtong adlawa. Ang kataposang duha ka away nga akong nadaog, may usa ka segundo ra kong nahibilin. Ang tanan nagtuo nga kadto imposible. Nakahimo ko og wala dahoma nga lihok nga nakatabang nako nga modaog, ug alang nako, tanan kadto tungod sa panalangin sa akong papa.”
Ang iyang papa nakahatag niya og daghang panalangin sulod sa katuigan. Nahibalo si Felipe nga ang pagkadawat og panalangin wala magpasabot nga siya kanunayng makadaog, apan siya nagtuo nga ang Ginoo makatabang niya nga magpabiling nakapokus ug mopalambo sa iyang mga talento. “Kini nakatabang nako nga mahimong mas masaligon,” miingon si Felipe. “Nahibalo ko nga bisan unsa man ang resulta, ang kamot sa Ginoo anaa didto.”
Ang tanan sa iyang pamilya kanunay nga usa ka dakong suporta usab. Sa usa ka MMA nga torneyo, si Felipe nakakita sa iyang pamilya nga didto sa mga lingkoranan. “Tanan sila didto nga nagsinggit sa akong ngalan. Wala koy pulong nga malitok.” Midugang siya, “nagpasalamat ko og dako kaayo sa akong papa ug mama, kinsa mipakita kanako sa husto nga dalan.”
Si Felipe mibati nga ang pagsubay niana nga dalan nakatabang kaniya sa iyang esport. Sa kasagaran kataw-an siya sa iyang mga higala kon dili siya mobuhat sa mga butang nga ilang gibuhat. Apan si Felipe wala magmahay niini. “Sama nga ang ebanghelyo nagdala og mga panalangin, sa esport kini nagdala usab og mga kalamposan! Ang akong wala pagkuyog sa akong mga higala ngadto sa party ug ang pagkaon sa maayong mga pagkaon parehas nga nakaimpluwensiya sa resulta.”
Pagdesisyon nga Moserbisyo og Misyon
Karon nga siya nag-18 na, si Felipe dunay daghan nga oportunidad. Siya bag-o lang gidapit nga mobansay sa usa ka inila nga MMA academy, ug adunay mga tanyag gikan sa mga tigdumala sa tibuok kalibotan. Apan gusto siyang moserbisyo una og misyon.
“Alang nako, usa kana ka sayon nga pagpili,” miingon siya. “Ang Ginoo mao ang una. Ang uban makahulat ra, kay Siya kanunay nga mopanalangin kaninyo sa pagkamasulondon.”
Ang magulang nga lalaki ni Felipe si Júnior, kinsa bag-o lang nauli gikan sa misyon, usa ka bahin nga nakadasig kaniya. Gisultihan niya si Felipe nga walay laing labing maayo kay sa pagserbisyo og misyon ug nga siya kinahanglan nga moadto bisan og ang mga tawo maningkamot sa pagkombinser nga siya dili moadto.
Ug adunay mga tawo nga moingon ni Felipe sa dili pag-adto. Daghang tawo nga iyang paryente dili mga miyembro sa Simbahan. “Wala sila makasabot nga ang pagserbisyo og misyon adunay mas dako nga bili kay sa pagkahimong adunahan ug inila. Naningkamot lang ko nga makatudlo sa ebanghelyo kon kana nga mga higayon mahitabo,” miingon si Felipe. Ug usa niana nga mga higayon migiya ngadto sa usa ka puno sa gahom nga kasinatian sa pagka-misyonaryo.
Ang ig-agaw ni Felipe bag-o lang namatay, ug ang uyoan ni Felipe nagbangotan sa pagkamatay sa iyang anak nga lalaki. Gisultihan ni Felipe ang iyang uyoan mahitungod sa plano sa kaluwasan. Pagkahuman ang iyang uyoan migakos kaniya ug nangayo og pasaylo sa pagsulti kaniya sa dili pagmisyon. “Giingnan ko niya nga ako dunay gasa sa pagtandog sa kasingkasing sa mga tawo ug nga ako kinahanglan nga moserbisyo,” nahinumdom si Felipe. “Usa kadto ka espesyal nga gutlo alang nako dihang ang usa ka tawo kinsa walay ideya kon unsa ang misyon nakasabot sa tinuod nga katuyoan niini.”
