“Fakafehokotaki,” Ki Hono Fakamālohia ʻo e Toʻu Tupú, ʻEpeleli 2023.
Fakafehokotaki
Natālia S.
17, Tenisī, ʻIunaiteti Siteiti ʻo ʻAmeliká
Faitā ʻa Christina Smith
Naʻe fāʻeleʻi au ʻi Memifisi pea kuó u tupu hake ʻi Tenesī ʻi he kotoa ʻo ʻeku moʻuí. Naʻá ku kamata heka hoosi ʻi hoku taʻu valú nai peá u ngāue ke totongi ʻeku ngaahi lēsoní. Ko e taha ʻeku ngāue maʻuʻanga moʻui ʻi he taimi ní ko hono akoʻi e fanga hōsí.
Kuo akoʻi lahi au ʻe heʻeku akoʻi e fanga hōsí fekauʻaki mo hono moʻui ʻaki e ngaahi tefitoʻi moʻoni ʻo e ongoongoleleí. ʻOku fiemaʻu ha taimi lahi mo ha ngāue lahi ki hono akoʻi foʻou ʻo e fanga hōsí. Naʻe ʻi ai e hoosi ʻe taha ne feʻunga mo ha māhina ʻe ono ke akoʻi ia kae ʻoua kuó ne fiemālie ke heka ai ha taha. Naʻe fiemaʻu ki ai ha faʻa kātaki lahi.
Ko e taimi ʻe niʻihi ʻoku ou ongoʻi ʻoku lahi e ngaahi meʻa ʻoku hoko ʻi heʻeku moʻuí, pea ʻoku faingataʻa. ʻOku ou fakapalanisi e ngaahi kaungāmeʻá, akó, mo e fāmilí lolotonga ʻeku akoʻi e heka hōsí, taki takimamata ʻi he fale tauhiʻanga ʻo e fanga monumanú, mo tokangaʻi e fanga hōsí.
Ka ʻoku lava ke u ongoʻi ʻa e nonga ʻo e Laumālié ʻi he taimi ʻoku ou ʻi tuʻa ai ʻi he fanga hōsí. ʻOku ou lava ʻo ongoʻi ʻa e nongá, fanongo ki he Laumālié, mo ʻiloʻi ʻa e meʻa ʻoku fiemaʻu ke u faí.