“Tau Ō ʻo Toutai,” Ki Hono Fakamālohia ʻo e Toʻu Tupú, ʻEpeleli 2023.
Tau Ō ʻo Toutai
Ko ha maʻuʻanga tokoni ki he kau palesitenisī fakakōlomú mo e fakakalasí.
Ngaahi tā fakatātā ʻa Jarom Vogel
Ko e tokolahi ʻo e kau ākonga ʻa Sīsū Kalaisi ʻi he kuonga muʻá naʻa nau ngāue ko ha kau toutai. ʻI he taimi naʻe ui ai kinautolu ʻe he Fakamoʻuí, naʻá Ne folofola, “Muimui ʻiate au, pea te u ngaohi ʻa kimoua ko e toutai tangata” (Mātiu 4:18–20).
Naʻe ʻikai kole ʻa e Fakamoʻuí ki heʻene kau ākongá ke ʻai ha mounu ki ha mātaʻu, ʻo lī ia ki ha kakai tokolahi, pea ʻomi ha taha pē te ne fili ke loto ke haʻú. Ka, naʻe ʻuhinga ʻa e Fakamoʻuí ko e fatongia ʻo ʻEne kau ākongá, ke tokoniʻi e kakaí ke nau haʻu kia Kalaisi pea maʻu ʻa e melinó ʻiate Ia.
ʻOkú ke hoko foki ko ha “toutai tangata”! Pea kapau ʻokú ke ʻi ha kau palesitenisī fakakōlomu pe fakakalasi, kuo uiuiʻi, vaheʻi, pea foaki kiate koe ʻa e mafai ʻo e lakanga fakataulaʻeikí ke tokoni ʻi hono ʻomi ʻa kinautolu ʻi hoʻo kōlomú pe kalasí ki he Fakamoʻuí. Ko ia tau ō ʻo toutai!
1 Heka ki he Vaká
Sai, kiʻi tatali ai. Fuofua tui ha sāketi fakahaofi moʻui pea ʻai mo ha kilimi maluʻi mei he laʻaá. Toʻo mai hoʻo meʻatokoni hoʻataá mo ha meʻa ʻaʻalo. Fakapapauʻi leva ke ke heka ki he vaká! (Ko hono moʻoní, ko haʻatau fakatātā pē.) ʻI hoʻo hoko ko e toutai tangatá, ko koe pē ʻokú ke fuofua maʻú. Ko hoʻo hoko ko ha talavou pe finemui ʻoku muimui ki he Fakamoʻuí, ko e meʻa mahuʻinga taha ia kiate koé.
2 Toʻo Mai Hoʻo Naunau Toutaí
ʻOku faingataʻa ke toutai taʻe ʻi ai ha naunau taumātaʻu, pe mātaʻu. ʻI he tuʻunga ko ʻení, ʻoku fakafofongaʻi ʻe he mātaʻu takitaha ha taha ʻo ho ngaahi tefitoʻi fatongia ʻi hoʻo hoko ko ha mēmipa ʻo e kau palesitenisī fakakōlomú pe fakakalasí.
1: Fekumi pea ʻamanaki atu ki ha fakahā fakataautaha.
Lotu ki he Tamai Hēvaní fekauʻaki mo ho uiuiʻí. Fai kiate Ia ha ngaahi fehuʻi, pea ngāueʻi e ngaahi fakakaukau mo e ngaahi ongo ʻoku haʻu ki hoʻo fakakaukaú. ʻOkú Ne finangalo ke tataki koe ʻi hoʻo ngāue tokoní.
2: ʻOfa mo ngāue fakaetauhi.
Tuku ha taimi ke ke ʻiloʻi mo ngāue fakaetauhi ai ki he mēmipa takitaha ʻo hoʻo kōlomú pe kalasí. Mahalo naʻa ʻoku ʻi ai honau niʻihi ʻoku nau foua ha ngaahi ʻahiʻahi faingataʻa. Te ke tokoniʻi fēfē kinautolu, ʻofa ʻiate kinautolu, hoko ko honau kaungāmeʻa, pea tokoniʻi kinautolu ke nau haʻu kia Kalaisi?
3: Fakahoko e ngaahi fakataha fakapalesitenisií.
ʻI hoʻo hoko ko e kau palesitenisī fakakōlomú mo e fakakalasí, ʻoku hangē ko e laú, ko e kapiteni koe ʻo e vaká. Faʻa fakataha mo hoʻo kau palesitenisií mo e kau ʻetivaisa kakai lalahí. Mou talanoa ki he ngaahi fiemaʻu hoʻomou kōlomú pe kalasí, aleaʻi e founga te mou lava ai ʻo kau ʻi he ngāue ʻo e fakamoʻuí mo e hakeakiʻí, palani e ngaahi ʻekitivitií mo e ngaahi lēsoni he Sāpaté, pea fakakaukauʻi e founga te ke vahe atu ai ho ngaahi fatongiá.
4: Taki mo tataki e ngaahi kalasi he Sāpaté.
Ko e Sāpaté ko ha ʻaho mahuʻinga ia ki heʻete hoko ko ha toutai tangatá. Tataki e ngaahi fakataha fakakōlomu ʻa e Kau Finemuí pe Lakanga Taulaʻeiki Faka-ʻĒloné mo tataki e konga “Fealēleaʻaki Fakatahá” ʻi he Haʻu, ʻo Muimui ʻIate Aú kimuʻa he lēsoní.
5: Palani mo fakahoko ʻa e ngāue tokoní mo e ngaahi ʻekitivitií.
ʻOku kau ʻi he toutai leleí ʻa e palani leleí. Teuteuʻi ʻa e ngāue tokoni mo e ngaahi ʻekitivitī ʻoku ʻi ai ha taumuʻa ʻoku ʻuhingamālié—ʻa e ngaahi meʻa ʻoku ʻikai ke fakafiefia pē, ka ʻe tokoni ki hoʻo kōlomú pe kalasí ke nau ako ha meʻa foʻou pe hoko ʻo hangē ange ko e Fakamoʻuí.
3 ʻAlu ʻo Toutai
ʻOkú ke mateuteu nai ke hoko ko ha toutai tangata? ʻI hoʻo tokoniʻi e kau mēmipa hoʻo kōlomú mo e kalasí ke nau ongoʻi ʻoku ʻofaʻi mo fakakau kinautolú, te nau maʻu ai ha ngaahi faingamālie ke ofi ange ki he Fakamoʻuí mo maʻu ha nonga ʻiate Ia. Pea te ke maʻu foki ʻa e nongá ʻi hoʻo tokoni ki he Fakamoʻuí ʻi Heʻene ngāué.