Si Felipe adunay mga panahon dihang siya mismo dili sigurado mahitungod sa pagmisyon. “Gibasa nako ang akong mga kasulatan matag adlaw, ug usa ka gabii duna koy daghang pagduha-duha mahitungod sa akong pagpili. Nagsugod ko sa paghunahuna, ‘Angay ba kong magpabilin ug makigsangka pa og diyutay?’ Apan akong nabasa diha sa Basahon ni Mormon ang mahitungod sa mga Nephite nga nagsugod sa pagkadili mapasalamaton ug puno sa garbo. Gitudloan sila ni Jacob nga kinahanglan nila nga unahon ang Ginoo. [Tan-awa sa Jacob 2:12–21.] Niana nga gutlo, wala ko magduha-duha sa akong pagpili.”
“Karon nahibalo na ko unsay akong gusto, ug nahibalo ko nga mouli ko gikan sa akong misyon ug mapanalanginan sa pipila ka paagi. Tingali sa MMA o sa uban nga butang, apan nasayod ko ang Dios mohatag nato sa unsay atong gikinahanglan.”
Ang Gahom sa Inadlaw-adlaw nga Pagkakabig
Si Felipe dili kanunay mobati og kahinam ug kamasaligon mahitungod sa pagmisyon—o sa Simbahan. “Dunay panahon sa akong kinabuhi nga ako dili ingon kalig-on sa ebanghelyo, ug kini nagpabatyag kanunay nga adunay butang nga kulang,” miingon siya. “Kaila ka ba nianang tawhana kinsa moadto lang sa simbahan ug walay buhaton? Mao kana ako.” Human makigsulti sa iyang igsoong lalaki ug sa bishop mahitungod sa pagserbisyo og misyon, siya mihukom nga magsugod sa pag-ampo ug pagbasa sa iyang mga kasulatan matag adlaw.
“Tingali ang nakatabang nako mao ang inadlaw-adlaw nga pagkakabig. Nagdako ko sa Simbahan, ug sulod sa panahon wala ko magtinguha alang sa pagkakabig tungod kay nagtubo ko sa panimalay nga adunay pagtuo ug naghunahuna nga kadto igo na. Apan karon nangita ko og usa ka pagpamatuod matag adlaw.”
Usa ka Kampeyon Tungod sa Ginoo
Nahibalo si Felipe nga ang pagpili sa husto wala magpasabot nga kanunay siyang modaog o maayo ra ang mga butang. “Nakahinumdom ko nga miadto sa usa ka kompetisyon nga naghunahuna nga ako andam, ug napildi ko sa unang hugna. Laing panahon mao nga naa ra ko sa balay nga usa ka angol. Nahinumdom ko nga nakamata og sayo, nagtan-aw sa kisame, naghunahuna kon kini igo ba. Usahay gusto lang ko nga mokaob ug matulog og balik, apan mibarog ko ug miadto alang sa pagbansay. Ang pagkahimong kampeyon molapas pa sa gutlo nga modaog. Siya mao ang tawo kinsa mobuntog sa matag adlaw, mobuntog sa kapakyasan, mobuntog sa mga pagsulay.”
Ang Manluluwas mao ang nagdasig ni Felipe nga mabuntog ang tanang aspeto sa kinabuhi. “Kon gusto kita nga mahimong sama kon unsa Siya, kita kinahanglan nga mohimo sama sa unsay Iyang gihimo, nga kanunayng maningkamot sa pagbarog nga lig-on, molig-on sa atong kaugalingon, ug maghunahuna sa unsay Iyang buhaton. Kana nagdasig kanako sa akong mga lihok sa matag adlaw, nga mahisama Kaniya. Kon makakita ko og butang nga puwede nakong usabon, mag-ampo ko ug mangayo og pasaylo, maningkamot nga mahimong mas maayo sa kanunay. Ang tinuod nga kampeyon mao ang tawo kinsa natumba sa daghang higayon ug gani taliwala sa mga kasagmuyo mobarog ug magpadayon.”
“Usa ako ka kampeyon tungod sa Ginoo,” miingon si Felipe. “Kon dili pa tungod Kaniya, wala koy ideya kon asa kaha ako. Apan sigurado ko nga wala kanako ang tanan nga unsay ania nako karon. Ang pagpakabuhi sa ebanghelyo naghimo kanako nga kampeyon sa kinabuhi ug sa mga esport.”