“Sa Panahon nga Mobati Kamo nga Nag-inusara,” Alang sa Kalig-on sa mga Kabatan-onan, Hunyo 2023

Dali, Sunod Kanako

Mateo 27; Marcos 15; Lucas 22–23; Juan 18–19

Sa Panahon nga Kamo Mobati nga Nag-inusara

Ni Jessica Zoey Strong

Mga Magasin sa Simbahan

Ang Manluluwas milakaw sa “pinakasubo nga pagbiyahe nga sukad nahitabo”¹ aron kamo dili kinahanglang mag-inusara.

Mibati ba kamo sukad nga nag-inusara? Ako mibati. Sa dihang siyete anyos ko, mihilak ko ngadto sa akong mama tungod kay wala koy suod nga mga higala sa eskwelahan. Sa dihang tin-edyer ko, ako ang usa sa bugtong nga young women diha sa klase sa Sunday School nga kasagaran batang mga lalaki (ug klaro lang, dili ko ganahan nga makig-istorya ngadto kanila!). Ug usahay naglisod ko sa pagpakighalubilo sa mga tawo diha sa akong mga pundok o diha sa akong mga klase sa eskwelahan.

Apan ang usa ka higayon nga gibati nako nga labing nag-inusara mao ang didto sa akong misyon sa Guadalajara, Mexico. Pipila pa lang ka adlaw ko miabot, ug dili kaayo ko makasulti og Kinatsila. Ang akong kompanyon Kinatsila lamang ang masulti. Kasagaran mag-istorya mi pinaagi sa pipila ka pulong nga akong nakat-onan sa missionary training center ug gamit ang daghan kaayo nga pagpunting sa tudlo. Dugang pa, ang among apartment temporaryong walay kuryente o init nga tubig. Wala gayod ko sa akong komportable nga dapit, dako kaayo og kalainan, ug gibati gayod nako nga nag-inusara.

Lagmit, kamo adunay mga panahon nga mibati usab kamo nga nag-inusara. Tingali kamo:

Nanglimbasog nga malakip diha sa eskwelahan o gidaugdaog.
Wala nagkasinabot sa pipila sa inyong mga higala.
Ang bugtong nga miyembro sa Simbahan diha sa inyong eskwelahan.
Nagpuyo diha sa usa ka bag-o nga dakbayan o nasod.
Gimingaw sa usa ka sakop sa pamilya kinsa anaa sa misyon o sa militar o mitaliwan na.
Mibati nga nahimulag gikan sa Langitnong Amahan ug ni Jesukristo tungod sa sala.

Sa panahon nga kamo mobati nga nag-inusara, kamo mahimong modangop ngadto sa Manluluwas. Siya nakahibalo gayod kon unsa ang pamati sa pag-inusara, ug Siya nakahibalo gayod kon unsaon sa pagtabang kaninyo. Ania ang pipila sa mga butang nga atong makat-onan mahitungod sa pagbuntog sa pag-inusara gikan sa unsay gilahutay sa Manluluwas atol sa Iyang maulaong sakripisyo.

Kamo Malig-on

Si Elder Jeffrey R. Holland sa Korum sa Napulog Duha ka Apostoles mitawag sa Pag-ula sa Manluluwas nga “pinakasubo nga pagbiyahe nga sukad nahitabo.”² Samtang si Kristo nag-antos ug miagas ang dugo sa matag lungag sa panit diha sa tanaman sa Getsemani, nangatulog ang Iyang mga disipulo.

Samtang si Jesus nag-antos, Siya nag-ampo, “Amahan, … kon buot ka, kuhaa kining kupa gikan kanako. Apan dili ang akong pagbuot kondili ang imo maoy matuman.” Bisan og wala gikuha ang palas-anon sa Manluluwas, “May anghel nga mitungha gikan sa langit nga milig-on kaniya” (Lucas 22:42–43).

Ang Langitnong Amahan mipadala og anghel aron sa paglig-on sa Iyang Anak sa Iyang pag-antos. Ug Siya molig-on kanato sa atong pag-inusara. Sa akong misyon, gipadad-an kami og “mga anghel” pinaagi sa mga miyembro diha sa ward, kinsa mitanyag kanamo og init nga mga habol, pangkaligo, ug pagkaon sa tukmang panahon nga kini labing makahuloganon kanako.

Wala Kamo Gibiyaan

Usahay tingali mobati kamo nga nag-inusara gayod og maayo nga mobati kamo nga gibiyaan, o gitalikdan, sa Dios. Apan Siya wala mobiya kaninyo. Ug si Jesukristo nakasabot kon unsa ka dako nga pag-inusara ang inyong gibati.

