“Unsaon nako nga mas matabangan ang akong mga higala kinsa dili aktibo sa Simbahan nga malig-on ang ilang mga pagpamatuod?,” Alang sa Kalig-on sa mga Kabatan-onan, Mar. 2023.
Mga Pangutana ug Mga Tubag
“Unsaon nako nga mas matabangan ang akong mga higala kinsa dili aktibo sa Simbahan nga malig-on ang ilang mga pagpamatuod?”
Magmahimong usa ka Panalangin ngadto sa Uban
“Kon ako mosulay sa pagtabang og usa ka higala aron malig-on ang iyang personal nga pagpamatuod, maningkamot ko nga mahimong panalangin ug suporta sa iyang kinabuhi. Maningkamot ko nga mahimong ehemplo ug ipakita kaniya nga ang ebanghelyo ni Kristo makalig-on sa iyang pagpakighigala ug sa mga relasyon sa pamilya kon siya maningkamot nga magmasulundon ug magmatarong. Gusto ko nga tabangan siyang mobati nga gihigugma.”
Selina O., 19, Bolivia
Kanunay nga Modapit
“Ikaw makatudlo sa imong mga higala mahitungod sa gugma ug kalooy ni Jesukristo ug sa unsang paagi Siya makatabang kanila. Dapita sila sa pag-adto sa simbahan ug pagtambong sa mga klase sa kabatan-onan uban nimo. Kini makatabang nila aron makapalambo og lig-ong pagpamatuod ni Jesukristo.”
Shara R., 12, Colombia
Higalaon Nimo Sila og Una
“Kanunay kong maningkamot nga makapahilakip ug mosiguro nga ang akong mga higala nasayod nga ako naghunahuna kanila. Nasayod ko nga ako mahimo nga usa ka kahayag kanila samtang akong ipadayon ang akong pagpakighigala ug paghigugma. Makadapit ko sa akong mga higala ngadto sa mga kalihokan sa Simbahan, apan ako kanunay ang una nilang tinuod nga higala. Ang imong mga higala mopalig-on sa ilang mga pagpamatuod samtang ilang makita ang mahigugmaong ehemplo ug makasuporta nga paghigalaay.”
Mia D., 19, Florida, USA
Si Kristo Motabang Kanimo
“Lisod ang pagbaton og dili kaayo aktibong mga higala, apan gusto kong modapit sa akong mga higala ngadto sa makalingaw nga kalihokan sa kabatan-onan o sa simbahan kon mohatag ko og pakigpulong. Kon mopakita sila og interes, hatagan nako sila og Basahon ni Mormon sulatan sa akong pagpamatuod ug i-highlight ang mga bersikulo nga importante kanako. Hinumdomi, nga si Kristo motabang ninyo sa bisan unsang sitwasyon.”
Elizabeth B., 15, Florida, USA
Pagmabination Lang
“Akong gipangutana sa akong titser sa seminary kini nga pangutana. Miingon siya, ‘Pagmabination lang, Jordan. Nagbuhat ka na sa eksakto nga butang.’ Sa sinugdanan, naghunahuna ko, ‘Ang pagkahimong mabination lamang dili paigo.’ Apan naghunahuna dayon ko bahin sa akong higala kinsa nagkinahanglan sa akong pagpakighigala ug ehemplo. Ang Espiritu nagtabang nako nga magmabination ug makahibalo unsay isulti. Karon, gusto na siyang magpabunyag sa moabot nga adlaw!”
Jordan S., 17, Utah, USA