Ako Makahimo sa Tanan nga Butang pinaagi kang Kristo

Ang kabatan-onan nagpaambit kon sa unsang paagi si Kristo milig-on kanila sa pagbuhat sa lisod nga mga butang (tan-awa sa Mga Taga-Filipos 4:13).

Ang Manluluwas Nasayod Unsaon sa Pagtabang Kanako nga Makasugakod sa Kanser

Ang akong kinabuhi normal ra kaayo hangtod sa 2020 nga tingtugnaw. Nagkasakit ko sa among gihunahuna nga usa ka impeksiyon, mao nga mitumar ko sa giresita nga mga antibiotic. Sa wala madugay, nagsugod ko nga mibati og siging sakit sa ulo, kakapoy, ug kakuyapon. Wala madugay nakamata ko mga alas 10:00 sa gabii nagtuo nga buntag na ug nangandam nga moeskwela.

Dihang ang akong magulang nga igsoong babaye miingon nga gabii pa, midagan ko sa kwarto sa akong mga ginikanan nga mibati og kabalaka. Gihikap ni mama ang akong ulo, ug duna koy taas kaayong hilanat. Nangadto mi sa doktor pagkasunod nga adlaw, kinsa mihimo og daghan kaayo nga mga pagsusi.

Nianang gabhiona ang akong mga ginikanan misulod sa akong kwarto, nga nanaghilak. Ila kong giingnan nga duna koy leukemia ug kami kinahanglang moadto sa ospital aron makakuha og dugang nga mga tubag. Didto ko sa emergency room sa tibuok gabii ug gisugdan ang akong chemotherapy nga pagtambal pipila lamang ka adlaw human niana.

Ang pagtambal kanako magpadayon hangtod sa usa o duha ka tuig, apan mas nagkabintaha na kini. Sa kasamtangan maarang-arang na ang akong gibati ug nanghinaot nga maka-eskwela na og balik sa dili madugay. Dili gayod kadto sayon, hinoon. Ang pag-chemo dunay daghang epekto, lakip ang kondisyon sa bukog nga gitawag og avascular necrosis nga nagpalisod sa akong paglakaw.

Bisan pa niining tanan—gani tingali tungod niini—milambo pag-ayo ang akong pagkasuod sa Langitnong Amahan. Karon ako nakabaton og mas lawom nga panabot bahin sa Pag-ula ni Jesukristo. Kaniadto naghunahuna ko sa Iyang Pag-ula isip butang nga imo lamang gikinahanglan kon ikaw makahimo og sayop. Kana usa ka bahin niini, apan ang pagsalig sa Manluluwas usa usab ka butang nga nakatabang nako nga mominos ang pagbati nga nag-inusara.

Gidala ni Jesukristo sa Iyang kaugalingon ang tanan nga atong mga kasakitan ug mga sala, diin kini nagpasabot nga Siya nasayod sa eksakto gayod kon unsaon sa pagtabang kanako samtang nagsinati ako og leukemia. Ang pagsinati sa bisan unsang pagsulay mopabati og labihan nga pag-inusara, apan pinaagi sa Pag-ula ni Kristo, kita makabaton og kahupayan sa pagkasayod nga Siya sa tinuod nakasabot unsay atong gisinati.

Ruby H., Utah, USA