Human sa pag-antos sa Manluluwas sa Getsemani, gibudhian Siya sa usa sa Iyang Apostoles. Gilimod Siya sa matinud-anon nga mga sumusunod ug mga higala. Si Elder Holland mipasabot nga ang “kinapaitang gutlo sa tanan niini nga masulub-ong panaw sa Pag ula [miabot sa] kadtong panapos nga pagkahugno ngadto sa makapahurot sa umoy nga kasagmuyo sa balaang pagtalikod dihang [ang Manluluwas] mituaw sa kinaladmang kasubo, ‘Dios ko, Dios ko, nganong gitalikdan mo ako?’”³

Sulod sa usa ka higayon diha sa krus, ang Manluluwas mibati nga hingpit nga nag-inusara.

Apan “ang perpekto nga Amahan wala mobiya sa Iyang Anak niana nga oras,” gipasabot ni Elder Holland. “Sa pagkatinuod, personal nako kini nga pagtuo nga sa tanang mortal nga pangalagad ni Kristo ang Amahan wala pa gayod sukad mahimong suod kaayo sa Iyang Anak kay sa niadtong kinasakitan nga kataposang gutlo sa pag-antos.”⁴

Sama nga ang Langitnong Amahan wala mobiya sa Manluluwas, Siya dili gayod mobiya kaninyo. Kamo tingali dili kanunayng makaila niini, apan Siya duol kaninyo. Siya nasayod sa inyong mga kasubo ug nakadungog sa inyong mga pag-ampo. Siya kanunay nga anaa alang kaninyo uban sa gituyhad nga mga bukton (tan-awa sa Mosiah 16:12).

Kamo Makabuntog sa Espirituhanon nga Pagkahimulag

Bisan og dili gayod kita biyaan sa atong Langitnong Amahan, kita usahay mohimo og mga pagpili nga magpahimulag kanato gikan Kaniya ug ni Jesukristo sulod sa usa ka panahon. Kini nga pagkahimulag makahimo kanato nga mobati nga nag-inusara gayod. Apan si Jesukristo nakasabot usab niini.

Ang Langitnong Amahan wala gayod mobiya sa Iyang Anak, apan Siya “sa mubong higayon mitangtang gikan kang Jesus sa kahupayan sa Iyang Espiritu, [ang suporta] sa Iyang personal nga presensya,” si Elder Holland mipasabot. “Kining perpekto nga Anak kinsa wala gayod makapamulong og daotan [ni] wala makabuhat og sayop … kinahanglang masayod kon unsay bation sa ubang tawhanong kaliwat—kitang tanan, kon kita makabuhat sa ingon nga mga sala … kon ang balaang Espiritu mobiya, unsay bation kon siya gitalikdan sa hingpit, kapait ug kawalay paglaom nga pag-inusara.”⁵

Ang Manluluwas nakasabot kon unsa ka dako nga pag-inusara ang mabati kon kita makasala. Ug tungod kay Siya midala sa Iyang Kaugalingon sa atong mga sala, kita dili kinahanglang mag-inusara sa taas nga panahon. Kita makahinulsol ug mahimong duol pag-usab sa Dios. Dili pa gayod ulahi kaayo.

Samtang kita maningkamot sa pagtuman sa atong mga pakigsaad, kita gisaaran nga kanunay nga makabaton sa Iyang Espiritu uban kanato. Kini nagpasabot nga kon kita matag adlaw nga naghinulsol ug naningkamot sa pagpili sa husto, mahimong mobati kita nga nag-inusara, apan sa pagkatinuod wala gayod kita nag-inusara.

Ang Manluluwas Nakasabot

Dili igsapayan kon nganong nag-inusara kamo o kon unsa ka dako nga pag-inusara ang inyong gibati, hibaloi nga ang Manluluwas nakasabot. Siya nakasinati sa kinadak-an nga pag-inusara atol sa labing dako nga pag-antos nga nahibaloan sukad ni bisan kinsa.

“Ako mikulit kaninyo diha sa mga palad sa akong mga kamot,” Siya miingon. “Ang inyong mga paril anaa kanunay sa akong atubangan”(1 Nephi 21:16). Siya nasayod sa inyong pag-inusara. Siya nakaila kaninyo. Tungod sa Iyang maulaong sakripisyo, dili kamo kinahanglang mag-inusara.